Tơdrong Tơ’bôh 14:13
“Bu jang chă tơdrong yoch, apah sư tơdrong lôch. Mă-lei gah lu bơ̆n, dang ei ‘Bok Kei-Dei ăn đĕch kơ bơ̆n arih ling lang yua kơ bơ̆n lui kơ Kră Yang bơ̆n Yêsu Krist.” (Rôm 6:23)
Nơ̆r jet tơchĕng pơwao:
– Yua kơ kiơ lôch lăm Kră Yang đei pŭn hiôk?
– Kră Yang tơ’bôh tơdrong tơpăt păng tơdrong ‘mêm Sư thoi yơ?
– Nơ̆r pơkă tơ kơpal noh hei đei ‘bơm kiơ truh tơ ih?
Kơplah bơ̆n năm wă jê̆ truh tơ năr tuch luch bơih păng năr Kră Yang Yêsu wă jê̆ jur bơih, na lu bơ̆n đei tơ’bơ̆p hli tơpă gah năr ‘Bok Kei-Dei sek tơlang ning mônh. Rim ‘nu kơ lu bơ̆n đei tơ’bơ̆p tơdrong Sư sek tơlang tơpăt, lu đe bu mă ưh kơ lui sơng iŏk Kră Yang Yêsu, arih lăm tơdrong yoch gô pŭ iŏk tơdrong lôch gah sĕch akar păng gah bơhngol noh bơih tơklah đơ̆ng Kră Yang ling lang (Rôm 6:23). Mă khan lei ră, lu bơ̆n chă ‘bôh tơdrong pơlung đơ̆ng ‘Bok Kei-Dei iơ̆m dim păng ‘bĕnh ‘mêm mơnat păng kiơ̆ tơdrong tơpăt Kră Yang ăn kơ đĭ đăng kơ bơngai bu lui gơnang kơ Kră Yang. Kon pơlei Kră Yang kư̆m dai lôch gah sĕch akar, mălei nơ̆r Kră Yang pơkă lôch lăm Kră Yang đei pŭn hiôk yua kơ ưh pă đei gleh glăn pơmat tat bơih mălei yua iŏk pŭn hiôk ling lang hăm Kră Yang mă ‘mêm kơeng.
Kon bơngai bơ̆n mă bu bu gô lôch ngăl đĭ đăng kơ bơ̆n gô dơ̆ng ‘bơ̆t anăp Kră Yang “Kon bơngai bơ̆n lôch minh ‘măng đĕch, klaih kơ noh năm tơ tơdrong sek tơlang.” (Hêbrơ 9:27). Tơdrong tơpăt ‘Bok Kei-Dei tơm sư lĕch đơ̆ng lăm jơhngơ̆m păng tơpăt Kră Yang. Sư bơih Yang ưh kơ lê̆ ôh tơdrong yoch kon bơngai bơ̆n dah wă kơ lu bơngai pơm kơnê̆ gơh rơngei đơ̆ng tơdrong phak. Lăm Tơdrong Tơ’bôh 14:13 đei chih sư kơtơ̆ng nơ̆r pơma đơ̆ng plĕnh, jơ̆ nơ̆r pơma mơsêh pran đơ̆ng Kră Yang, athei sư chih dôm tơdrong gĭt kăl. Na đơ̆ng noh hơdai hăm tơdrong tơpăt Kră Yang, lu bơ̆n đei chă ‘bôh bơih tơdrong ‘nao ‘lơ̆ng, tơdrong hơmĕng păng pŭn hiôk ‘măn kơ đe bu mă lôch lăm Kră Yang. “Lu bơngai mă lui bơih kơ Kră Yang mă sư lôch kơnh pơgê dah layơ sư hiôk bơih”. Na lăm noh tơdrong tơpăt ‘Bok Kei-Dei kăl wă tơdrong yoch gô pŭ phak, tơdrong ‘mêm Kră Yang pơchŭt sư tơgŭm lăm tơdrong dŏng pơklaih păng hơmet ming. Mă khan wă pơkeh lăm năr sek tơlang, ‘Bok Kei-Dei oei đei jơhngơ̆m ‘mêm mơnat ‘măn kơ lu đe bu lui gơnang kơ Sư.
Bơngai lôch lăm Kră Yang đei pŭn hiôk yua kơ lu sư ưh kơ đei pŭ phak lăm năr tuch luch mălei đei pơdơh lăm tơdrong gleh glăn. Kră Yang gô sut rơgoh đak măt lu sư, ưh pă ơh sơ’ngon, jĭ jăn ưh pă đei nhơ̆m hmoi ơh sơ’ngon dơ̆ng ôh (Tơdrong Tơ’bôh 21:4). Hloh kơ noh dơ̆ng, đĭ đăng kon pơlei Kră Yang gô dơ̆ng ‘bơ̆t anăp ‘Bok Krist Tơ’ngla sek tơlang na lu bơ̆n ưh đei phak dơ̆ng bơih (Rôm 8:1). Mălei Inh gô chĕp tơmam apah lu sư, rim ‘nu kơ lu sư kiơ̆ kơ lu sư đêl pơm kơplah lu sư oei arih sơ̆ (Tơdrong Tơ’bôh 22:12).
Tơdrong sek tơlang tuch luch tơ’blŏk kơ lu bơ̆n gah tơdrong yoch krưp tih wă kơ lu bơ̆n weh wer, tơdrong pŭn hiôk kơ bơngai lôch lăm Kră Yang tơgŭm kơ lu bơ̆n chĕp kơjăp đon lui lăm Kră Yang păng arih ‘lơ̆ng rơgoh ding truh năr tôch wă kơ dơ̆ng hơdai ‘bơ̆t anăp Kră Yang tơpăt păng ‘bĕnh tơdrong ‘mêm mơnat, sơng iŏk tơmam apah thoi nơ̆r Kră Yang đei pơkă.
Ơ Kră Yang ‘lơ̆ng rơgoh păng ‘bĕnh tơdrong iơ̆m dim, bơnê kơ Yang ‘Bă đei dŏng inh păng tuh pŭn hiôk ăn kơ inh lăm chăl arih âu păng lăm chăl arih tơ anăp ling lang hloi. Apinh Ih tơgŭm inh tơnăp kiơ̆ Ih ding truh năr tôch, krao khan yua anăn Kră Yang Yêsu Krist, Amen.
Lu bơ̆n hăm hơmet wă tơ’bơ̆p Kră Yang ‘Bok Kei-Dei lăm tơdrong sek tơlang lăm năr âu hloi ưh?
Đŏk Sơ̆p Hla bơar ‘Bok Kei-Dei lăm pêng sơnăm: Nêhêmi 1
Kênh Youtube BHKTHN:
