Bơtho Khôi Juăt 33:8-10
“Kơplah đĭ-đăng kon pơlei pơla ‘bôh hơmơ̆l thoi jrăng dơ̆ng ‘bơ̆t ‘măng bơsŭn, đĭ-đăng kon pơlei dơ̆ng ‘bơ̆t ‘măng bơsŭn lu sư drap kơkuh.” (Bơtho Khôi Juăt 33:10)
Nơ̆r jet tơchĕng pơwao:
– Nơ̆r sơkat ăn pŭn hiôk đơ̆ng ‘bok Môis ăn kơ adrĕch Lêwi tơ’blŏk kơ sư pŭ iŏk noh thoi yơ?
– ‘Bai pơhrăm âu tơ’bôh ăn tơdrong pŭ trăp lu bơ̆n bơngai awih awăn kơ Kră Yang ‘noh kiơ?
Adrĕch adrung Lêwi đei asong ăn tơdrong jang awih awăn lăm tơdrong jang awih awăn kơ Kră Yang păng nơ̆r sơkat ăn pŭn hiôk đơ̆ng ‘bok Môis đei tơ ‘blŏk pêng tơdrong lu sư pŭ iŏk athei pơm keh tơpă ‘noh jơ̆: Pơm kơmĭl tơpă lăm tơdrong chu yom nơ̆r Kră Yang păng ư-ang Kră Yang lăm tơdrong pơm kơ̆m giĕng. ‘Nâu bơih tơdrong pŭ trăp dêh, yua kơ tơ dêh char đei pơkă ăn kơ kon pơlei Kră Yang gô mơ̆t oei, ‘nguaih kơ teh ‘lơ̆ng, teh mơ̆r, kon pơlei gô tơ’bơ̆p lơ tơdrong pơhlŭ pơlung đơ̆ng lu rup yang lu kon pơlei tơmoi. Wă kơ gơh weh wer huay kơ pơ̆k huŏng lăm tơdrong kơkuh kơ lu rup yang, lu adrĕch Lêwi kăl kơ bơtho tơ’bôh nơ̆r Kră Yang mă tơpă. Athei bơtho mă trŏ “Nơ̆r Kră Yang athei” păng “Khôi juăt Kră Yang” ưh kơ gơh pơthim dah hŭt păng bơtho kiơ̆ kơdih (trong 10). Tơdrong mă kăl dêh ‘noh arih rim năr kơ adrĕch adrung âu athei pơm tơ’bôh kơmĭl” pơm kiơ̆ nơ̆r Kră Yang, wei răk nơ̆r pơgơ̆p pơkă Sư” (trong 9 BTTHĐ). Tơdah ưh, lei dôm nơ̆r lu sư bơtho noh ưh kơ yua kiơ, yua kơ lu sư pơma mă ưh kơ pơm kiơ̆.
Hăm tơdrong pŭ iŏk pơm hloi lu tơdrong kơ̆m giĕng thoi kơ “pơyơ̆r tơmam ‘bâu phu ‘bơ̆t anăp Kră Yang păng tơmam soi ‘buh pơkhôi tơ chơnang Kră Yang” (trong 10 BTTHĐ). Adrĕch Lêwi athei pơm kiơ̆ hăm đĭ jơhngơ̆m yom kơkuh kơ Kră Yang, păng pơm tơpă iŏk Kră Yang jơ̆ blŭng a adrol hloh kơ đĭ đăng tôm tơdrong lăm chăl arih lu sư, mă đơ̆ng mĕ ‘bă truh đĭ đăng ‘nhŏng oh lăm hnam dơnŏ. Lăm trong 9: “Lêwi pơma khan: Inh ưh kơlah ‘bôh mĕ ‘bă inh; Inh ưh kơnăl kơ ‘nhŏng oh inh păng inh ưh kơ băt kon hơ’lơ̆p inh Yua kơ sư kăl chu kiơ̆ nơ̆r Kră Yang. Kral kơchăng wei răk tơdrong pơgơ̆p Kră Yang.” tơ’blŏk tơdrong hơ’mon kơ tơdrong ơh sơ’ngon kơ kon pơlei Kră Yang kơplah lu sư kơkuh kơ rup kon rơmo păng maih. Kră Yang đei khan kơ ‘bok Môis krao pơtơm lu bơngai Lêwi mă oei kơjăp hăm Kră Yang athei pơlôch lê̆ lu bơngai pơm kư̆ kă mă khan ‘nhŏng oh, buăl juăt, pôm rông ‘bôt, păng adrĕch Lêwi đei pơm kiơ̆ thoi nơ̆r ‘bok Môis pơkă (LĐ Êyiptơ 32:26-29). ‘Nâu bơih tơ’blŏk tơdrong pơm tơpă trŏ thoi nơ̆r Kră Yang, “tơdrong chu yom ‘lơ̆ng hloh kơ tơmam soi, tơdrong pơm kiơ̆ ‘lơ̆ng hloh kơ rơmă triu tơno” (I Samuel 15:22). Chu yom Kră Yang ‘Bok Kei-Dei noh bơih adrol hloh kơ đĭ đăng tơdrong nai.
Dang ei, ưh kơsĭ drô̆ ‘bok bơtho, Kră hnam yang khan bơngai awih awăn lăm hnam Kră Yang, mălei noh đĭ đăng rim ‘nu lu bơ̆n jơ̆ bơngai mă Kră Yang Yêsu dŏng pơklaih đơ̆ng pơm đĭch tơdrong yoch hăm tơmam mă gĭt dêh noh jơ̆ pham kăp Sư, lu bơ̆n “Jing đĭch đam Kră Yang ‘Bok Kei-Dei” (Rôm 6:22). Rim ‘nu lu bơ̆n ưh pă pơm đĭch awih awăn kơ yang kơnê̆ bơih, mălei jing đĭch đam bơ̆jang awih awăn kơ Kră Yang. Yua kơ thoi noh athei hŏk pơhrăm Nơ̆r Kră Yang wă kơ đĭ jơhngơ̆m ră roi nơ̆r Kră Yang pơlung tơiung dih băl, athei đei tơdrong arih pơm kơmĭl ‘lơ̆ng, păng ling lang ăn Kră Yang noh tơm lăm tơdrong arih lu bơ̆n.
Ơ Kră Yang, Tơ’ngla mă inh kơkuh păng awih awăn. Apinh Ih tơgŭm inh ling lang arih lăm tơdrong lui yom, chu yom Ih lăm tôm tơdrong păng ling lang pôk Ih tơm adrol hloh lăm chăl arih inh. Krao khan yua anăn Kră Yang Yêsu Krist, Amen.
Lu bơ̆n hăm awih awăn kơ Kră Yang trŏ thoi Sư hăm pŭ iŏk tơdrong mă Kră Yang pơjao ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 6
Kênh Youtube BHKTHN:
