II Hơ’mon 29:31-36
“Mă-lei inh bu, păng kon pơlei inh kiơ, na mă gơh đei jơhngơ̆m pơyơ̆r thoi noh? Đĭ đăng dôm tơmam tă kơ đơ̆ng Ih ăn ngăl păng dôm tơmam mă lu nhôn pơyơ̆r ăn kơ Ih noh tă kơ lĕch đơ̆ng ti Ih ngăl.” (I Hơ’mon 29:14)
Nơ̆r jet tơchĕng pơwao:
– Pơtao Hesekia krao kon pơlei pơla pơm tơdrong kiơ păng lu sư đei drơ̆ng hơdai pơm tơdrong kiơ?
– Pơtao hăm kon pơlei đei lơi yua tơdrong kiơ kơplah đei jơhngơ̆m pơyơ̆r rơkah rơkai?
– Jơhngơ̆m đon bơ̆n lăm tơdrong pơyơ̆r thoi yơ?
Kơplah lu ‘bok soi đei pơyơ̆r keh bơih kiơ̆ kơ phĕt, pơtao Hesekia krao kon pơlei pơla chĕp ba tơmam soi lu sư lăm hnam akŭm yua kơ tơdrong yoch lu sư Kră Yang ‘Bok Kei-Dei đei mơnat đĭ bơih, Kră Yang kŭm drơ̆ng kơ lu sư “ “Dang ei lu iĕm đei hơmet akâu kơdih rơgoh ăn kơ Kră Yang boih;” thoi noh na lu sư gơh “năm jê̆” Kră Yang, tơ’bôh kơ jơhngơ̆m băt bơnê (trong 31). Thoi noh na lu sư chĕp ba tơmam soi ‘buh, tơmam soi bơnê (trong 31,32), tơ’bôh kơ tơdrong bơnê yua kơ lu sư ưh pă đei tơdrong phak đơ̆ng Kră Yang bơih păng đei tơdrong tơ’bưh hăm ‘Bok Kei-Dei, lu sư pơyơ̆r tơmam soi hơđơ̆ng, wă khan tơmam soi bơnê (Lêvi 3:1-16) păng tơmam soi ‘buh (trong 35; Lêvi 23:13)
Kon Pơlei ưh kơ ‘mêm kơ mŭk tơmam lu sư đei ôh lu sư pơyơ̆r hăm tơdrong hơmrah, tơmam soi lăm tơdrong pơyơ̆r soi ‘buh, păng tơmam pơyơ̆r bơnê đei lơ dêh tơpă, thoi kơ rơmo tơno, triu tơno păng kon triu iĕ. Lu sư đei pơyơ̆r lơ dêh tơmam soi na lu ‘bok soi ưh kơ tôm mah, lu sư ưh kơ tôm bơngai wă hrach akar lu tơmam soi wă kơ đei tơmam soi ‘buh pơkhôi. Thoi noh, lu bơngai Lêwi lu nhŏng oh sư kơdih athei tơgŭm wă kơ tơdrong jang sư keh ‘lơ̆ng păng ding keh kơ tơdrong jang. Dôm kơ tơmam soi ƀuh pơkhôi noh đơ̆ng kon pơlei đei pơyơ̆r ưh kơ đei pơgŏ (trong 31)
Thoi noh “tơdrong pơyơ̆r tơmam soi lăm hnam akŭm đei pơm pơlơ̆k dơ̆ng bơih” (trong 35) păng đĭ lu sư đei jơhngơ̆m bơnê kơ Kră Yang. Đei pơih ‘măng hnam akŭm, đei pơyơ̆r hnam akŭm kơ ‘Bok Kei-Dei hrĕnh tĕnh hloi da tơ pêng giĕng đĕch. ‘Bok pơtao păng lu kon pơlei pơla kŭm wang hơdai chơt hiôk yua kơ tơdrong pơjing noh jah păng hrĕnh tĕnh dêh pơm kơ lu sư ưh kơ ngeh kơ jah đang thoi noh (trong 36). Lu sư kŭm hiôk chơt băt kơ tơdrong noh jơ̆ đơ̆ng ‘Bok Kei-Dei đei “măn ăn kơ kon pơlei pơla” ưh kơ trŏ đơ̆ng lu sư đei kơdih ôh.
Tơdrong kơkuh kơ ‘Bok Kei-Dei lăm chăl Hesekia ưh kơ trŏ minh drô̆ tơdrong krao khan đĕch ôh mă lei kŭm đei tơdrong bơnê păng ư-ang kơ Kră Yang hăm nơ̆r hơri pơ ư-ang kơ Kră Yang Yê-hô-va. Yua kơ lĕch đơ̆ng jơhngơ̆m ‘mêm kơ Kră Yang ‘mơ̆i na gơh pơjing lơ tơmam soi thoi noh. Tơdrong pơyơ̆r noh kŭm jơ̆ tơdrong kơ kuh kơ ‘Bok Kei-Dei. Chăl dang ei, Lu bơngai lui băt pơyơ̆r kơ Kră Yang hoei kơ kret noh jơ̆ yua kơ lu sư băt bơnê păng ‘mêm kơ Kră Yang yua kơ Kră Yang đei pơm bơih ăn kơ lu sư tơdrong kiơ bơih tơpă lăm chăl arih lu sư. Kơplah bơ̆n đei pơyơ̆r hoei kơ kret noh jơ̆ tơ’bôh kơ jơhngơ̆m bơ̆n gơnang kơ Kră Yang ưh kơ sĭ gơnang kơ mŭk tơmam ôh, lu bơ̆n đei pơyơ̆r kơ Kră Yang tơpă dôm tơdrong bơ̆n đei noh jơ̆ tơmam Kră Yang mơ̆n păng yua kơ đơ̆ng Sư song ăn đĕch. Kră Yang wă kơ jơhngơ̆m bơ̆n băt bơnê na tơbôh lăm tơdrong pơyơ̆r lăp đon thoi Sư wă.
Ơ Kră Yang, apinh Ih ăn kơ inh kơ kuh kơ ih păng pơyơ̆r kơ Ih hăm tơdrong ‘mêm păng băt bơnê kơ Ih wă kơ inh đei jơhngơ̆m hiôk chơt păng lăp đon kơ dôm tơdrong pŭn hiôk mă ih đei ăn kơ inh pơyơ̆r kơ Ih. Yua anăn Yêsu Krist, Amen!
Lu bơ̆n hăm hơlăng pơyơ̆r kơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 11
Kênh Youtube BHKTHN:
