Luka 3:21-22; 4:1-2
“Kơplah đe tam mă phak Yôhan sơ̆ sư pơm ‘batem kơ lu kon tơring tơrang. Đơ̆ng noh sư kư̆m pơm kơ Yêsu ‘batem mơ̆n. Lăp Yêsu iŏk ‘batem đang boih na Sư krao khan kơ ‘Bok Kei-Dei, na plĕnh tơpơih.”
(Lu-ca 3:21)
Nơ̆r jet tơchĕng pơwao:
– Kră Yang Yêsu pơm kiơ adrol kơ pơtơm tơdrong jang?
– Yua kơ kiơ Yang Bơhngol ‘Lơ̆ng anhăk ba Sư tơ char glă chơ ngue?
– Tơdrong kiơ tơ’bôh ăn krao khan bơih jing tơm lăm tơdrong arih bơ̆n?
Krao khan jơ̆ minh tơdrong kăl lăm chăl arih Kră Yang Yêsu tơ teh đak âu sơ̆. Sư bơih bơngai krao khan păng pơm tơ’bôh ăn kơ bơ̆n lăm tơdrong krao khan. Tơdrong jang Sư pơtơm păng pơtôch hăm nơ̆r krao khan ngăl. (Luka 3:21; 23:46).
Luka 3:21-22. Tơ’bôh ăn tơdrong jang Kră Yang Yêsu pơtơm blŭng a hăm nơ̆r krao khan wă pơtơm tơdrong jang tơ teh đak âu, Sư năm tơ ‘bok Yôhan wă iŏk ‘Batem (trong 21; Mathiơ 3:13-15). ‘Nâu bơih tơdrong Kră Yang tơmơ̆t hơdai hăm lu bơngai mă Sư gô huai iŏk, ưh kơ trŏ kơ Sư minh ‘nu bơngai yoch kăl kơ tơbral. Kră Yang Yêsu krao khan hăm ‘Bă Sư hơdrol kơ wă iŏk ‘Batem wă tơ’bôh jơhngơ̆m Sư chu kiơ̆ kơ ‘Bă Sư wă. Kơplah “Sư krao khan kơ ‘Bok Kei-Dei, na plĕnh tơpơih” (trong 21). Tơdrong âu wă khan ‘Bok Kei-Dei, drơ̆ng iŏk Kră Yang Yêsu gô chu lôch tang tơdrong yoch kon bơngai bơ̆n păng yua kơ đơ̆ng Sư na plĕnh păng teh gơh tơ’bưh băl dơ̆ng. Kơplah plĕnh tơpơih, “Yang Bơhngol ‘Lơ̆ng thoi lĕ sem kơtơp jur oei tơ Yêsu.” ‘Nâu bơih tơdrong pơsĭt hăm nơ̆r pơma đơ̆ng plĕnh khan: Kră Yang Yêsu Krist “Ih bơih Kon Inh mă ‘mêm kơeng tơpă, Inh lăp đon kơ Ih tôm tơdrong.” (trong 22).
Lăm sơ̆p hla bơar Luka 4:1-2, Luka bơih chih tơbăt Yang Bơhngol ‘Lơ̆ng anhăk ba Kră Yang Yêsu tơ char glă chơngue yang kơnê̆ wă pơhlŭ Sư. Adrol kơ noh, Kră Yang Yêsu ơ̆t kơ sŏng sa na krao khan lăm puăn jĭt năr. Sư pơtơm tơdrong jang ‘măn jơ kơ drô̆ Sư lăm char glă chơngue ưh kơ đei sŏng sa păng krao khan chơ chă tơdrong chông anhăk đơ̆ng Kră Yang ‘Bok Kei-Dei Yang ‘Bă. Đơ̆ng noh, na sư đei tơ’bơ̆p tơdrong pơhlŭ tih dêh păng Sư kĕ jei bơih, mă khan sĕch akar pơngot gleh lap. Ưh kơ đei tơdrong blŭng a ayơ mă ‘lơ̆ng hloh kơ tơdrong krao khan kơ rim tơdrong lăm chăl arih bơ̆n?
Bơ̆n bơngai lui bơih, lu bơ̆n băt tơdrong krao khan gĭt tơpă. Mălei sơ’ngon dêh kơ lơ bơngai mưh krao khan rai jing pơthim lăm chăl arih. Lu bơ̆n ngăl pơtă kơ tơdrong hrăt hrot lăm chăl arih, tơdrong jang hnam dơnŏ păng kon hơ’lơ̆p. Mălei dah bơ̆n ưh kơ đei ‘măn jơ adrol wă tơ’bưh hăm Kră Yang lei na dôm tơdrong hrăt hrot noh gô pơm kơ bơ̆n ding mah krao khan chă yôk yak đĕch hơdrol kơ wă sŏng sa dah wă tep!
Tơdrong krao khan ưh kơsĭ lăp pơtơm blŭng a lăm tơdrong jang Kră Yang Yêsu, mălei oei pơtrơp bơwei păng tơguăt sư păng ‘Bă tơ plĕnh lăm tơdrong jang Sư. Lu bơ̆n đei ‘măn jơ năm tơ ‘Bă lăm tơdrong krao khan kơplah lu bơ̆n awih awăn kơ Kră Yang lăm tơdrong jang kiơ kiơ dah mă pơm tơdrong kiơ kiơ lăm chăl arih bơ̆n ‘noh gĭt dêh tơpă. Dôm tơdrong pơtơm blŭng a gô ‘lơ̆ng tơproh dah bơ̆n pơtơm đơ̆ng tơdrong krao khan mă tơpă.
Ơ Kră Yang, apinh Ih tơgŭm inh ‘nĕ ăn kơ inh iŏk tơdrong hrăt hrot noh na pơm kơ inh ưh kơ ‘maih krao khan. Apinh Yang Bơhngol ‘Lơ̆ng Ih tơ’blŏk kơ inh năm tơ Ih adrol hloh lăm tơdrong krao khan kơplah inh wă pơtơm lăm tơdrong jang kiơ lăm chăl arih inh. Yua anăn Kră Yang Yêsu Krist, Amen!
Lu bơ̆n đei pơtơm năr ‘nao dah tơdrong jang ‘nao hăm tơdrong krao khan ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 38-39
Kênh Youtube BHKTHN:
