II Hơ’mon 31:1
“…lu bơngai Isơrael mă oei tơ noh lu sư năm tơ lu pơlei lăm char Juđa teh pơchah lê̆ lu jrăng gơ̆ng, teh pơhĕch lê̆ lu rup yang Asêria, pơrăm đĭ lu anih kơjung păng lu chơnang soi tơ lăm jơ̆p char Juđa, Bênjamin, Êphraim păng Manase ding pơrăm đi boih. Đơ̆ng noh đi đăng lu kon pơlei Isơrael wih brŏk tơ pơlei lu sư kơdih tơ anih hnam lu sư.” (II Sử Ký 31:1)
Nơ̆r jet tơchĕng pơwao:
– Lu bơngai mă oei tơ Jêrusalem pơm kiơ đơ̆ng rŏng Phĕt Giĕng ‘Bĕng ưh kơ đei ‘buih pông?
– Lu sư pơm tơ anih ayơ?
– Đei tơ ‘blŏk kơ lu bơ̆n tơdrong kiơ đơ̆ng tơdrong lu bơngai ‘nâu?
Phĕt năm Brih păng Giĕng ‘bĕng ưh kơ đei ‘buih pông đang bơih, ‘măng hnam akŭm đê̆ tang lê̆ bơih lu tơmam brŏ reh kŭm đĭ lăm hnam ngăl bơih, mă lei lu bơngai ‘maih wă kơ kuh kơ Kră Yang hăm jơhngơ̆m chơt hiôk tơ pơlei Jêrusalem ưh kơ đei tôch ‘bơ̆t ei ôh. Lu sư ưh kơ wă tơ’bôh đơ̆ng lăm jơ-hngơ̆m thoi yơ đĕch mă lei lu sư pơm tơ’bôh hloi. Lu sư năm tơ lu pơlei lăm char Juđa teh pơchah lê̆ lu rup yang Asêria, pơrăm đĭ lu anih kơjung lu chơnang soi tơlăm jơ̆p char Juđa, Bênjamin, Epraim păng Manase, wă khan plah lăm adrĕch adrŭng Israel gah yă Nơ̆m. Lu sư pă đei teh pơchah kơplah “Pơrăm đĭ bơih”. Tơ’bôh tơdrong lu sư wă hơmet rơgoh lu rup yang jơ̆p pơlei lu sư. Tơdrong lu sư hŭr hăr jơ-hngơ̆m ‘maih pơm tơdrong ‘lơ̆ng lu sư ưh kơ đei kơdŭn đơ̆ng rŏng kơ hơkŭm phĕt ei, đơ̆ng rŏng kơ kơkuh kơ Kră Yang mă lu sư oei bơwei lăm jơ-hngơ̆m, tơgŭm lu sư tơdrong pơrăm đĭ tơdrong kơkuh kơ rup yang đơ̆ng noh đĭ đăng lu kon pơlei Israel wih brŏk tơ pơlei sư kơdih.
Hơdrol kơ Phĕt Năm Brih păng Phĕt ‘Bĕng ưh kơ đei buih pông lu sư pơrăm đĭ chơnang soi kơkuh kơrup yang tơ pơlei Jêrusalem, klơ̆m hŭt lê̆ đĭ tơlăm thŭng Kidrôn (II Hơ’mon 30:13-14) păng pơm kơ pơlei Jêrusalem jing anih trŏ kơ jung tơdrong hơkŭm Phĕt Năm Brih. Dang ei na lăm jơ-hngơ̆m lu sư hơdrin wă pơtrơp dơ̆ng wă hơmet rơgoh jơp anih Juđê păng truh tơ pơlei Jêrusalem. Lu sư adrin ưh kơ wă ‘bôh minh pôm rup yang ayơ, chơ nang soi kơ kuh kơ rup yang ayơ dơ̆ng, wă kơ huay puh pơ̆k kiơ̆ tơdrong pơhlŭ lu sư na yak kiơ̆ trong kơnê̆ thoi noh na lu sư “pơrăm đĭ bơih”. Dang ei, kơplah bơ̆n năm kơkuh păng mơ̆ng nơ̆r Kră Yang, dah đơ̆ng rŏng kơ hơkŭm kơkuh atŏk tơdrong lui, pơrăm he…hăm lu tơdrong noh bơtho păng nơ̆r krao pơtơm lui, lơ bơngai chhưu mơn lăm jơ-hngơ̆m, nhơ̆m hmoi, pơkă pơkăm…mă khan lei ră mưh bơ̆n brŏk tơhnam bơih, đei lơ bơngai ưh pă blŏk bơih tơhiong đĭ bơih, đei lơ bơngai ưh pă ‘blŏk bơih tơhiong đĭ bơih jơhngơ̆m thoi ‘blŭng a, arih ưh kơ đei pha ra kiơ kơ hơdrol ki. Phŏ lơ wơ̆t jơ-hngơ̆m ‘maih mơ̆ng nơ̆r Kră Yang kơplah jơ-hngơ̆m mơn mă lei ưh kơ đunh gô hiong hiach ưh kơ đei jing pơm tơ’bôh hloi lăm chăl arih. Lăm jơ bơ̆n kơ kuh kơ Kră Yang đei gơh tơ’bơ̆p tơ’bưh hăm Kră Yang na pơm kơ bơ̆n đei tơplih athei pơkă lăm jơ-hngơ̆m bơ̆n athei areh kơ tơdrong yoch, đơ̆ng noh na teh pơchah lu rup yang păng “pơrăm lê̆ đĭ bơih”, dôm tơdrong kơnê̆ mă bơ̆n ‘bôh păng măt dah hlơp thoi yơ, dôm tơdrong pơm kơ ‘Bok Kei-Dei ưh kơ lăp đon lăm chăl arih bơ̆n. Apinh Kră Yang ăn kơ bơ̆n huay kơ đei tơdrong kiơ ‘bơm lăm jơ kơkuh, akŭm tơiung tơdrong lui, pơhrăm he noh mơn lăm jơhngơ̆m đĕch păng hiơt bơih mă lei noh jing pơm tơ’bôh hăm tơdrong pơm hloi.
Kơkuh kơ Ih Kră Yang, apinh Ih tơgŭm inh yua iŏk dôm tơdrong kiơ đei pơhrăm iŏk đơ̆ng nơ̆r Kră Yang lăm jơ kơkuh, jơ akŭm…lăm chăl arih inh rim năr wă kơ jơhngơ̆m inh pơrăm đĭ dôm lu rup yang păng tơdrong yoch lăm chăl arih inh. Krao khan yua anăn Kră Yang Yêsu Krsit, Amen.
Lu bơ̆n hăm oei răk mong lu rup yang tơdrong juăt pơm kơnê̆ dah pơm tơdrong ưh kơ ‘lơ̆ng thoi Kră Yang wă lăm chăl arih bơ̆n?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êsai 42
Kênh Youtube BHKTHN:
