II Kauleethaus 11:7-15
Nqe cim:
“Tsob ntoo zoo yeej tsis txi cov txiv phem lossis tsob ntoo phem yeej txi tsis tau cov txiv zoo. Yog yus pom cov txiv, yus yeej paub hais tias, tsob ntoo ntawd yog tsob phem lossis tsob zoo. Yus yeej tsis de txiv ncuavpias ntawm tsob ntoo pos ntshav, thiab tsis de txiv hmab ntawm tsob pos tshauv li” (Lukas 6:43-44).
Lus nug rau sawvdaws xav:
– Timthawj Paulus raug cov xibhwb cuav rhuav tej haujlwm zoo uas nws ua li cas?
– Paulus hais nws zaj zoo li cas?
– Yuav ua li cas kom peb zeem paub tsob ntoo phem, cov txiv tsis zoo kom peb tsis raug cov neeg “cuav” hauv Pawg Ntseeg ntxias tau?
Cov xibhwb cuav nyob hauv Pawg Ntseeg Kauleethaus siv ntau lub tswvyim los thuam, nkaug ua kom Timthawj Paulus tej lus qhia tsis muaj zog. Ntu Vajluskub no qhia paub, lawv hais tias qhov uas Timthawj Paulus txaus siab qhia Txojmoo Zoo rau cov ntseeg hauv nroog Kauleethaus tsis yuav nqi zog, vim yog Paulus tsis txawj qhia. Timthawj Paulus thiaj siv tej lus nug los nug kom cov ntseeg hauv nroog Kauleethaus zeem paub txog qhov uas lawv tabtom raug dag ntxias: “Thaum kuv tuaj qhia Txojmoo Zoo uas hais txog Vajtswv zaj rau nej, kuv yeej tsis thov ib qho nqi zog li. Kuv txo hwjchim kom nej tau ntsejmuag. Kuv ua li ntawd yog kuv ua txhaum lawm los?” (nqe 7). Txuas ntxiv, Paulus qhia rau lawv paub, qhov uas nws tsis yuav nqi zog mas yog cov Pawg Ntseeg nyob rau lwm qhov twb xa nyiaj tuaj yug nws lawm, thiab lub sijhawm uas nrog lawv nyob, txawm yog txomnyem los Paulus twb tsis txhawj, vim “cov kwvtij uas tuaj pem Makedaunias tuaj, lawv nqa tej uas kuv tsis muaj tuaj rau kuv” (nqe 8-9). Qhov tseeb thiab lub siab hlub uas Paulus ua, Vajtswv yog tus paub zoo (nqe 10-11).
Los ntawm tej uas Paulus hais, nws qhia meej rau cov ntseeg hauv Kauleethaus paub tias nyob hauv lawv cov tabtom muaj cov “timthawj cuav. Lawv ua lawv tes haujlwm ntxias sawvdaws…ua txuj ua li lawv yog Yexus Khetos cov timthawj” (nqe 13-15). Txawm yog muaj tej lus tsis zoo nkaug Paulus los nws yeej yuav ua nws tes haujlwm mus tsis so, nws yuav siv zog qhia Txojmoo Zoo tsis yuav nqi zog “Tej uas nimno kuv ua, kuv yeej yuav ua mus li kom cov neeg uas nej hu ua timthawj, lawv thiaj tsis muaj lus khav hais tias lawv ua lawv tes haujlwm ib yam li peb ua” (nqe 12).
Nkaug, hais tsis zoo, nrhiav tswvyim tsimtxom ua kom tus neeg rau siab ua Vajtswv haujlwm puas koob npe yog lub siab phem uas cov neeg tsis ncaj, khavtheeb nyob hauv cov Pawg Ntseeg thaum ub thiab nimno ua, lawv lub tswvyim yog thuam lwm tus kom yus tau qhuas. Tej zaum lawv kuj yog cov uas ua haujlwm xws li cov xibhwb cuav uas suav hais tias lawv yog cov timthawj muaj hwjchim hauv Pawg Ntseeg Kauleethaus, tiamsis lawv yog cov uas qhia cuav, lawv lub neej xaus rau tej haujlwm uas lawv ua (nqe 13-15). Tswv Yexus qhia “pom cov txiv, yus yeej paub …tsob ntoo” (Lukas 6:43-45), thov Vajtswv tus Ntsujplig qhia rau peb zeem paub tsob ntoo phem, txiv tsis zoo kom peb tsis raug cov neeg “cuav” hauv Pawg Ntseeg ntxias.
Thov Vajtswv,
Tus Tswv, tej yam uas tshwm muaj hauv Pawg Ntseeg thaum ub yog ceebtoom kom nimno peb ceevfaj cov neeg “cuav” nkag los hauv Pawg Ntseeg. Thov Vaj Ntsujplig qhia kom nyuam yaus tsis raug cov neeg cuav ntxias. Amees.
Qhov uas Timthawj Paulus ntsib pab tau peb li cas rau kev zeem paub qhov tseeb, qhov cuav hauv Pawg Ntseeg?
Nyeem Vajluskub hauv peb lub xyoo: Lukas 6:37-7:17
Kênh Youtube BHKTHN:
