Klei Aê Diê Blŭ: II Kôrantô 11:7-15
Êlan kliăng: “Kyuadah ana kyâo jăk amâo mâo boh jhat ôh, kăn ana kyâo jhat mâo boh jăk rei. Kyuadah arăng thâo kral grăp ana kyâo tui si boh gơ̆. Arăng amâo pĕ ôh boh hra mơ̆ng hruĕ êruê, kăn srăng pĕ rei boh kriăk ƀâo mơ̆ng pum êruê” (Y-Luk 6:43-44)
Klei êmuh ksiêm mĭn: Phung khua pô mtô soh lŏ dơ̆ng mčeh luar kơ ya bruă jăk Khua ƀĭng kna Y-Pôl ngă? Si ñu mblang? Si ngă čiăng drei thâo kral ti ana jhat, boh jhat čiăng đăm lĕ ôh hlăm klei mplư mơ̆ng phung mgưt hlăm Sang Aê Diê?
Phung khua pô mtô soh ti Sang Aê Diê Kôrantô yua lu mnêč jhat čiăng mčeh luar hŏng hdră kñăm bi hrŏ kơhưm Khua ƀĭng kna Y-Pôl. Trăn Klei Aê Diê Blŭ anei brei thâo diñu lač Khua ƀĭng kna Y-Pôl čŏng hiu hưn Klei Mrâo Mrang Jăk kơ phung đăo Kôrantô ƀiădah amâo čiăng ya mta mnơ̆ng ôh kyua ñu jing sa čô mtô bi hriăm êdu kƀah. Khua ƀĭng kna Y-Pôl yua klei êmuh čiăng đru kơ phung đăo Kôrantô thâo kơ klei mplư diñu dôk lĕ: “Kâo ngă soh mơ̆ êjai kâo bi luă gŭ kâo pô čiăng bi mđĭ diih, kyuadah kâo mtô leh hơăi mang klei mrâo mrang jăk Aê Diê kơ diih?” (êlan 7). Leh anăn, ñu mblang kơ phung anăn thâo amâo mă ôh klei diñu đru kyua dŭm sang Aê Diê anôk mkăn mkăp leh prăk mah kơ ñu, leh anăn wăt tơdah ti anôk diñu, hlăk tuôm hŏng klei dleh dlan ñu ăt kăn brei digơ̆ rŭng răng rei, ƀiădah “phung ayŏng adei hriê mơ̆ng čar Masêdôn đru leh mnơ̆ng kâo kƀah”(êlan 8-9). Djăp mta klei kpă ênô ñu hŏng klei khăp ñu brei kơ digơ̆ Aê Diê thâo klă (êlan 10-11).
Mơ̆ng dŭm klei mblang anăn, ñu jhŏng ktrâo kơ phung đăo Kôrantô thâo kơ phung dôk ti krah digơ̆ jing phung “phung khua ƀĭng kna soh, phung mă bruă mplư, mgưt diñu pô jing msĕ si phung khua ƀĭng kna Krist…” (êlan 13-15). Bi ñu pô amâo djŏ ôh kyua klei mčeh luar anăn mdei hĕ bruă pô, ñu srăng lŏ dơ̆ng hiu hưn Klei Mrâo Mrang Jăk amâo mă prăk tla ai ôh “čiăng bi mdlưh hĕ phung duah mông găl bi mđĭ kơ diñu pô, lač diñu jing msĕ si hmei mơh” (êlan 12).
Mčeh luar, blŭ jhat, duah djăp mta klei jhat ƀai čiăng mdlưh kơhưm mơ̆ng phung jih ai tiê mă bruă kơ Aê Diê jing mnêč drei khăng ƀuh hlăm phung mgưt, mgao hlăm Sang Aê Diê êlâo dih ăt msĕ mơh hruê anei, hdră diñu mưng ngă jing mčeh luar kơ phung mkăn čiăng mđĭ kơ pô. Năng ai diñu jing phung mâo bruă prŏng msĕ si phung khua pô soh čŏng lač jing khua ƀĭng kna mâo klei dưi hlăm Sang Aê Diê Kôrantô, ƀiădah jih jang knŏng jing mgưt, knhal tuč diñu srăng năng hŏng bruă diñu ngă (êlan 13-15). Khua Yang Yêsu mtô “dlăng kơ boh snăn thâo ana” (Y-Luk 6:43-45), akâo kơ Khua Yang đru drei mâo Yang Mngăt Jăk atăt gai čiăng thâo kral ti jing ana jhat boh jhat čiăng đăm lĕ hlăm klei phung “mgưt” mplư hlăm Phung Sang Aê Diê.
Klei Khua ƀĭng kna Y-Pôl bi knal đru drei si srăng ngă čiăng thâo kral klei sĭt hŏng klei mgưt hlăm Phung Sang Aê Diê?
Wah lač: Ơ Khua Yang, ya klei mâo hlăm Sang Aê Diê Kôrantô êlâo dih jing klei đru kâo hruê anei thâo ti anăp mâo lu phung “mgưt” mŭt hlăm Phung Sang Aê Diê. Akâo kơ Yang Mngăt Jăk mtrang mngač čiăng kơ kâo đăm lĕ hlăm klei phung soh mplư
Dlăng Klei Aê Diê Blŭ hlăm tlâo thŭn: Y-Luk 6:37-7:17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
