Mathiơ 19:16-20
“Lu sư đei tơdrong arih ling lang yua kơ lu sư lui kơ Ih Kră Yang ‘Bă Tơm kơpal plĕnh păng băt kơ Inh Yêsu Krist mă Ih wơh jur tơ ala teh âu.”(Yôhan 17:3)
Nơ̆r jet tơchĕng pơwao:
– Bơngai oei tơdăm sư năm tơ Kră Yang Yêsu păng apinh tơdrong kiơ?
– Kră Yang Yêsu đei tơl ăn kơ bơngai oei tơdăm thoi yơ?
– Kơplah bơ̆n tơ’bưh hăm Kră Yang păng Nơ̆r Sư, lu bơ̆n băt kơdih bơ̆n thoi yơ?
Đei minh ‘nu bơngai tơdăm pơdrŏng năm chă Kră Yang Yêsu wă apinh Kră Yang “Ơ ‘Bok Thây, inh kăl kơ pơm tơdrong kiơ wă kơ đei tơdrong arih ling lang”? lăm Sơ̆p hla bơar Luka đei chih roi khan bơngai âu pơm Kuan (Luka 18:18). Tơdrong ‘lơ̆ng lăm bơngai âu jơ̆ sư đei hiơ̆k bơngơ̆t kơ wă pơm thoi yơ na đei tơdrong arih ling lang păng sư kŭm chă trŏ kơ bơngai noh jơ̆ Kră Yang Yêsu na apinh. Mălei sư băt kơ Kră Yang Yêsu noh jơ̆ minh ‘nu bơngai bơtho tơdrong juăt đĕch, minh ‘nu ra’bi, păng bơngai âu sư hiơ̆k kơ tơdrong jơ̆ kăl kơ “pơm tơdrong ‘lơ̆ng” kiơ wă kơ tôm mah na đei tơdrong arih ling lang. tơdrong mă bơ̆n đei ‘bôh sư ‘nâu jơ̆ minh ‘nu bơngai mă pơ ang akâu kơdih păng lăp đon lăm tơdrong mă sư đei pơm ‘lơ̆ng, Kră Yang Yêsu wă tơ’bôh kơ tơdrong arih sư jơ’noh na Kră Yang Yêsu khan thoi âu, “pôm ‘Bok Kei-Dei đĕch ‘lơ̆ng tơpăt” wă khan jơ̆ lăp minh ‘nu Kră Yang ‘Bok Kei-Dei đĕch ‘lơ̆ng rơgoh păng ưh kơ đei pơm tơdrong yoch. Đơ̆ng rŏng kơ ‘noh, Kră Yang Yêsu đei roi pơdah kơ dôm tơdrong juăt wă kơ nhăm kơ bơngai âu băt kơ dih sư minh ‘nu bơngai yoch na ưh kơ gơh đei tơdrong arih ling lang, mă lei minh ‘nu bơngai pơdrŏng âu sư đei tơl Kră Yang Yêsu thoi âu: “Inh đei wei răk dôm tơdrong âu bơih; hăm pă đei tơdrong kiơ nai dơ̆ng ưh mă inh wă kăl kơ pơm?” Sư oei tơchĕng wei răk dôm tơdrong khôi juăt păng pơm kiơ̆ lăm tơdrong lui noh jơ̆ tôm bơih.
Dang ei, lăm khul bơngai lui kŭm đei lơ bơngai tơchĕng kăl kơ pơm dôm tơdrong kiơ̆ thoi lăm tơdrong lui dah mă đei hŏk lơ đei ‘băng lei rŏ kơ gơh mơ̆t lăm plei ‘lơ̆ng ‘Bok Kei-Dei. ‘Bok Pôl đei pơma kơ khul bơngai Galati thoi âu khôi juăt noh jơ̆ nhen thây tơ’bôh ăn kơ bơ̆n trŏ glăi (Galati 3:24). Lăm Sơ̆p hla bơar Yakơ kŭm đei pơma ưh kơ đei minh ‘nu bơngai bu kĕ wei răk đĭ khôi juăt kiơ̆ thoi ‘Bok Kei-Dei (Yakơ 2:10). Lu bơ̆n băt kơ đĭ đăng kon bơngai bơ̆n oei lăm tơdrong yoch na ưh kơ đei minh ‘nu bơngai bu wă tơplih kơ dôm tơdrong ‘lơ̆ng na gơh đei tơdrong arih ling lang (Rôma 3:10,23). ‘Bok Yôhan đei bơtho kơ lu bơ̆n băt tơdrong arih ling lang noh jơ̆ băt kơ Kră Yang ‘Bok Kei-Dei păng drơ̆ng kơ minh tơdrong đơ̆ng Kră Yang hơmet noh jơ̆ minh ‘nu Kră Yang Yêsu Krist đĕch gơh dŏng bơ̆n đơ̆ng tơdrong yoch.
Rai hlôh băt kơ Kră Yang lu bơ̆n đei ‘bôh kơ dih bơ̆n yoch kơnê̆ nhen thoi bơngai pơtruh nơ̆r ‘Bok Kei-Dei sơ̆ Êsai đei pơma thoi âu, “ ‘Inh ôr khan: “Răm-‘băm dêh kơ inh! Inh đĭ răm bơih! Yua kơ inh jơ̆ minh ‘nu bơngai đei ‘bơ̆r kơnê̆ ‘mê̆-‘mach, oei hơdai hăm kon pơlei đei ‘bơ̆r kơnê̆ ‘mê̆ mach, yua kơ măt inh lăng ‘bôh bơih pơtao, noh bơih Kră Yang Tih Hloh!” (Êsai 6:5). Rai băt kơ bơ̆n bơngai yoch kơ nê̆, lu bơ̆n rai hơdrĭ ‘bơ̆t anăp Kră Yang. Lăp minh tơdrong ‘mêm mơnat đơ̆ng Kră Yang, na tơdrong yoch bơ̆n đei mơnat păng bơ̆n đei tơdrong arih ling lang.
Ơ Kră Yang Yêsu, inh băt inh bơngai yoch, ưh kơ gơh pơm minh tơdrong kiơ. Apinh Ih mơnat kơ inh yua kơ inh pơang akâu kơdih, inh tơjur akâu inh ‘bơ̆t a-năp ih wă kơ ih mơnat dôm tơdrong yoch glăi inh păng ăn kơ inh đei tơdrong arih ling lang. Yua anăn Kră Yang Yêsu Krist, Amen!
Lu bơ̆n hăm tơjur akâu jăn bơ̆n ‘bơ̆t a-năp Kră Yang lei mă bơ̆n pơ-ang kơ dôm tơdrong mă bơ̆n đei pơm ‘lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Luka 16
Kênh Youtube BHKTHN:
