Klei Aê Diê Blŭ: Y‑Luk 2:1-7
Êlan kliăng: “Ñu kkiêng kơ sa čô anak êkei tal êlâo hĭn. Ñu hruôm gơ̆ hŏng čhiăm leh anăn bi mđih gơ̆ hlăm kniêm rơ̆k čiêm êmô biăp, kyuadah amâo mâo ôh anôk kơ diñu hlăm sang jưh.” (Y‑Luk 2:7)
Klei êmuh ksiêm mĭn: Si ƀuôn prŏng Y‑Đawit drông leh Pô Bi Mtlaih Lăn Ala kkiêng ti lăn ala? Ya ngă dŭm sang jưh amâo lŏ mâo ôh sa anôk kơ Y‑Yôsep hŏng H’Mari? Hruê anei si ai tiê Khua Yang čiăng drei drông hruê Khua Yang hriê ti lăn ala?
Krĭng Palestine dôk ti gŭ klei kiă kriê mơ̆ng mtao Rôm. Kñăm ktuê dlăng bruă rĭng jia wăt bruă lĭng kahan snăn Mtao Sêsar Ôgust mâo asăp mtrŭn ksiêm dlăng ênoh mnuih ƀuôn sang. Kyua Y‑Yôsep jing djuê ana Y‑Đawit anăn ñu ba H’Mari dôk ba tian Hđeh điêt Yêsu wĭt kơ ƀuôn Ƀetlêhem, jing ƀuôn Y‑Đawit čiăng hưn anăn diñu dua (êlan 1-5). “Êjai diñu dôk tinăn, hruê H’Mari kkiêng truh leh” (êlan 6 ). Klei anei djŏ msĕ si klei hưn êlâo mơ̆ng Khua pô hưn êlâo Y‑Mikel kơ anôk Pô Bi Mtlaih Lăn Ala srăng kkiêng (Y‑Mika 5:1-2).
Y‑Yôsep leh anăn H’Mari găn leh ktuê êlan kbưi snăk mơ̆ng Nasaret truh ti Ƀetlêhem čiăng čih anăn hlăm hră. Leh anăn tinei, H’Mari “kkiêng kơ sa čô anak êkei tal êlâo hĭn” (êlan 7a). Ƀuôn prŏng Y‑Đawit drông leh Hđeh điêt Yêsu “hlăm kniêm rơ̆k čiêm êmô biăp, kyuadah amâo mâo ôh anôk kơ diñu hlăm sang jưh” (êlan 7c). Khua Yang Pô Bi Mtlaih Yêsu arăng kkiêng leh hlăm sa war hlô mnơ̆ng hŏng čhiăm hruôm, đih hlăm kniêm rơ̆k krô. Ya ngă sang jưh amâo pioh sa anôk jưh kơ Y‑Yôsep leh anăn H’Mari? Năng ai sa kdrêč kyua Ƀetlêhem jing ƀuôn prŏng điêt bi phung tue dôk jưh lu hlăm gưl ksiêm yap ênoh mnuih ƀuôn sang; ăt năng ai kyua pô sang jưh mđing tal êlâo kơ phung dôk jưh mdrŏng sah, amâo mđing uêñ ôh kơ klei dleh dlan pô dôk ba tian; amâodah năng ai diñu amâo čiăng bi kpăk ôh tơdah H’Mari kkiêng anak hlăm sang jưh diñu mtam…
Rup kniêm rơ̆k hlăm war êmô ba kơ drei ya klei mĭn hlăm yan bi hdơr hruê Khua Yang Yêsu trŭn hriê thŭn anei? Drei pŏk ai tiê pô msĕ si kniêm rơ̆k hlăk đưm čiăng drông Khua Yang mơ̆? Kăp răng huĭdah drei dôk pŭ “kniêm rơ̆k” hlăk đưm hlăm sa anôk kdrưh kơang amâo djŏ ôh hlăm war êmô! Anăn jing klei luč liê amâo čiăng đei ôh kơ klei bi msiam, bi êdah ti êngao, klei huă mnăm, klei bi hơêč hmưi hdơ̆ng pô…ƀiădah wơr hĕ mprăp ai tiê drông Khua Yang Yêsu trŭn hriê.
Kniêm rơ̆k đưm mñă kơ drei, wăt tơdah drei knŏng jing anak mnuih điêt dhiêt ƀiădah tơdah drei pŏk ai tiê drông Khua Yang snăn Ñu srăng mơak kiă kriê. Brei drei mprăp sa ai tiê dưi bi doh klei soh, lui klei mĭn tĭng mkă, rŭng răng kơ klei hdĭp anei, mâo sa knuih hdĭp phung đăo doh jăk mơ̆ng hlăm lam sang Aê Diê truh ti êngao ala ƀuôn, čiăng kơ Khua Yang kiă kriê leh anăn hơêč hmưi êbeh dlai. Brei pŏk ai tiê drông Khua Yang trŭn hriê snăn dŭm klei hơêč hmưi leh anăn klei mkŏ mjing klă sĭt yuôm bhăn leh anăn ba lu klei mđĭ ai kơ pô, kơ hdơ̆ng drei.
Si drei pŏk ai tiê čiăng drông Khua Yang hlăm yan Noel thŭn anei?
Wah lač: Ơ Khua Yang, bi mni kơ Ih brei leh Pô Bi Mtlaih kơ anak mnuih. Ih tŭ leh klei kkiêng ti kniêm rơ̆k čiăng mtô kâo brei mprăp ai tiê drông Ih. Akâo kơ Ih mă hĕ jih klei rŭng răng hŏng klei soh, leh anăn brei kơ kâo mâo klei hdĭp mrâo, mâo Ih dôk mbĭt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 12:1-13:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
