Tơdrong Pơđơ̆k 23:6-8
“’Nĕ sa tơmam lu bơngai kret tơsen; ‘Nĕ kơ ham sa tơmam ‘băt ‘lơ̆ng đơ̆ng sư.”(Tơdrong Pơđơ̆k 23:6)
Nơ̆r jet tơchĕng pơwao:
– Pơtao Salômôn bơtho kon hơ’lơ̆p sư sa tơmam thoi yơ?
– Tơdrong răm ‘băm kơ bơngai sa tơmam bơngai kơnê̆ noh tơdrong kiơ?
– Lu bơ̆n kăl kơ tơchĕng pơwao tơdrong kiơ kơplah bơ̆n đei năm sa tơmam đơ̆ng gơ̆p hơmet ăn?
Pơtao Salômôn sư đei bơtho kon hơ’lơ̆p sư ưh kơ trŏ kơ wă sa thoi yơ, mă lei athei tơchĕng tơdrong wă drơ̆ng bơngai đei krao wơ̆n bơ̆n wă năm dah ưh? Phŏ lăm tơdrong krao wơ̆n sa tơmam ‘noh tơ’bôh kơ bơngai mă hơmrah băt sơng iŏk tơmoi păng tơƀôh kơ tơdrong buăl juăt, na sa hơdai păng bơngai mă krao wơ̆n bơ̆n noh jơ̆ minh tơdrong ‘lơ̆ng wă kơ đei jơhngơ̆m ‘mêm dih băl wă kơ juăt dih băl rai hloh. Mălei dah bơngai krao wơ̆n bơ̆n noh “đei jơhngơ̆m kơnê̆”, bơngai klak chư̆, đei tơdrong kơnhăm kơnê̆ lăm tơdrong sa tơmam noh, na bơ̆n nĕ kơ hưch ham kơ tơmam mă lăng ‘lơ̆ng ră tơ gơƀang đei hơmet na drơ̆ng sa hơdai. Nơ̆r “măt bơngai kơ nê̆” noh jơ̆ pơma gah bơngai mă kret tơsen, tơplơ̆ kơ bơngai mă hơmrah kơ tơmam (Pơđơ̆k 22:9). Bơngai mă hơmet ăn tơmam sa ‘nâu jơ̆ bơngai arih ưh kơ tơpă, gah nguaih sư pơm bơngai hơmrah mă lei gah lăm jơhngơ̆m sư jơ̆ bơngai kret tơsen dêh. ‘Bơ̆r sư pơma: “Sŏng sa nhă bĕ” mă lei lăm jơhngơ̆m sư ưh kơ tơpă wă sơng iŏk (trong 7). Sư đei “krao wơ̆n” ưh kơ tơpă. ‘Bơ̆r sư pơma wă kơ sa mă lei lăm jơhngơ̆m sư ưh kơ wă ăn kơ gơ̆p atŭt kơ tơmam sa ‘noh.
Pơtao Salômôn đei pơma tuch luch kơ bơ̆n đei sa tơ mam bơngai kơnê̆ noh, “ih gô hăk lê̆” păng hmach dêh kơ dôm nơ̆r pơma mă ih đei pơma hăm bơngai mă đei krao wơ̆n ih noh. Nơ̆r “gô hăk” lê̆ noh jơ̆ tơmam ưh kơ gơh huach lăm klak, păng ưh kơ đei ba ăn jơhngơ̆m pran kơ bơngai sa mă lei ba ăn kơ tơdrong gleh lap. Ih gô pơ’mêm jơnăr jơhngơ̆m pran năm sa hơdai hăm lu bơngai ưh kơ đei tơdrong pơyom hăm ‘mêm kơ ih tơpă. Ih gô hmach kơ ih kơ dih yua kơ đei năm hơdai hăm lu bơngai mă ưh kơ yua păng tơhiong lê̆ tơdrong ih đei.
Chăl âu chă krao wơ̆n băl sŏng sa noh jơ̆ tơdrong hmă đĕch. Phŏ kơnh tơdrong krao wơ̆n băl noh jơ̆ tơpă đơ̆ng lăm jơhngơ̆m mă lei phŏ kơnh tơdrong krao wơ̆n băl noh ưh kơ tơpă đơ̆ng lăm jơhngơ̆m mă lei đei lơ tơdrong kơnhăm băl lăm tơmam sŏng sa wă kơ đei lơi yua kơ tơdrong kiơ dơ̆ng. Thoi noh tơdrong mă ƀok pơtao Salômôn đei bơtho gah tơdrong sŏng sa noh jơ̆ tơdrong gĭt kăl dêh tơpă kơ đĭ đăng lu bơ̆n. Khul bơngai lui bơ̆n kăl kơ băt kơ bơngai mă krao wơ̆n bơ̆n sŏng sa noh sư wă tơdrong kiơ na bơ̆n gơh bơwei tơdrong lui bơ̆n păng kŭm đei lơi yua ăn kơ lu bơngai mă ưh tam mă băt lui kơ Kră Yang. ‘Bok Pôl đei bơtho thoi âu: “’Na inh tơl iĕm thoi âu: Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn ‘Bok Kei-Dei lăm tôm tơdrong ‘noh. ‘ (I Kôrintô 10:31). Mă tơdrong sŏng sa noh jơ̆ tơdrong hmă đĕch, mă lei dah ưh kơ pơ’lơ̆ng na gô ba ăn tơdrong răm tih, ưh kơ đei yua kơ akâu jăn na kŭm ba ăn tơdrong răm kơ lăm jơhngơ̆m pran. Apinh Kră Yang ‘Bok Kei-Dei tơgŭm lu bơ̆n băt kơ pơhrăm tơdrong sŏng sa na wă kơ huei kơ đơ̆ng tơdrong sŏng sa noh ba ăn tơdrong ưh kơ ‘lơ̆ng lăm tơdrong lui. ‘Nĕ kơ yua kơ tơmam sa ‘lơ̆ng ‘bơ̆t anăp na pơrăm lê̆ gah tơdrong lui bơ̆n, păng pơm kơmĭl kơ nê̆ ăn kơ lu ‘nhŏng oh bơngai lui bơ̆n lăm Kră Yang.
Ơ Kră Yang inh bơnê kơ Ih đei ba ăn kơ inh đei tơmam sŏng sa rim năr. Apinh Ih tơgŭm inh băt kơ pơ’lơ̆ng păng lăp ai lăm tơdrong sŏng sa. Mă lăm tơdrong sŏng sa apinh ih ăn kơ inh băt ư-ang kơ Ih na sŏng sa. Yua anăn Kră Yang Yêsu Krist, Amen!
Lu bơ̆n đei hiơ̆k bơngơ̆t tơdrong ư-ang kơ Kră Yang thoi yơ lăm tơdrong sŏng sa?
Đŏk Sơ̆p Hla bơar ‘Bok Kei-Dei lăm pêng sơnăm: Luka 13
Kênh Youtube BHKTHN:
