Klei Aê Diê Blŭ: Klei Mtô Mñă Klei Bhiăn 22:8
Êlan kliăng: Tơdah diih ngă sa boh sang mrâo, brei diih ngă tĭng jŭm găp sang diih, čiăng kơ diih amâo dưi bi truh klei soh hŏng êrah ti sang diih tơdah mâo sa čô mnuih lĕ mơ̆ng sang. (Klei Mtô Mñă Klei Bhiăn 22:8)
Klei êmuh ksiêm mĭn: Ya klei Aê Diê mtă brei phung ƀuôn sang Ñu ngă tơdah mdơ̆ng sa boh sang mrâo? Klei bhiăn kơ klei mdơ̆ng sang anei ya čiăng lač? Si drei yua klei hriăm anei hlăm klei hdĭp hruê anei?
Wăt tơdah klei bi blah plah mă čar Kanaan Lăn Aê Diê Ƀuăn leh anăn klei jing pô sang hlăm čar anăn jing bruă kơ êdei anăp dưn, ƀiădah mâo sa mta klei sĭt jing phung ƀuôn sang ăt srăng mâo mơh klei čiăng mdơ̆ng sang kyuadah phung ƀuôn sang srăng lar êngŭm leh anăn klei mdơ̆ng sang anăn jing klei yuôm sĭt kơ klei hdĭp. Kyuanăn, Aê Diê mtă kơ phung ƀuôn sang Ñu klei mgô̆ brei ngă tơdah mdơ̆ng sa boh sang mrâo čiăng đăm mâo klei jŭ jhat truh ôh.
Sang phung Yuđa dôk ênuk anăn mâo knŏng sa amâodah dua boh adŭ điêt, găp sang dap riap hŏng mdhă sô, tĭng dlông klia lăn lŭ bi lŭk hŏng adrăng. Arăng đĭ ti dlông găp sang hŏng sa boh êñan ti djiêô sang. Phung ƀuôn sang yua găp sang pioh ƀhu mdiê kuê, boh kroh yan bhang, leh anăn ƀhu djuh pioh kơ yan puih. Msĕ mơh, arăng khăng mdơ̆ng pưk điêt hŏng hla leh anăn adhan kyâo pioh ngă anôk pĭt hlăm yan bhang adiê hlơr. Kyuanăn tơdah amâo ngă ôh tĭng jŭm găp sang, sĭt nik srăng mâo mnuih lĕ mơ̆ng găp sang êka kjham tăp năng truh djiê mơh.
Kyuanăn klei bhiăn anei kñăm kơ klei ngă sa tĭng jŭm găp sang čiăng mkhư̆ kđăl đăm mâo klei truh ôh hlăm sang pô.
Klei bhiăn mtă kơ klei ngă tĭng jŭm găp sang brei drei ƀuh Aê Diê jing Pô uêñ mĭn čêč kdrêč kơ klei hdĭp phung ƀuôn sang Ñu. Jih jang klei bhiăn Aê Diê bi anăp kơ klei răng mgang klei êđăp ênang kơ klei hdĭp phung ƀuôn sang Ñu sơăi. Amâo djŏ Aê Diê mtă kơ phung ƀuôn sang Ñu thâo uêñ mă knŏng kơ phung riêng gah ôh ƀiădah wăt brei digơ̆ thâo răng mơh kơ klei hdĭp digơ̆ pô wăt phung hlăm gŏ sang digơ̆.
Hruê anei, drei dôk hdĭp hlăm klei dhar kreh amâo msĕ ôh hŏng klei dhar kreh čih hlăm êlan Klei Aê Diê Blŭ anei. Ƀiădah drei dưi mă yua klei Aê Diê čiăng bi hriăm drei mơ̆ng klei bhiăn anei, klei hriăm anăn jing brei drei thâo răng mgang klei hdĭp Aê Diê brei leh kơ drei, uêñ mĭn msĕ mơh kơ klei êđăp ênang kơ phung hlăm gŏ sang čiăng đăm mâo klei jhat truh ôh. Si tô hmô dŭm thŭn leh êgao, mâo lu klei pui ƀơ̆ng sang hlăm ƀuôn amâodah hlăm anôk sang mbĭt mâo lu mnuih djiê leh anăn bi luh liê lu dŏ ngăn. Ti anăp klei truh anei, brei drei hriăm êlan hdră mgang kơ pui ƀơ̆ng, mprăp jih jang mnơ̆ng kăp truih pui hlăm sang čiăng dưi truih mtam tơdah pui ƀơ̆ng ñhăr. Khăp bĕ kơ klei hdĭp Aê Diê brei leh kơ drei leh anăn hdĭp mâo boh tŭ dưn kơ Ñu wăt kơ boh gŏ msĕ mơh.
Si drei thâo kơ Pô Aê Diê jing mơ̆ng êlan Klei Aê Diê Blŭ hruê anei?
Wah lač: Ơ Aê Diê, Pô hrih mjing leh kâo leh anăn răng mgang nanao klei hdĭp kâo hlăm kngan Ih pô. Đru kâo thâo khăp kơ klei hdĭp Ih brei leh anăn hdĭp mâo boh tŭ dưn kơ Ih nanao.
Dlăng Klei Aê Diê Blŭ hlăm tlâo thŭn: Y-Luk 1:1-38
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
