Daniyees 10:4-21
Nqe cim:
“Rau qhov tsis yog peb tawm tsam neeg, tiamsis yog peb tawm tsam tej dab uas nyob saum nruab ntug, tsis hais cov thawj, tej uas muaj fwjchim loj thiab tej uas muaj fwjchim kav tiam tsaus ntuj” (Efexus 6:12).
Lus nug rau sawvdaws xav:
- Tus Tswv ua rau Daniyees pom dabtsi?
- Vim li cas tus Tswv thiaj theem tsis tau teb Daniyees tej lus?
- “Tus timtswv zov tebchaws Pawxias” hauv nqe 13a yog leejtwg uas tau tawm tsam Daniyees?
- Zaj xwm hauv ntu Vajlukub hnub no txhawb peb lub zog li cas txog kev ua rog ntawm sab ntsujplig?
Thaum tus cev Vajtswv lus Daniyees nyob ntawm ntus dej Tikis, tus Tswv ib tug timtswv los qhia Daniyees hais tias: “Kuv los qhia koj paub tej uas yuav muaj tshwm los yav tom ntej, thiab yuav los raug koj haiv neeg” (nqe 14). Daniyees nyuaj siab tsis noj haus tau peb lub limtiam vim tsis totaub tej yam nws ua yogtoog pom, ces tus timtswv zov tebchaws Pawxias kuj tawmtsam tus timtswv los cuag Daniyees tau peb lub limtiam ib yam nkaus. “Tus timtswv zov tebchaws Pawxias” yog leejtwg nws ho tawmtsam Vajtswv tus timtswv li ntawd? Tus timtswv zov lub tebchaws Pawxias yog hais txog tus timtswv phem uas koom nrog cov thawjcoj hauv lub tebchaws Pawxias ua tej haujlwm uas tawmtsam Vajtswv tes haujlwm. Thaum Daniyees yoo mov thov Vajtswv ces saum nruab ntug kuj muaj pluav rog nyob saud. Thaum Vajtswv xav qhia rau Daniyees paub txog tej yam uas yuav muaj los yam tom ntej tuaj raug Nws haiv neeg ces cov timtswv phem yeej ua puas tsav yam haujlwm los tav tsis pub Daniyees paub txog yam Vajtswv xav qhia.
Tiamsis muaj ob yam uas hais tshwm hauv ntu Vajluskub ua rau peb tso siab tau rau Vajtswv. Tim ib, Cov uas tawmtsam Vajtswv, nws tsuas ua tabkaum Vajtswv tes haujlwm xwb, tsis tav tau tes haujlwm ntawd muaj tiav (nqe 13). Tim ob, tus timtswv Mikhayees uas yog cov timtswv tus thawj yuav pab tawmtsam tsis pub cov timtswv phem ua ib yam dabtsi tav tau Vajtswv tes haujlwm. Mikhayees suav tau yog tus timtswv uas pab Vajtswv haiv neeg tawm tsam tej uas muaj fwjchim saum nruab ntug (Yudas 9; Daniyees 12:1; Tshwmsim 12:7-9).
Dab Ntxwgnyoog nrhiav kev ua puas tsav yam tav cov ntseeg Yexus txhob paub txog Vajtswv dej siab, txhob ua neej raws li Vajtswv siab nyiam thiab txhob ua Vajtswv tes haujlwm. Ua Vajtswv tsaug, thaum peb txiav txim siab ua lub neej pub rau tus Tswv ces, Vajtswv yuav txib Nws cov timtswv los pab peb txhua lub sijhawm. Hauv Efexus 6:12 qhia peb hais tias: “Rau qhov tsis yog peb tawm tsam neeg, tiamsis yog peb tawm tsam tej dab uas nyob saum nruab ntug, tsis hais cov thawj, tej uas muaj fwjchim loj thiab tej uas muaj fwjchim kav tiam tsaus ntuj.” Pluav rog sab ntsujplig tsis yog ua rog nrog tibneeg tiamsis ua rog nrog tej uas muaj fwjchim saum nruab ntug, yog peb siv peb lub dag zog yuav kov tsis yeej tej ntawd kiag li. Yog li ntawd, peb yuav tsum nco ntsoo ua raws li Vajtswv Txojlus qhia hais tias: “Nej yuav tsum nrog tus Tswv sib raug zoo….muab tej cuabyeej uas Vajtswv pub rau nej lawm los hnav…” mus ua rog rau sab ntsujplig (Efexus 6:10-20).
Thov Vajtswv,
Tus Tswv, ua Koj tsaug uas nyuam yaus tau kawm txog pluav rog hauv sab ntsujplig, yuav kovyeej ces yog los ntawm Vaj Ntsujplig ua tus pab. Thov pab kom nyuam yaus paub los vam khom Vaj Ntsujplig thiab niaj hnub hnav tej cuab yeej uas Koj pub los tawmtsam kom yeej Dab Ntxwjnyoog. Amees.
Peb tab tom tsawg yam cuab yeej twg thaum ua rog ntawm sab ntsujplg?
Nyeem Vajluskub hauv peb lub xyoo: Yelemis 4:5-31
Kênh Youtube BHKTHN:
