Klei Aê Diê Blŭ: Y‑Đaniel 10:4-21
Êlan kliăng: “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.” (Êphêsô 6:12)
Klei êmuh ksiêm mĭn: Ya klei Khua Yang bi êdah kơ khua pô hưn êlâo Y‑Đaniel? Ya ngă klei Khua Yang wĭt lač kơ ñu lŏ bi kdung hĕ? Hlei jing “khua ƀuôn ala mtao Persơ” hlăm êlan 13a, bi kgăn hĕ dĭng buăl jăk ba klei Aê Diê wĭt lač kơ khua pô hưn êlâo Y‑Đaniel? Klei yăl dliê hruê anei bi mđĭ ai drei kơ ya mta klei hlăm klei bi blah myang drei hlăk dôk tlă anăp?
Tơdah khua pô hưn êlâo Y‑Đaniel êjai dôk ti hang êa krông prŏng Hiđêkel, mâo sa čô dĭng buăl jăk Aê Diê hriê kơ ñu čiăng đru ñu “thâo săng klei srăng truh kơ phung ƀuôn sang ih hlăm ênuk knhal tuč” (êlan 14). Tơdah khua pô hưn êlâo Y‑Đaniel bi blah hŏng klei kăm yua đa mta mnơ̆ng ƀơ̆ng hlăm tlâo hruê kăm, snăn dĭng buăl jăk anei dôk găn klei “khua ƀuôn ala mtao Persơ” bi kdơ̆ng hŏng gơ̆ djŏ trip hlăm dua pluh sa hruê (tlâo hruê kăm) mơh, hlăk gơ̆ hriê čiăng ba klei Aê Diê bi êdah kơ khua pô hưn êlâo Y‑Đaniel. “Khua ƀuôn ala mtao Persơ” hlei ñu jing ƀiădah bi kgăn hĕ dĭng buăl jăk anei? Hlei ñu jing tơl dĭng buăl jăk anei lŏ wĭt “bi blah hŏng ñu”? Mâo hră mblang anăn pia anei hlăm êlan 13a leh anăn 20 jing “khua phung mtao čar Persơ”, mdê hŏng “mtao čar Persơ” hlăm êlan 1 leh anăn êlan 13b. Kyuanăn, anei jing anăn pia pioh kơ phung dĭng buăl jhat ƀai bi mguôp ai hŏng čar Pesơ leh anăn phung bi kdơ̆ng hŏng hdră bruă Aê Diê. Tơdah khua pô hưn êlâo Y‑Đaniel bi blah hŏng klei kăm yua đa mta mnơ̆ng ƀơ̆ng leh anăn wah lač ti lăn, êjai anăn hlăm adiê ăt mâo klei bi blah mơh. Tơdah Khua Yang čiăng kơ khua pô hưn êlâo Y‑Đaniel thâo săng klei yuôm bhăn hlăm hdră bruă Ñu pioh kơ phung ƀuôn sang Ñu snăn phung roh čiăng bi kgăn ñu mă tŭ klei thâo săng anăn.
Ƀiădah lĕ, mâo dua mta hlăm trăn Klei Aê Diê Blŭ anei đru drei đăo kjăp. Tal sa, pô bi kdơ̆ng anei knŏng dưi bi kdung klei Khua Yang čiăng ƀiădah amâo dưi bi kgăn ôh (êlan 13). Tal dua, dĭng buăl jăk Y‑Mikel, “mtao” (êlan 21) amâodah “dĭng buăl jăk” drei (êlan 21) đru leh, čiăng kơ pô bi kdơ̆ng anei amâo dưi bi kgăn ôh klei bi êdah klei Aê Diê čiăng. Y‑Mikel jing sa čô dĭng buăl jăk mâo bruă klam kăp răng mgang phung ƀuôn sang Aê Diê bi kdơ̆ng hŏng phung khua klei mmăt (Y‑Yut 9; Y‑Đaniel 12:1; Klei Bi Êdah 12:7-9).
Yang jhat duah nanao djăp êlan čiăng bi kgăn phung đăo thâo săng, hdĭp leh anăn gưt ngă tui si hdră bruă, klei Khua Yang čiăng. Bi mni lač jăk kơ Aê Diê, tơdah drei čuăn hdĭp kơ Khua Yang snăn Ñu tiŏ nao dĭng buăl jăk Ñu kăp răng mgang drei. Êphêsô 6:12 mñă snei: “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.” Klei bi blah drei hŏng phung drei amâo thâo ƀuh amâo dưi hĭn ôh hŏng ai ktang mnuih. Kyuanăn, brei drei “hơô jih jang mnơ̆ng yua bi blah” mơ̆ng Aê Diê brei čiăng dưi bi blah (Êphêsô 6:10-20).
Ya mta mnơ̆ng yua bi blah drei ăt dôk kƀah čiăng mŭt hlăm klei bi blah myang?
Wah lač: Ơ Khua Yang, bi mni lač jăk kơ Ih mñă leh kâo klei bi blah myang knŏng dưi hĭn tơdah knang kơ Yang Mngăt Jăk. Akâo Khua Yang đru kâo amâo bi blah hjăn pô ôh ƀiădah thâo hơô jih jang mnơ̆ng yua bi blah Aê Diê brei čiăng dưi bi kdơ̆ng hŏng mnêč jhat yang jhat.
Dlăng Klei Aê Diê Blŭ hlăm tlâo thŭn: Y‑Yêrêmi 4:5-31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
