Lukas 3:21-22; 4:1-2
Nqe cim:
“Tom qab uas sawvdaws ua kevcai raus dej tas lawm, Yexus ua kevcai raus dej thiab. Thaum Yexus tabtom thov Vajtswv, rooj ntug txawm qhib plho.” (Lukas 3:21)
Lus nug rau sawvdaws xav:
– Tswv Yexus ua dabtsi ua ntej thaum Nws yuav pib ua haujlwm?
– Vim li cas Vaj Ntsujplig coj Nws mus tom roob moj sab qhua?
– Yam dabtsi qhia paub thov Vajtswv yog qhov uas cheemtsum nyob hauv peb lub neej?
Thov Vajtswv yog ib feem cheemtsum heev nyob hauv Tswv Yexus lub neej thaum tseem nyob hauv ntiajteb no. Nws ib ke yog tus neeg thov Vajtswv ib ke yog tus qauv thov Vajtswv. Nws pib ua haujlwm thiab xaus haujlwm los ntawm kev thov Vajtswv (Lukas 3:21; 23:46).
Lukas 3:21-22 qhia paub Tswv Yexus tes haujlwm tau pib los ntawm kev thov Vajtswv. Thaum pib mus ua haujlwm, Tswv Yexus mus cuag Yauhas Npatitus kom Yauhas muab Nws ua kevcai raus dej (nqe 21; Mathais 3:13-15). Nov yog qhov uas tus Tswv los koom nrog cov neeg uas Nws yuav txhiv cawm, tsis yog tias Nws yog neeg txhaum cheemtsum lees txim. Tswv Yexus tau thov Leej Txiv ua ntej thaum Nws ua kevcai raus dej kom qhia tshwm Nws lub siab ua raws li Leej Txiv siab nyiam. Thaum “Yexus tabtom thov Vajtswv, rooj ntug txawm qhib plho” (nqe 21). Qhov no txhais tau tias Vajtswv lees yuav qhov uas Tswv Yexus yuav tuag txhiv neeg ntiajteb kev txhaum thiab vamkhom Nws neeg thiab Vajtswv rov los sib txuas tau. Thaum rooj ntug qhib plho, “Vaj Ntsujplig tus Dawbhuv uas muaj lub cev zoo li tus nquab los rau saum Yexus.” Nov yog lub homthawj nrog rau cov lus hais khov kho saum ntuj tuaj hais tias Tswv Yexus yog“…kuv tus Tub uas kuv hlub, kuv txaus siab rau koj.” (nqe 22).
Hauv Lukas 4:1-2, tus uas sau Phau Lukas hais tias Vaj Ntsujplig coj Yexus mus rau tom roob moj sab qhua, dab ntxwgnyoog sim Yexus siab. Ua ntej ntawd, tus Tswv ua kevcai yoo mov thov Vajtswv tau plaub caug hnub plaub caug hmo. Tswv Yexus pib ua haujlwm los ntawm qhov uas Nws siv sijhawm ntsiag to tom roob moj sab qhua yoo mov thiab thov Vajtswv, ua raws li Leej Txiv lub siab nyiam. Vim li no, tus Tswv raug sim siab los Nws yeej khov kho thiab muaj yeej. Tsis muaj ib qhov pib twg uas yuav zoo npaum qhov uas thov Vajtswv pab txhua yam hauv lub neej!
Yog tus ntseeg Yexus, peb paub tias thov Vajtswv yog yam cheemtsum. Tiamsis tu siab ntau uas muaj ntau leej txoj kev thov Vajtswv dhau zuj zus los ua lub nra ntxiv rau kev ua neej xwb. Peb pheej liam txim rau txojkev khwv hauv lub neej, haujlwm, tsevneeg thiab menyuam. Tiamsis yog peb tsis siv sijhawm tshwjxeeb ntsiag to los nrog tus Tswv txuas lus ces tej kev khwv ntawd yuav noj tagnrho peb lub sijhawm, ua rau peb tsuas thov Vajtswv thaum pw, sawv thiab noj mov lawm xwb!!
Kev thov Vajtswv tsis yog lub plag rau Tswv Yexus pib ua haujlwm xwb, tiamsis tseem pheej ua ntxiv thiab nrog Leej Txiv sib txuas mus xaus Tswv Yexus kev ua haujlwm. Qhov uas siv sijhawm los cuag Leej Txiv hauv kev thov Vajtswv thaum peb ua haujlwm yog ib qhov tseemceeb. Txhua yam pib ua yuav ua tau zoo heev yog peb pib los ntawm kev thov Vajtswv tas siab.
Thov Vajtswv,
Tus Tswv, thov Koj qhia kom nyuam yaus tsis txhob muab tej kev khwv los cuam tshuam kev thov Vajtswv. Thov Vaj Ntsujplig coj qhia nyuam yaus paub los cuag Koj ua ntej ntawm kev thov Vajtswv thaum yuav ua txhua yam haujlwm hauv lub neej. Tuav Tswv Yexus Khetos lub npe thov, Amees.
Peb puas pib hnub tshiab lossis pib ua haujlwm los ntawm kev thov Vajtswv?
Nyeem Vajluskub hauv peb lub xyoo: Phau Ntawv Nkauj 38-39
Kênh Youtube BHKTHN:
