Klei Aê Diê Blŭ: Y‑Luk 3:21-22; 4:1-2
Êlan kliăng: “Tơdah leh jih jang mnuih tŭ klei ƀaptem, wăt Yêsu mơh tŭ klei ƀaptem. Êjai Yêsu wah lač, adiê pŏk mdah” (Y‑Luk 3:21)
Klei êmuh ksiêm mĭn: Ya klei Khua Yang Yêsu ngă êlâo kơ kčưm dơ̆ng hlăm bruă ngă? Ya ngă Yang Mngăt Jăk atăt ba ñu hlăm kdrăn tač? Ya mta brei ƀuh, wah lač jing yuôm hlăm klei hdĭp diih?
Wah lač jing sa kdrêč yuôm hlăm klei hdĭp Khua Yang Yêsu êjai ti lăn ala. Ñu jing mnuih wah lač wăt jing pô bi hmô tơl hnơ̆ng hlăm klei wah lač. Bruă ngă Ñu kčưm dơ̆ng hŏng klei wah lač leh anăn bi ruê̆ hŏng klei wah lač (Y‑Luk 3:21; 23:46).
Y‑Luk 3:21-22 brei ƀuh bruă ngă Khua Yang Yêsu kčưm dơ̆ng hŏng klei wah lač. Čiăng phŭn dơ̆ng bruă ngă ti lăn ala, ñu nao kơ Y‑Yôhan pô ngă ƀaptem čiăng tŭ klei ƀaptem (êlan 21; Y‑Mathiơ 3:13-15). Anei jing hdră êlan Khua Yang bi msĕ Ñu pô hŏng phung Ñu srăng bi tui, amâo djŏ ôh Ñu jing mnuih soh čiăng kmhal kơ klei soh. Khua Yang Yêsu wah lač hŏng Aê Diê Ama êlâo kơ tŭ klei ƀaptem čiăng bi êdah ai tiê đup gưt klei Ama čiăng. “Êjai Yêsu wah lač adiê pŏk mdah” (êlan 21). Klei anei čiăng mblang Aê Diê tŭ ư Khua Yang Yêsu srăng tŭ klei djiê hrô brei klei soh phung mnuih leh anăn hŏng Ñu yơh, adiê leh anăn lăn ala lŏ bi mguôp. Tơdah adiê pŏk mdah, “Yang Mngăt Jăk trŭn ti dlông Ñu msĕ si asei mlei sa drei mgăm”. Anei jing klei kđăm mbĭt hŏng asăp blŭ mơ̆ng adiê lač Khua Yang Yêsu pô yơh “Ih jing Anak Kâo khăp êdimi; hlăm Ih Kâo mâo klei mơak snăk” (êlan 22).
Hlăm Y‑Luk 4:1-2, pô čih hră Y‑Luk čih Yang Mngăt Jăk atăt ba Khua Yang Yêsu hlăm kdrăn tač čiăng tŭ klei mplư. Êlâo kơnăn, Khua Yang wah lač kăm ƀơ̆ng huă hlăm pă pluh hruê pă pluh mlam. Khua Yang kčưm dơ̆ng ngă bruă hŏng klei pioh hruê mmông dôk hjăn hlăm kdrăn tač čiăng wah lač kăm ƀơ̆ng huă leh anăn wah lač čiăng tui duah klei ktrâo atăt mơ̆ng Aê Diê Ama. Kyuanăn, Ñu tlă anăp leh hŏng klei mplư hŏng klei ktang leh anăn dưi hĭn, wăt tơdah asei mlei kđeh êpa êmăn dưn. Amâo mâo ôh klei kčưm dơ̆ng mkăn jing jăk hĭn kơ klei wah lač kơ djăp mta klei hlăm klei hdĭp!
Jing sa čô pô đăo kơ Krist, drei thâo klei wah lač jing yuôm. Ƀiădah ênguôt êdi kơ lu mnuih tơdah klei wah lač ƀrư̆ ƀrư̆ knŏng jing klei lŏ thiăm hlăm klei hdĭp. Drei khăng čhal kyua lu klei gun kpăk hlăm klei hdĭp, bruă mă, gŏ sang leh anăn phung anak. Ƀiădah tơdah drei amâo pioh ôh êlâo hĭn mnĭt mmông dôk kriêp hjăn bi mguôp hŏng Khua Yang snăn jih jang klei gun kpăk srăng plah mă jih hruê mmông drei, tơl knŏng hmao wah lač mă dua tlâo boh êlâo kơ pĭt amâodah êlâo kơ huă ƀơ̆ng!
Klei wah lač amâo djŏ knŏng jing atur kčưm dơ̆ng kơ bruă mă Khua Yang Yêsu ôh, ƀiădah jing klei ngă nanao leh anăn bi mguôp Ñu hŏng Ama hlăm adiê ktuê jih bruă mă Ñu. Bruă drei pioh mnĭt mmông nao kơ Ama hlăm klei wah lač êjai drei dôk mă bruă kơ Ñu hlăm djăp mta bruă ngă, amâodah jih jang ya mta klei drei ngă hlăm klei hdĭp jing bruă yuôm snăk. Jih jang klei kčưm dơ̆ng srăng jăk siam tơdah drei phŭn dơ̆ng hŏng klei wah lač sĭt kpă.
Si ngă drei kčưm dơ̆ng hruê mrâo amâodah bruă mrâo hŏng klei wah lač mơ̆?
Wah lač: Ơ Khua Yang, brei kâo đăm lui kyua lu bruă ngă bi kpăk klei wah lač ôh. Akâo Yang Mngăt Jăk mñă kâo nao kơ Khua Yang êlâo hĭn hlăm klei wah lač tơdah kčưm dơ̆ng ngă ya mta bruă hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 38-39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
