Klei Aê Diê Blŭ: Y-Mathiơ 16:15-20
Êlan kliăng: “…Ti dlông boh tâo anei kâo srăng mdơ̆ng Phung Sang Aê Diê kâo, leh anăn ƀăng jang Ƀuôn Phung Djiê amâo srăng dưi hŏng ñu ôh” (Y-Mathiơ 16:18b)
Klei êmuh ksiêm mĭn: Tơdah Khua ƀĭng kna Y-Pêtrôs lač Khua Yang Yêsu jing Anak Aê Diê hdĭp, ya klei Khua Yang bi êdah kơ Phung Sang Aê Diê? Kơ hlei pô Khua Yang Yêsu jao kliăng Ƀuôn Ala Mtao Adiê? Ya pioh ngă? Si drei mguôp hŏng Phung Sang Aê Diê leh hriăm klei hriăm anei?
Leh Khua ƀĭng kna Y-Pêtrôs, jing khua ƀĭng kna pral kdal hĭn, bi ala kơ phung ƀĭng kna hưn Khua Yang Yêsu jing Anak Aê Diê hdĭp, Khua Yang Yêsu bi êdah kơ ñu leh anăn phung ƀĭng kna thâo kơ ênoh yuôm Phung Sang Aê Diê, êdei anăp kơ Phung Sang Aê Diê leh anăn klei dưi phung dưi dôk hlăm Phung Sang Aê Diê.
Kơ ênoh yuôm, Sang Aê Diê dưi mkŏ mjing mơ̆ng Boh Tâo jing Khua Yang Yêsu Krist, Khua ƀĭng kna Y-Pêtrôs bi mklă leh klei anei hlăm hră I Y-Pêtrôs 2:4-6, Khua Yang Yêsu jing Boh Tâo hdĭp leh anăn boh tâo kiêng. Hlăm hră Êphêsô 2:21-22, Khua ƀĭng kna Y-Pôl ăt bi mklă Khua Yang Yêsu jing boh tâo phŭn ti kiêng leh anăn jih boh sang dưi mdơ̆ng ti dlông Boh Tâo anăn. Kơ êdei anăp Phung Sang Aê Diê, Khua Yang Yêsu bi mklă klei ktang mơ̆ng Phung Sang Aê Diê leh anăn Ñu hưn êlâo snei: “ƀăng jang Ƀuôn Phung Djiê amâo srăng dưi hŏng ñu ôh” (êlan 18b). Khua Yang brei thâo Phung Sang Aê Diê srăng tŭ klei arăng ngă jhat ktang snăk, tuôm hŏng klei dleh dlan, ƀiădah klei dưi hĭn kluôm ênŭm srăng jing kơ Phung Sang Aê Diê. Kơ klei dưi phung hlăm Phung Sang Aê Diê, Khua Yang jao leh kliăng Ƀuôn Ala Mtao Adiê kơ Khua ƀĭng kna Y-Pêtrôs, bi ala kơ phung ƀĭng kna, leh anăn ñu hŏng phung ƀĭng kna srăng yua kliăng anei čiăng pŏk klei găl kơ lu mnuih kmhal klei soh, mŭt hlăm Ƀuôn Ala Mtao guh kơang. Klei yuôm bhăn mơ̆ng “kă…kleh…” jing klei dưi Khua Yang brei čiăng hưn mdah phung mâo klei soh amâo kmhal srăng amâo dưi mŭt ôh hlăm Ƀuôn Ala Mtao Adiê, knŏng hlei phung đăo tŭ mă hdră msir bi tui klei soh mơ̆ng Khua Yang Yêsu Pô Bi Mtlaih dưi mŭt hlăm Ƀuôn Ala Mtao.
Phung anak ƀuôn sang Aê Diê hruê anei brei thâo kral ênoh yuôm Phung Sang Aê Diê tơdah thâo Khua Yang bi tui leh Phung Sang Aê Diê hŏng ênoh yuôm snăk jing êrah Ñu Pô (Bruă Phung Khua Ƀĭng Kna 20:28). Dưi mâo klei pap jing sa čô hlăm Phung Sang Aê Diê, brei drei hdơr knga kơ Khua Yang, khăp kơ Phung Sang Aê Diê leh anăn ngă klei jăk hĭn kơ Phung Sang Aê Diê. Brei drei thâo kơ êdei anăp Phung Sang Aê Diê srăng dưi hĭn kluôm ênŭm čiăng đăm êdu ai, huĭ hyưt ôh tơdah tlă anăp hŏng klei lông dlăng, dleh dlan, arăng ngă jhat ară anei. Mklăk wĭt, drei kjăp ktang hĭn, knang kơ Khua Yang lu hĭn hlăk êjai dleh dlan, rŭng răng. Brei drei thâo kơ klei dưi Khua Yang brei kơ pô, drei amâo mâo klei dưi čuăn ôh hlei dưi mâo klei bi mtlaih, hlei amâo mâo klei bi mtlaih ƀiădah brei drei jih ai tiê hiu hưn Klei Mrâo Mrang Jăk čiăng mâo lu mnuih hmư̆ leh anăn tơdah mâo Yang Mngăt Jăk mtrang mngač, digơ̆ srăng kmhal klei soh leh anăn đăo kơ klei bi tui mơ̆ng Khua Yang Yêsu Pô Bi Mtlaih.
Drei dôk ngă jih ai tiê čiăng đru mkŏ mjing leh anăn mđĭ kyar Phung Sang Aê Diê hlăm bruă klam jing pô hiu hưn klei sĭt mơ̆?
Wah lač: Ơ Khua Yang jing Pô khăp leh kơ kâo, brei leh kâo jing sa čô hlăm Phung Sang Aê Diê, akâo kơ Ih đru kâo khăp nanao kơ Khua Yang leh anăn khăp kơ Phung Sang Aê Diê, myơr jih ai ktang klei hdĭp kâo čiăng kơ kâo đru mkŏ mjing mđĭ kyar Phung Sang Aê Diê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
