II Pêtrôs 2:3-10
“Thoi noh bơ̆n băt nhên boih, ‘Bok Kei-Dei băt, gơh pơklaih dôm lu bơngai kơkuh kơ Sư đơ̆ng tơdrong pơmat-tat;…” (II Pêtrôs 2:9a)
Nơ̆r jet tơchĕng pơwao:
– Pêtrôs jơ̆ng ‘bang Kră Yang đei roi ‘bar tơdrong dŏng pơklaih ayơ?
– Lu bơngai mă Kră Yang dŏng pơklaih noh yua kơ tơdrong arih lu sư thoi yơ?
– Bơ̆n tơwih thoi yơ kơplah bơ̆n băt kơnăl kơ Kră Yang ‘mêm, mơnat ăn đĕch kơ bơ̆n?
Lăm ‘bai pơhrăm adrol ‘noh, bơ̆n băt kơnăl kơ jơhngơ̆m ‘Bok Kei-Dei tơpăt hơnơ̆ng, ‘lơ̆ng rơgoh ‘bơ̆t Sư phak lu bơngai mă ưh kơ chu yom kơ Nơ̆r Sư. Năr ‘nâu bơ̆n kư̆m băt kơnăl kơ jơhngơ̆m Kră Yang ‘mêm mơnat tih dêh ‘bơ̆t Sư dŏng pơklaih lu bơngai mă oei lăm Sư, mă khan phŏ ‘bơ̆t yơ kơnh lu đe ei đei tơdrong rơdu rơmơ̆n, arih oei glăi hăm Nơ̆r Sư mơ̆n ră.
Mă minh, Kră Yang dŏng pơklaih ‘bok Nôê păng hnam dơnŏ sư (trong 5). Đĭ-đăng kon bơngai tơ ala teh âu sơ̆, lăm noh đei lơ bơngai tih kơjung…. lu bơngai nuih kơtang,lu bơngai mă đe ư hơnhang ang hơnhông (Blŭng A 6:4, kơplah noh ‘Bok Kei-Dei bơwei Nôê thây bơtho tơdrong tơpăt noh păng tơpơh ‘nu hnam dơnŏ sư noh đĕch. Kră Yang bơwei bơih minh pôm hnam dơnŏ bơngai hmă đĕch, Kră Yang achăng tŭk lê̆ lu bơngai tơpôl lơ to noh kiơ̆ kơ măt bơngai bơ̆n lăng nhen thoi lu sư dêh,nhen thoi pran kơtang.Mă gah Nôê noh, phŏ đei lơ bơngai khan Kră Yang dŏng pơklaih sư yua kơ sư arih đei đon ‘lơ̆ng tơpăt hloh kơ đe nai “Nôê lăm chăl arih sư jơ̆ minh ‘nu bơngai ‘lơ̆ng tơpăt, ưh kơ đei tơdrong glăi kiơ, sư kiơ̆ Kră Yang ‘Bok Kei-Dei.” (Blŭng 6:9), sư kư̆m thây bơtho tơdrong tơpăt (trong 5). Mă-lei adrol kơ tơlĕch nơ̆r bơnê pơư kơ Nôê noh Hla bơar‘Bok Kei-Dei đei tơbăt thoi âu “…Nôê đei pŭn ‘bơ̆t anăp Kră Yang (Blŭng A 6:8). Wă khan Nôê bơngai đei Kră Yang mơnat, Kră Yang rơih iŏk sư, Kră Yang ăn kơ sư băt Kră Yang, chăl arih sư jê̆ tơtil, lui yom, kơkuh kơ Kră Yang, tơdrong arih sư thoi noh ‘noh bơih tơwih ‘lơ̆ng kơ tơdrong Kră Yang mơnat kơ sư noh.
Mă ‘bar, Kră Yang dŏng pơklaih ‘bok Lot (trong 7). ’Bok Pêtrôs khan: “Pơlei noh ‘Bok Kei-Dei pơklaih pôm ‘bok Lot, yua kơ ‘bok Lot bơngai ‘lơ̆ng tơpăt;” Anat dêh wă jô̆ khan ‘bok Lot bơngai ‘lơ̆ng tơpăt yua kơ đơ̆ng dôm tơdrong sư pơm.Tơdrong ‘bok Lot pơm trŏ kơ bơnê pơư lăp minh tơdrong đĕch noh sư băt mơ̆ng păng lui kơ nơ̆r linh jang‘lơ̆ng tơbăt wă kơ kơchăng. Kư̆m lei-lăi thoi ‘bok Abraham, ’bok Lot ‘nâu ‘Bok Kei-Dei lăng sư ‘lơ̆ng tơpăt yua kơ sư lui kơ ‘Bok Kei-Dei, ưh kơ lăng sư ‘lơ̆ng tơpăt yua kơ đơ̆ng sư pơm ‘lơ̆ng ôh. Đơ̆ng tơdrong ‘lơ̆ng tơpăt Kră Yang noh jô̆ ‘bok Lot ‘lơ̆ng yua kơ sư lui. ‘Bok Pêtrôs kư̆m tơ’bôh kơ bơ̆n ‘bok Lot ưh kơ pơm,kư̆m ưh kơ chhôk ôh tơdrong kon pơlei pơla pơm kơnê̆ ‘mê̆, drŏ-nglo tơngôi tơduă drŏ-nglo, drŏ-kăn tơngôi tơduă drŏ-kăn, mă loi ‘bok Lot sư ưh kơ hiôk, sư sơ’ngon jĭ jơhngơ̆m kơplah sư ‘bôh tơdrong yoch lanh jơ̆p jang. Mă khan lei ră, tuch luch sư, chăl arih ‘bok Lot ‘nâu minh chăl arih mă ưh kơ đei yua kiơ, hnam dơnŏ ưh kơ jing, adrĕch adrung krung ioi Kră Yang hiap pơtê̆.
‘Bok Nôê, Kră Yang rơih iŏk sư, sư arih hơdai hăm lơ kon bơngai ala teh mă pơm yoch blah Kră Yang, mă-lei Nôê pơm kiơ̆ kơ Nơ̆r Kră Yang bơtho khan. Na ‘bok Lot ‘nâu minh ‘nu bơngai rơdu tơrăn đĕch mơ̆n năm oei tŏk-bŏk kon pơlei pơla tơring tơrang mă arih kơnê̆ ‘mê̆, arih năm tơ jruh, năm tơ răm, prôch tôch hiong. Mă khan lei ră, lăm tơdrong mơnat Kră Yang ăn đĕch noh, bre sư, Kră Yang pơklaih ngăl yua kơ bre sư noh bơngai mă Kră Yang tơgŭm mơnat, Kră Yang dan tơdrong ‘lơ̆ng tơpăt Sư tơ lăm tơdrong arih bre sư noh. ’Bok Kei-Dei Sư Tơngla ‘lơ̆ng tơpăt, mă-lei Sư kư̆m tơ’ngla ‘mêm mơnat. Mưh băt kơnăl kơ tơdrong ‘mêm mơnat Kră Yang tih dêh lei bơ̆n kư̆ kơ đĭ jơhngơ̆m hŏk pơhrăm Nơ̆r Kră Yang păng arih kiơ̆ thoi dôm tơdrong Kră Yang đei bơtho khan lăm Nơ̆r Sư mă khan jum dăr kơ bơ̆n đei tơdrong kiơ, thoi yơ ră.
Ơ Kră Yang, inh bơnê kơ Ih, yua kơ tơdrong Ih mơnat ăn đĕch kơ inh, tơdrong Ih pơklaih inh noh kơjăp ling-lang ưh kơ hiong tôch. Apinh Ih tơgŭm inh rim năr tơnăp kơjăp hăm Ih, pơm kiơ̆ Nơ̆r Ih. Inh krao khan yua anăn Kră Yang Yêsu Krist, Amen!
Bơ̆n hăm băt kơnăl kơ jơhngơ̆m Kră Yang ‘mêm mơnat tih ‘bơ̆t Sư phak lu bơngai yoch păng bơwei lu bơngai mă lui kơkuh kơ Sư noh ưh?
Đŏk Sơ̆p hla bơar ‘Bok Kei-Dei lăm pêng sơnăm: Nêhêmi 6.
Kênh Youtube BHKTHN:
