Klei Aê Diê Blŭ: Klei Mtô Mñă Klei Bhiăn 5:16
Êlan kliăng: “Mpŭ bĕ kơ ama amĭ ih, tui si Yêhôwa Aê Diê ih mtă leh kơ ih, čiăng kơ ih dưi dôk hdĭp sui hĭn, leh anăn klei jăk dưi truh kơ ih hlăm čar Yêhôwa Aê Diê ih brei kơ ih” (Klei Mtô Mñă Klei Bhiăn 5:16)
Klei êmuh ksiêm mĭn: Si Klei Aê Diê Blŭ mtă brei phung anak ngă hŏng amĭ ama? Ya drei srăng ngă tơdah amĭ anâodah ama ngă klei bi êka kơ drei? Ya ngă brei drei wah lač hĕ kơ amĭ ama?
Klei đăo kơ Yêsu Krist dưm klei mpŭ jing tal êlâo hĭn hlăm klei bi mguôp hdơ̆ng mnuih. Pluh Mta Klei Bhiăn Aê Diê brei kơ anak mnuih atur kơ klei kpă ênô leh anăn klei dôk dơ̆ng ƀơ̆ng huă hlăm klei hdĭp. Klei bhiăn “mpŭ bĕ kơ amĭ ama ih” knŏng dưm ti tluôn pă mta klei bhiăn djŏ kơ bruă anak mnuih ngă hŏng Aê Diê, leh anăn anei jing klei bhiăn tal êlâo hĭn kơ klei bhiăn hdĭp mnuih hdơ̆ng mnuih.
Mpŭ kơ amĭ ama jing brei phung anak thâo mpŭ kơ amĭ ama. Phung anak mpŭ kơ amĭ ama amâo djŏ kyua digơ̆ jing jăk klă ôh ƀiădah kyuadah Aê Diê brei leh kơ phung anak mâo knŏng sa čô amĭ leh anăn sa čô ama đuč hlăm klei hdĭp. Aê Diê brei leh amĭ ama kơ drei, leh anăn brei kơ drei mâo amĭ ama, kyuanăn yơh brei phung anak mpŭ kơ amĭ ama. Mâo hlăm đa đa klei, ngă klei mpŭ kơ amĭ ama amâo mâo êlưih ôh, ƀiădah anăn jing klei Khua Yang mtă, leh anăn jih jang hlei pô gao klei bhiăn anei srăng tŭ klei bi kmhal sơăi (dlăng Bruă Lêwi 20:9; Klei Kbiă 21:17).
Amâo sa klei amâo dưi hngah ôh jing mâo đa đa amĭ ama bi êka kơ phung anak diñu prŏng snăk. Mpŭ kơ amĭ amâo djŏ čiăng lač phung anak amâo čih yap ôh amâodah wơr bĭt hĕ klei soh amĭ ama ngă leh, anôk êka hlăm klei mĭn, ƀiădah đăm brei phung anak čôñ ăl amâodah ênguôt ôh, kyuadah klei anăn knŏng lŏ thiăm klei bi êka hĭn kơ drei. Ngă bĕ ya klei drei dưi ngă čiăng ngă klei bi grăng. Klei Aê Diê Blŭ lač: “Đăm bi wĭt klei jhat kơ klei jhat arăng ôh, ƀiădah mĭn bĕ klei jăk ti anăp jih jang mnuih. Tơdah dưi, gĭr bĕ, dôk êđăp ênang hŏng jih jang mnuih” (Rôm 12:17-18). Amĭ ama jing klang leh anăn kđeh drei, kyuanăn tơdah drei bi êka kơ digơ̆, jing drei dôk bi êka kơ drei pô mơh. Bi êdah bĕ klei mpŭ kơ amĭ ama čiăng kơ amĭ ama thâo kơ klei phung anak hdơr knga kyua digơ̆ kkiêng leh kơ phung anak, leh anăn phung anak uêñ kơ ya klei truh leh kơ amĭ ama. Đăm wơr bĭt wah lač brei kơ amĭ ama ôh. Mâo lu klei drei amâo dưi ngă ôh čiăng kơ amĭ ama mâo klei bi mlih, ƀiădah Aê Diê Pô Mâo Jih Klei Myang dưi ngă sơăi, wah lač bĕ kơ amĭ ama, kyuadah klei wah lač jing sa hlăm lu êlan pioh kơ drei bi êdah klei mpŭ kơ amĭ ama.
Amĭ ama jing pô kkiêng kơ drei, ƀiădah klei hdĭp jing dŏ Aê Diê brei. Aê Diê ƀuăn srăng brei klei hdĭp sui leh anăn brei klei jăk jĭn kơ jih jang hlei pô mpŭ kơ amĭ ama. Mpŭ bĕ kơ amĭ ama wăt tơdah digơ̆ amâo jing mnuih jăk klă dưn. Huĭdah drei srăng lŏ hƀlŏk tơdah amĭ ama drei djiê leh! Akâo Khua Yang đru grăp čô drei bi êdah nanao klei thâo mpŭ, klei khăp leh anăn thâo hdơr knga kơ amĭ ama.
Si drei mpŭ leh, leh anăn dôk mpŭ kơ amĭ ama?
Wah lač: Ơ Khua Yang, lač jăk kơ Ih brei leh kơ kâo mâo amĭ ama pô kkiêng leh anăn čiêm rông kâo. Đru kâo thâo mpŭ kơ amĭ ama msĕ si Klei Ih Blŭ mtă leh. Akâo Ih brei klei jăk jĭn leh anăn bi ktang kâo čiăng kơ kâo dưi jing sa čô amĭ, sa čô ama leh anăn sa čô anak thâo huĭ mpŭ kơ Ih nanao leh anăn thâo ngă klei bi hmô jăk. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 45
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
