II Kevcai 5:16
Nqe cim:
“Yuav tsum hwm nej niam nej txiv, raws li tus Tswv uas yog nej tus Vajtswv hais rau nej lawm, nej thiaj yuav noj qab nyob zoo thiab muaj sia ua neej nyob ntev hauv lub tebchaws uas kuv muab rau nej.” (II Kevcai 5:16)
Lus nug rau sawvdaws xav:
– Vajtswv Txojlus qhia cov menyuam yuav tsum ua li cas rau cov niam txiv?
– Peb yuav ua dabtsi thaum niam txiv ua rau yus nyuaj siab?
– Vim li cas peb cheemtsum thov Vajtswv rau niam txiv?
Cov ntseeg Yexus muab qhov uas hwm niam txiv tso ua qhov xubthawj ntawm txojkev sib raug zoo neeg thiab neeg. Tus Tswv Kaum Nqe Kevcai qhia ua lub plag rau tibneeg ua zoo thiab muaj lub siab ncaj ua neej. Nqe kevcai “yuav tsum hwm niam hwm txiv” tsuas tso kiag tom qab cov kevcai uas neeg ua rau tus Tswv, thiab yog thawj nqe kevcai uas neeg ua rau neeg.
Hwm niam txiv yog saib taus niam txiv. Tsis yog menyuam hwm niamtxiv vim niam txiv ua zoo, tiamsis yog hwm vim Vajtswv pub lub meejmom rau lawv los ua niam txiv rau tej menyuam. Vajtswv pub peb muaj niam muaj txiv, thiab pub peb rau niam txiv, yog li menyuam yuav tsum hwm niam txiv. Tej zaum yuav muaj qee yam tsis zoo yoojyim ua, tiamsis qhov ntawd yog Vajtswv lo lus samhwm, thiab leej twg ua txhaum txoj cai no puavleej raug txim (saib Levis Kevcai 20:9; Khiavdim 21:17).
Ib yam uas peb yuav tau lees paub yog muaj qee tus niam txiv tau ua rau tej menyuam nyuaj siab heev. Hwm niam txiv tsis tau txhais hais tias yog muab tej kev txhaum, kev mob siab tso tseg mus, tiamsis cov menyuam tsis txhob npau taws lossis chim siab, rau qhov tej ntawd haj yam yuav ua rau lawv nyuaj siab ntxiv. Cia li ua tej uas peb ua tau kom muaj txojkev rov sib raug zoo. Vajtswv Txojlus qhia: “nej tsis txhob ua phem pauj, tiamsis nej yuav tsum xyaum ua qhov uas sawvdaws pom hais tias yog tej uas zoo xwb. Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum.” (Loos 12:17-18). Niam txiv yog tus txha, yog peb tej nqaij, yog li thaum yim ua rau lawv nyuaj siab ces yog ua rau yus tus kheej nyuaj ntag. Cia li qhia tshwm lub siab hwm niam txiv kom niam txiv paub hais tias menyuam paub ua lawv tsaug, thiab hmov tshua niam txiv. Tsis txhob hnov qab thov Vajtswv pab rau niam txiv. Muaj qee yam peb yuav ua tsis tau kom niam txiv hloov, tiamsis Vajtswv yog tus ua tau; cia li thov Vajtswv pab niam txiv vim thaum thov Vajtswv yog qhia tawm lub siab hwm niam hwm txiv.
Niam txiv yug peb los ua neeg hauv ntiajteb, tiamsis txojsia yog Vajtswv pub rau peb. Vajtswv coglus yuav pub txojsia thiab kev kaj siab rau cov neeg uas hwm niam hwm txiv. Cia li ua neeg hwm niam txiv txawm tias niam txiv ua tsis tau neeg zoo txaus. Tsis txhob cia peb xav txog lig thaum tsis muaj niam txiv nrog peb nyob lawm! Thov Vajtswv pub rau peb txhua tus niaj hnub qhia tshwm lub siab nyob sib haum, sib hlub, paub ua niam txiv tsaug.
Thov Vajtswv,
Vajtswv, ua Koj tsaug vim Koj pub rau nyuam yaus muaj niam txiv yug thiab tu loj hlob. Thov Koj pab kom nyuam yaus ua neeg hwm niam txiv raws nraim li Vajtswv Txojlus qhia. Thov Vajtswv pub koob hmoov, ntxiv zog kom nyuam yaus ua tau ib leej txiv, leej niam lossis ua tau neeg hwm Vajtswv thiab ua tau qauv zoo. Nyuam yaus tuav Tswv Yexus lub npe thov, Amees.
Peb twb hwm thiab tabtom hwm niam txiv zoo li cas?
Nyeem Vajluskub hauv peb lub xyoo: Yaxayas 45
Kênh Youtube BHKTHN:
