Klei Aê Diê Blŭ: Klei Čŏk Hia 3:1-8; 21-22
Êlan kliăng: “Ƀiădah klei anei kâo bi mĭn, snăn yơh kâo mâo klei čang hmăng: kyua klei khăp sĭt suôr Yêhôwa, hmei amâo tuôm tuč ruê̆ ôh, klei Ñu pap amâo tuôm kƀah ôh” (Klei Čŏk Hia 3:21-22)
Klei êmuh ksiêm mĭn: Si Khua pô hưn êlâo Y-Yêrêmi ƀuh kơ klei knap mñai ñu leh anăn djuê ana ñu dôk tuôm? Mơ̆ng ya klei ñu mâo klei đăo knang tơdah dôk tuôm hŏng klei dleh dlan hĭn hlăm klei hdĭp jing hlŭn? Ya phŭn klei drei đăo knang hlăm klei hdĭp anei?
Lŏ čuê klei čŏk hia, Khua pô hưn êlâo Y-Yêrêmi ngă kơ phung dlăng ƀuh sa kdrêč klei knap mñai ñu leh anăn djuê ana ñu dôk tuôm hlăm klei jing hlŭn tơdah yua boh blŭ bi mgei ai tiê ktang snăk msĕ si “knap mñai”, “giê klei Aê Diê ngêñ”, “êbat hlăm klei mmăt”, “kđeh leh anăn klĭt kâo tĭ rai, leh anăn bi joh klang kâo”, “wang kâo leh anăn guôm kâo hŏng klei ênguôt ktrŏ leh anăn klei knap mñai” (êlan 1-5). Djăp êlan čih msĕ si ênai hlăm ai tiê ñu dôk ruă êka, ênguôt hnĭng hŏng klei knap mñai dôk tuôm. Amâo djŏ knŏng dŭm năn ôh, hlăm klei knap mñai, ñu lŏ tŭ klei ênguôt phĭ kyua jih jang phung ƀuôn sang djă djik djak, jih hruê diñu mmuñ mưč mač (êlan 14-15). Giê klei ngêñ Aê Diê tuh kơ phung ƀuôn sang Ñu kjham snăk, “ñu yơr kngan ñu bi kdơ̆ng hŏng kâo nanao, nanao jih hruê”, “Ñu brei kđeh leh anăn klĭt kâo tĭ rai, leh anăn bi joh klang kâo”, “Ñu bư̆ leh mnư̆ jŭm dar kâo, snăn kâo amâo dưi đuĕ ôh; ñu kă leh kâo hŏng klei săng đai ktrŏ”…. Wăt tơdah ñu iêô leh anăn kwưh kơ klei đru, Aê Diê hngah amâo hmư̆ ôh klei ñu wah lač (êlan 8).
Hlăm klei knap mñai anăn, pô čih hră mĭndah msĕ si jih klei dưi tŭ leh, klei čang hmăng hlăm Yêhôwa rai luč kyua ñu knŏng ƀuh klei ênguôt hnĭng lŏ bŏ klei ênguôt hnĭng. Ƀiădah hlăm wưng msĕ si luč klei čang hmăng anăn, Khua pô hưn êlâo Y-Yêrêmi lŏ hdơr klei jăk leh anăn klei pap Yêhôwa. Ñu lŏ duah leh klei đăo knang kơ mngăt pô tơdah hdơr tơdah Yêhôwa ngă kơ phung ƀuôn sang Ñu leh anăn ñu năng hŏng klei soh ngă leh hŏng Ñu snăn amâo lŏ mâo pô dưi dôk ti anăp Aê Diê ôh (Klei Mmuñ Hđăp 103:10). Ñu kah mbha klei thâo ƀuh anei čiăng grăp hruê phung ƀuôn sang Aê Diê thâo klei jăk leh anăn klei pap Aê Diê, kyua anăn phung ƀuôn sang Ñu truh ară anei ăt kăn dưi rai tuč rei (êlan 22).
Dlăng kơ klei dleh truh, knŏng sur êwa prŏng, blŭ duñ duñ, ƀiădah dlăng kơ klei jăk leh anăn klei pap Aê Diê, drei srăng mâo klei mmuñ mơak wăt tơdah ya klei truh si srăng jing dưn. Tơdah tuôm hŏng klei ênguôt hnĭng prŏng prĭn, drei ƀrư̆ mâo ai tiê đăo knang kjăp hlăm klei jăk leh anăn klei pap Aê Diê. Tơdah drei knŏng dlăng kơ klei truh snăn srăng luč klei đăo knang hlăm Aê Diê, mbĭt anăn klei dleh dlan, ênguôt hnĭng srăng bi kngăm klei hdĭp drei. Akâo kơ Aê Diê brei drei dưm nanao klei đăo knang hlăm Aê Diê kyua “klei ñu pap amâo tuôm kƀah ôh”.
Drei khăng dlăng kơ klei dleh truh amâodah đăo knang kơ klei pap, klei khăp Aê Diê?
Wah lač: Ơ Khua Yang, kâo hơêč hmưi kơ Ih kyua klei pap Ih dôk lă lar kơ hlei pô đăo knang kơ Ih. Akâo kơ Ih pap brei kơ kâo tơdah kâo dlăng hlăm klei truh êdu ai, kƀah klei đăo. Akâo kơ Ih đru kâo thâo knang kơ Ih tơdah tuôm hŏng klei truh, rŭng răng čiăng đăm luč klei čang hmăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
