Nkauj Quaj Ntsuag 3:1-8; 21-22
Nqe cim:
“Thaum kuv nco txog tej no ua rau kuv rov muaj kev cia siab. Tus TSWV txojkev hlub uas ruaj khov thiab nws txojkev hlub tshua yeej muaj tsis paub kawg.” (Nkauj Quaj Ntsuag 3:21-22)
Lus nug rau sawvdaws xav:
– Tus Cevlus Yelemis paub dabtsi txog tej kev txomnyem uas nws thiab nws haivneeg tabtom ntsib?
– Los ntawm yam dabtsi nws thiaj muaj kev cia siab thaum lubneej poob mus ua cev qhev txomnyem?
– Peb lub hauvpaus kev cia siab hauv lubneej no yog dabtsi?
Txuas ntxiv tej nkauj quaj ntsuag, tus Cevlus Yelemis ua rau cov nyeem pom txog ib feem twg ntawm tej kev txomnyem uas nws thiab nws haivneeg tabtom ntsib thaum lawv raug poob mus ua cev qhev los ntawm tej lo lus xws li “txom nyem”, “nyuaj siab”, “txojkev tsaus ntuj”, “Nws ua rau kuv cev nqaij daim tawv sem tag, thiab muab kuv tej pob txha lov”, “Nws muab kuv xov kaw cia, thiab muab kev lwj siab kev txom nyem xov kuv cia” (nqe 1-5 HMOWSV). Ib kab kab lus twg puav leej zoo li nplooj siab raug nkaug, raug dua rhe, nrog rau tej kev mob siab. Tsis tas li ntawd xwb, thaum raug kev txomnyem lwj siab, nws tseem tiv kev iab siab thaum nws haivneeg raug luag txob thuam, luag plig, tso dag tso luag (nqe 14-15). Vajtswv txojkev npau taws rab nplawm, nplawm raug Nws haivneeg hnyav kawg li. Tus Cevlus Yelemis hais tias: “Nws muab kuv ntaus tas los ntaus dua tsis hlub kuv hlo li”, “Nws ua rau kuv tej nqaij tej tawv ntuag rua ras thiab tsoo kuv tej pobtxha lov”, “Nws nta nws rab hneev thiab muab kuv cuab ua daim phiaj rau nws tua”, “Nws muab kuv lub ntsejmuag coj mus txhuam rau hauv av thiab muab kuv cov hniav tsoo saum pobzeb lov tas.” Txawm yog nws taij thov Vajtswv los Vajtswv yeej tsis quavntsej nws tej lus thov hlo li (nqe 8).
Nyob hauv lub tsamthawj lwj siab li ntawd, cuag li tus sau twb tiv tsis taus lawm, nws txojkev cia siab rau tus Tswv yaj xam tas vim nws tsuas pom kev mob siab tas mob siab tuaj xwb. Tiamsis nyob rau tsamthawj cuag li tas kev cia siab li ntawd, tus Cevlus Yelemis rov nco txog tus Tswv txojkev hlub tshua uas tsis paub kawg. Nws rov nrhiav tau lub hauvpaus kev cia siab rau nws tus ntsujplig thaum nco hais tias yog tus Tswv rau txim rau Yelemis thiab nws haivneeg raws li lawv tej kev txhaum ces yuav tsis muaj leejtwg sawv taus tabmeeg tus Tswv (Ntawv Nkauj 103:10). Tus Cevlus Yelemis qhia tawm nws txojkev zeem paub no kom tus Tswv haivneeg pom txog tus Tswv txojkev hlub txhua hnub, lawv thiaj tsis raug kev puastsuaj (nqe 22).
Yog saib mus rau tej teebmeem, peb yeej yuav poob siab, qaug zog, tiamsis yog peb saib mus rau tus Tswv txojkev hlub tshua, peb yuav hu nkauj zoo siab txawm yuav nyob lub tsamthawj twg. Thaum ntsib kev lwj siab yim loj, peb yim muaj kev cia siab ruaj khov rau tus Tswv txojkev hlub. Yog peb tseem pheej ntsia mus rau tej teebmeem ces peb yuav tsis muaj kev cia siab rau tus Tswv, thiab tej kev txomnyem, nyuaj siab yuav voob nthwv peb lubneej. Thov tus Tswv pab peb niaj hnub cia siab rau tus Tswv, vim “Nws txojkev hlub tshua yeej muaj tsis paub kawg”.
Thov Vajtswv,
Tus Tswv, nyuam yaus qhuas Koj vim Koj txojkev hlub nyob mus ibtxhis rau tus uas cia siab ntsoov rau Koj. Thov Koj zam txim thaum nyuam yaus pheej ntsia mus rau tej teebmeem ua rau poob siab, tsis muaj kev ntseeg. Thov cia nyuam yaus paub tig ntsia Koj thaum ntsib kev sim siab, txomnyem kom nyuam yaus tsis tas kev cia siab. Nyuam yaus tuav Yexus Khetos lub npe thov, Amees.
Peb pheej ntsia mus rau tej teebmeem lossis cia siab rau tus Tswv txojkev hlub tshua?
Nyeem Vajluskub hauv peb lub xyoos: II Kevcai 26
Kênh Youtube BHKTHN:
