Daniyees 9:4-19
Nqe cim:
“Peb tau ua txhaum; peb lub siab yeej phem thiab peb yuam kev lawm. Peb tsis mloog koj lus, thiab peb tsis kam ua tej uas koj qhia kom peb ua raws li koj lub siab nyiam” (Daniyees 9:5).
Lus nug rau sawvdaws xav:
- Nyob hauv cov lus thov, Daniyees pheej hais mus hais los txog dab tsi ?
- Qhov ntawd ua rau peb pom Daniyees xav li cas rau nws cov yawg koob tej kev txhaum?
- Daniyees tus qauv thov Vajtswv qhia peb txog yam dab tsi thaum peb sawv sib tim nrog tej teebmeem thiab tej uas pawg ntseeg ua yuam kev?
Hauv tej lus thov Vajtswv, Daniyees lees nws yawg koob tej kev txhaum uas muaj lub siab nruj tsiv, txhob txwm ua txhaum tus Tswv tej kevcai thiab tsis mloog tus Tswv tej lus ntuas (nqe 4-7). Daniyees pom Vajtswv ua ncaj thaum Nws cia lawv raug poob mus ua cev qhev txomnyem ntsuav (nqe 7-9), thiab paub hais tias nws cov yawg koob tej kev txhaum yeej tsis muaj lus cam li (nqe 10-14). Yam uas Daniyees pheej hais mus hais los yog “peb”: “peb tau ua txhaum lawm”, “peb tsis mloog Koj lus”… Txij tshooj 1 los, Tus tub hluas Daniyees raug xaiv thiab kawm xyaum hauv vajntxwv lub loog los txog lub sijhawm no nws hnub nyoog muaj yim caum xyoo, nws yog tus uas muab siab rau ntseeg Vajtswv tuag nthi. Yog leejtwg tsimnyog sawv cais tawm ntawm haiv neeg tsis ntseeg thiab ua tsis ncaj rau tus Tswv ces tsimnyog yog Daniyees. Tiamsis ntawm no Daniyees muaj lub siab koom nrog nws cov yawg koob tej kev txhaum. Nws tsis chim, tsis yws Vajtswv thiab kuj tsis liam txim rau Vajtswv haiv neeg.
Peb kheev xav hais tias, leejtwg ua txhaum ces tsimnyog tus ntawd raug txim xwb thiaj phim. Ntawm kev cawm dim ces yeej yog li ntawd ntag, vim Exekees 18:20 hais tias: “Tsuas yog tus uas ua txhaum thiaj yuav raug tuag xwb.” Tiamsis ntawm kev ua neej nrog lwm tus, ib yam li Akhas ua txhaum ua rau tas nrho haiv neeg Yixalayees txeeb tsis tau lub nroog A-is puas yog(Yausuas 7)? Thiab hais tias Vajtswv yuav ua zoo rau cov uas hlub Nws puas yog (Khiavdim20:6)? Daniyees paub meej nws yog ib feem hauv Vajtswv haiv neeg, yog li ntawd thaum Vajtswv haiv neeg ua txhaum, nws yuav tsis hais tias tsis dawm txog kuv. Daniyees paub hais tias thaum ib haiv neeg twg ua txhaum rau Vajtswv ces tas nrho haiv neeg ntawd tsis tau Vajtswv foom koob hmoov.
Niaj hnub nimno muaj tej pawg ntseeg muaj teebmeem ua rau sawvdaws sib cais ua pab ua pawg, ib txhia tuaj cov tsis ua txhaum tog… siv zog nrhiav kev rau txim thiab cem yws lwm tus. Qhov uas muaj nplooj siab paub txog “peb tau ua txhaum lawm” ib yam li Daniyees ua, yog tsis suav yus yog tus zoo dua sawvdaws thiab txiav txim rau lwm tus. Peb txhua tus yuav tsum paub meej peb yog ib yam hauv sawvdaws, zoo li ib yam twg hauv lub cev, thaum ntawd peb yuav txawj hais tau tej lus sib hlub sib pab (Efexus 4:16).
Thov Vajtswv,
Tus Tswv, thov pab nyuam yaus muaj kev sib koom nrog Koj haiv neeg txhua tus, kom paub sib hlub sib pab, sib txhim kho hauv kev hlub. Amees.
Raws li yus xav, lees kev txhaum yoojyim lossis khwv?
Nyeem Vajluskub hauv peb lub xyoo: Pajlug 16
Kênh Youtube BHKTHN:
