Mathiơ 20:29-34
“Mă-lei ‘Bok Kei-Dei Sư oei ‘mêm mơnat kơ bơ̆n tơpă;” (Êphêsô 2:4)
Nơ̆r jet tơchĕng pơwao:
– Yua kơ kiơ Kră Yang đei pơklaih bơngai măt tol đei ‘bôh hơdah?
– Kră Yang Yêsu đei dơ̆ng pơklaih ‘bar ‘nu bơngai măt tol chă apinh tơmam sa ‘bơ̆t cheng trong ba ăn kơ lu bơ̆n đei pơhrăm iŏk tơdrong kiơ?
– Lu bơ̆n đei tơblŏk tơdrong kiơ lăm tơdrong bơ̆jang?
Kơplah Kră Yang Yêsu hăm lu bơngai pơhrăm Sư lĕch đơ̆ng pơlei Jê-ri-cô, khŭl kon pơlei pơla wang kiơ̆ Sư. Đei ‘bar ‘nu bơngai măt tol hơoei ‘bơ̆t cheng trong, đei mơ̆ng kơ tơ̆ng khan Kră Yang Yêsu đei năm brih na măr sư krao pơret mă re “Ơ Kră Yang, Kon sâu ‘bok Đa-wĭt apinh mơnat biơ̆ kơ lu nhôn!” (trong 30). Mă khan đei lơ bơngai pơgăn, mă lei măr sư rai krao pơret hloh dơ̆ng. Kră Yang Yêsu dơ̆ng păng krao măr sư wă kơ Kră Yang pơm kiơ kơ măr sư, măr sư apinh wă kơ đei măt ‘bôh hơdah. Kră Yang mơnat na pel măt măr sư. Măt măr sư ‘bôh hơdah păng yak kiơ̆ Kră Yang.
‘Bar ‘nu bơngai lăm tơdrong hơ’mon ‘nâu pha ra biơ̆, ưh kơ lei lăi thoi bơngai nai. Măt măr sư gah ‘nguaih ưh kơ ‘bôh hơdah mă lei măt gah bơhngol măr sư hơdah, măr sư đei krao Kră Yang Yêsu “kon sâu pơtao Đa-wit”, mă khan măt măr sư ưh kơ ‘bôh hơdah mă lei măr sư kŭm băt Kră Yang Yêsu noh jơ̆ ‘Bok Mê-si truh bơih, Tơ’ngla gơh pơ klaih măt măr sư. Thoi noh măr sư adrin ôr krao mă khan đei lơ bơngai khă găn măr sư ră ưh kơ đei pơm kơ măr sư kơdŭn. Lu bơngai Israel băt hơđăl kơ ‘Bok Mê-si gô truh noh jơ̆ kon sâu pơtao Đa-wit mă lei lu sư ưh kơ lui Yêsu noh jơ̆ ‘Bok Mê-si. ‘Bar nu bơngai măt tol âu hlôh băt tŏ sĕt ră, mă lei măr sư đĭ jơhngơ̆m lui kơ Kră Yang kiơ̆ thoi măr sư đei hlôh băt, măr sư đei Kră Yang mơnat, tơl nơ̆r măr sư păng măt măr sư gơh ‘bôh hơdah. Kơplah măt măr sư hơdah măr sư yak kiơ̆ Kră Yang Yêsu. Tơdrong âu tơ’bôh kơ đon lui măr sư rai đunh rai wơ̆ ‘lŏ yua kơ đei mơn kơ Kră Yang pơklaih măt măr sư bơih. Măr sư năm kiơ̆ hloi Kră Yang Yêsu tơngla mă măr sư đei pơjao đĭ chăl arih.
Kră Yang Yêsu đang kơ bơtho kơ lu jơ̆ng ‘bang Sư bơ̆jang thoi bơngai đĭch, chă dôm tơdrong ‘lơ̆ng rŏ lăm dêh char ‘Bok Kei-Dei, ưh kơ trŏ pơgơ̆r pơm yŏng mă lei bơ̆jang thoi bơngai đĭch, ưh kơ lăng kơ dih gĭt hloh kơ bơngai nai wă chă gơ̆p pơ ư mă lei tơjur akâu kơ dih bơ̆jang păng lăng bơngai nai nhen thoi gĭt hloh kơ bơ̆n kơ dih. Thoi noh, Kră Yang dơ̆ng dŏng tơgŭm ‘bar ‘nu bơngai măt tol chă apinh tơmam ‘bơ̆t cheng trong mă khan lơ bơngai lăng ưh kơ rơ-a, lơ bơngai hil, pơgăn. Athei kiơ̆ Kră Yang yua kơ Sư kŭm đei pơklaih bơhngol bơ̆n. Athei bơ̆jang kơ Kră Yang păng ‘nhŏng oh bơ̆n đĭ jơhngơ̆m.
Ơ Kră Yang, Inh bơnê kơ Ih yua kơ ih đei dŏng inh đơ̆ng măt tol gah bơhngol. Apinh Ih tơgŭm inh ling lang gơnang păng yak năm kiơ̆ Ih, pơjao kơ Ih đĭ chăl arih inh wă bơ̆jang nhen thoi bơngai đĭch kiơ̆ thoi kơmĭl ih đei pơm bơih. Yua anăn Kră Yang Yêsu Krist, Amen.
Lu bơ̆n hăm đei băt kơ tơdrong mơnat đơ̆ng Kră Yang đei pơklaih pơhngol bơ̆n na pơkă pơkăm kiơ̆ Kră Yang păng bơ̆jang kơ Sư ưh?
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êsai 57
Kênh Youtube BHKTHN:
