Chivkeeb 50:15-21
Nqe cim:
“Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawd hloov ua qhov zoo, ua li ntawd thiaj cawm tau coob leej txojsia.” (Chivkeeb 50:20a).
Lus nug rau sawvdaws xav:
– Yauxej cov tijlaug hais cov vimchiv dabtsi thaum thov tus kwv zam txim?
– Qhov keebtiv uas Yauxej zam txim rau nws cov tijlaug yog dabtsi?
– Yuav ua li cas kom peb zam tau lwm tus txojkev txhaum, ua neej sib haum nrog cov kwvtij?
Yauxej cov tijlaug tau ua hiam nws txog qhov uas yuav luag tuag thiab muab Yauxej muag mus ua qhev (Chivkeeb 37:18-28). Thaum lawv mus ntsib Yauxej nram tebchaws Iziv, lawv xav hais tias Yauxej yuav ua siab phem pauj tej uas lawv ua tas los thiab ntshai tsam muab tua tom qab lawv leej txiv tuag lawm. Yog li ntawd, thaum faus txiv tas, cov tijlaug thiaj txib neeg mus cuag Yauxej thiab hais lawv cov vimchiv thov kom tus kwv zam txim. Thib ib, thov koj zam koj cov tijlaug tej kev txhaum uas thaud lawv tau ua rau koj lawm, vim nov yog txiv tej lus hais thaum nws yuav tuag (nqe 16-17). Thib ob, lawv hais tias txawm li cas sawvdaws koom txiv tus Vajtswv (nqe 17). Ces tom qab ntawd cov tijlaug mam li cuag Yauxej thiab thov ua tubtxib (nqe 18). Lawv tsis xav hais tias qhov uas lawv ua li muaj tiav raws li Yauxej zaj npau suav thaud!
Cov vimchiv uas cov tijlaug hais tsis yog qhov keebtiv tseemceeb ua rau Yauxej zam txim thiab nrog lawv sib raug zoo. Qhov tseemceeb uas Yauxej hais haum thiab zam txim rau cov tijlaug yog hwm tus Tswv, thiab paub tias tus Tswv hlub, tiv thaiv thiab muaj homphiaj zoo rau nws thiab nws haivneeg lawm. Tus Tswv muab cov tijlaug tej kev txhaum hloov los ua kev zoo, ua tiav Nws lub siab nyiam nyob hauv Yauxej lub neej, Yakhauj tsevneeg, thiab Yauxej cov tijlaug thiab! Yauxej hwm tus Tswv thiab zeem paub Vajtswv txojkev npaj rau nws thiab tsevneeg kom cawm tau cov Yixalayees (nqe 20). Yog li ntawd, qhov ua yuam kev thiab kev txhaum ntawm cov tijlaug ua rau Yauxej tsis cim ntsoov cia. Lub homphiaj zoo tshaj ntawm Yauxej lub neej yog ncaj ncees ua tiav tus Tswv txojkev npaj tseg.
Muaj ntau leej nyob hauv peb cov no tabtom ntsib tej kev sim siab nyob hauv lub neej, ua neej tsis sib haum nrog cov kwvtij nkaujmuam. Thov tus Tswv qhia rau peb kawm tau Yauxej tus qauv, hwm tus Tswv thiab zeem paub tus Tswv yog tus muaj kev hlub, tuaj peb tog thiab tiv thaiv peb. Yog ntsib raug qhov uas tsis ncaj ncees, cia li ntseeg tus Tswv yog tus uas txiav txim thiab ua pauj (Henplais 10:30). Dua li ntawd cia li zeem paub tus Tswv txojkev npaj zoo dua tej uas peb xav, tus Tswv muaj peevxwm siv tau tej yam phem dhau los ua qhov zoo muaj nqis rau peb, rau cov ntseeg tus Tswv thiab Nws lub tebchaws (Loos 8:28). Yog li, peb yuav tsum tiv kom dhau tej kev sim siab ntawm txojkev sib raug zoo hauv tsevneeg, peb thiaj ua tau lub neej muaj nqis rau tus Tswv thiab rau lwm tus.
Thov Vajtswv,
Leej Txiv tus uas zoo kawg nkaus! Thov Koj qhia kom nyuam yaus zeem paub Koj yog tus uas txiav txim thiab npaj qhov zoo rau nyuam yaus lub neej kom nyuam yaus zam txim, nyob sib haum nrog kwvtij nkaujmuam, tshwjxeeb yog hauv tsevneeg. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas tau zoo siab hlo zam lwm tus tej kev txhaum, ua neej nyob sib haum nrog kwvtij?
Nyeem Vajluskub hauv peb lub xyoo: Phau Ntawv Nkauj 10-11
Kênh Youtube BHKTHN:
