Klei Aê Diê Blŭ: Klei Mphŭn Dơ̆ng 50:15-21
Êlan kliăng: “Bi diih, diih mĭn ngă ƀai kơ kâo; ƀiădah Aê Diê brei klei anăn jing jăk, čiăng bi mtlaih klei hdĭp lu mnuih,” (Klei Mphŭn Dơ̆ng 50:20a)
Klei êmuh ksiêm mĭn: Ya mta phŭn knhal phung ayŏng Y-Yôsep mdưm čiăng akâo kơ adei diñu pap brei klei soh? Ya phŭn knhal Y-Yôsep pap brei kơ phung ayŏng ñu? Si drei ngă čiăng lăm lui klei soh mnuih mkăn, dôk hdĭp êđăp ênang hŏng ayŏng adei?
Phung ayŏng Y-Yôsep tuôm ngă jhat leh kơ gơ̆ tơl păt čiăng djiê leh anăn čhĭ bi luč hĕ gơ̆ (Klei Mphŭn Dơ̆ng 37:18-28). Tơdah lŏ bi tuôm hŏng Y-Yôsep ti Êjip, diñu bi mĭn adei diñu dôk duah êlan rŭ ênua diñu, amâo djŏ čiăng bi tuôm hŏng ama ôh. Kyua diñu đăo Y-Yôsep ăt adôk ăl, sĭt nik srăng bi mdjiê diñu yơh tơdah leh ama diñu djiê, kyuanăn leh bruă dơr ama, phung ayŏng tiŏ nao arăng bi tuôm hŏng Y-Yôsep leh anăn gĭr bi êdah mta phŭn knhal čiăng kơ adei pap brei kơ klei diñu ngă leh. Tal sa, akâo kơ adei pap brei kơ phung ayŏng kyuadah anăn jing klei ama mtă êlâo ñu djiê (êlan 16-17). Tal dua, diñu mjĕ mñă snei khădah si klei jing dưn ayŏng adei ăt mâo mbĭt sa Aê Diê kơ ama diñu mơh (êlan 17). Êdei kơnăn phung ayŏng pô yơh nao čuôn kơŭt akâo ngă dĭng buăl kơ adei diñu (êlan 18). Diñu amâo mđing mĭn ôh jih klei diñu ngă anăn bi sĭt hĕ klei êpei Y-Yôsep tuôm yăl dliê leh!
Ƀiădah jih klei diñu mdưm anăn amâo djŏ ôh jing phŭn knhal brei Y-Yôsep pap brei leh anăn lŏ bi grăng hŏng phung ayŏng. Mta klei yuôm hĭn ba klei êđăp ênang leh anăn klei pap brei jing kyua Y-Yôsep huĭ mpŭ kơ Aê Diê, mbĭt hŏng klei anăn ñu thâo Aê Diê khăp, răng mgang leh anăn Ñu mâo hdră kơ klei hdĭp ñu leh anăn găp djuê ƀuôn sang ñu. Aê Diê bi mbliư̆ klei jhat ƀai phung ayŏng ñu ngă jing klei găl, kyuanăn bi leh klei Ñu čiăng kơ klei hdĭp Y-Yôsep, găp djuê Y-Yakôp, hlăm anăn mâo wăt phung ayŏng ñu mơh! Y-Yôsep huĭ mpŭ kơ Aê Diê leh anăn thâo kral hdră Aê Diê kơ klei hdĭp ñu leh anăn găp djuê ñu čiăng djă pioh găp djuê phung Israel (êlan 20). Kyuanăn, klei soh wê leh anăn klei jhat ƀai phung ayŏng ñu ngă hŏng ñu amâo djŏ jing klei yuôm čiăng hdơr pioh ôh. Klei kñăm čiăng jăk siam ti dlông hĭn kơ klei hdĭp Y-Yôsep jing sĭt suôr bi leh hdră Aê Diê mkra leh kơ ñu.
Lu phung drei dôk tlă anăp hŏng lu klei lông dlăng hlăm gŏ sang, dôk hdĭp hlăm klei amâo thâo bi djŏ ôh hŏng ayŏng amai adei. Akâo kơ Aê Diê brei drei hriăm mơ̆ng klei hdĭp Y-Yôsep bi hmô, hŏng jih ai tiê huĭ mpŭ kơ Aê Diê leh anăn thâo kral Aê Diê jing Pô khăp, dŏng mgang leh anăn răng kriê drei nanao. Tơdah tuôm hŏng klei arăng ngă amâo mtăp mđơr, brei drei đăo kjăp kơ Khua Yang yơh jing Pô phat kđi kpă leh anăn rŭ ênua (Hêbrơ 10:30). Mbĭt hŏng klei anăn ăt brei drei thâo kral hdră Aê Diê mkra kơ klei hdĭp drei jing dlông êlam hĭn kơ klei drei dưi bi mĭn, Khua Yang dưi yua klei jhat mnuih mkăn ngă pioh ba klei tŭ dưn kơ drei, kơ phung ƀuôn sang Aê Diê leh anăn kơ Ƀuôn Ala Mtao Ñu (Rôm 8:28). Hŏng klei anăn, drei dưi găn gao klei lông dlăng hlăm klei bi mguôp hlăm gŏ sang čiăng dôk hdĭp mâo klei tŭ dưn kơ Khua Yang leh anăn kơ hdơ̆ng pô.
Si ngă drei hmiêt mkăp lăm lui klei soh wê pô mkăn, dôk hdĭp êđăp ênang hŏng ayŏng adei mơ̆?
Wah lač: Ơ Ama Pô yuôm bhăn! Brei kâo thâo kral Ama jing Pô phat kđi leh anăn thâo kơ hdră jăk siam Ih mkra kơ klei hdĭp kâo, čiăng kơ kâo hdĭp thâo pap brei, dôk êđăp ênang hŏng ayŏng amai adei kâo, boh nik nak hlăm gŏ sang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 10-11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
