Malakaus 16:1-8
Nqe cim:
“Tus tub hluas ntawd hais rau lawv hais tias, ‘Nej tsis txhob ntshai, kuv paub hais tias nej tuaj nrhiav Yexus uas yog neeg Naxales uas luag muab ntsia rau saum ntoo khaublig. Nws tsis nyob ntawm no, nws twb sawv lawm! Nej saib ntawm no yog qhov chaw uas luag tso nws lub cev cia’” (Malakaus 16:6).
Lus nug rau sawvdaws xav:
– Cov neeg mus xyuas lub qhov ntxa ntsib zaj xwm dabtsi?
– Lub qhov ntxa khoob ua timkhawv txog Tswv Yexus kev sawv rov los licas?
– Peb kawm tau dabtsi dhau ntawm qhov uas Tswv Yexus tsis nyob hauv qhov ntxa?
Hnub kaj thaum sawv ntxov, cov pojniam coj tshuaj tsw qab mus pleev tus Tswv lub cev. Thaum lawv mus txog tom lub ntxa hnub tabtom tawm tuaj (nqe 1-2). Yam lawv txhawj yog yuav ua cas thiaj mus taus lawm hauv qhov ntxa thaum muaj daim txiag zeb npog thiab muaj tubrog zov lub qhov ntxa zoo heev (Mathais 27:60, 66). Kev txhawj ntshai pauv hloov mus ua kev xav tsis thoob thaum lawv pom daim txiag zeb twb raug dov tawm lawm, thiab muaj timtswv tshwm los qhia hais tias: “…Nej tuaj nrhiav Yexus uas yog neeg Naxales uas luag muab ntsia rau saum ntoo khaublig. Nws tsis nyob ntawm no, nws twb sawv lawm! Nej saib ntawm no yog qhov chaw uas luag tso nws lub cev cia.” (nqe 6).
Qhov chaw faus tus Tswv nimno tsuas yog ib lub qhov ntxa khoob lawm xwb. Qhov no yog ib zaj muaj tseeb cav tsis tau, tus Tswv cov yeebncuab kuj cav tsis tau, lawv thiaj nrhiav lwm lub tswvyim los daws, lawv hais tias yog cov thwjtim tuaj nyiag Tswv Yexus lub cev mus zais lwm qhov lawm (Mathais 28:13). Lawv tsis nco txog hais tias ib pab neeg tabtom ntshai ntshee hnyo thaum pom lawv tus xibhwb raug ntsia rau saum tus ntoo khaublig, tabtom khiav nkaum hauv tsev muab qhov rooj liaj rau, yuav ua cas kam mus nyiag tus Tswv lub cev thiab tomqab ntawd kam qhia hais tias Yexus sawv rov los lawm? Tomqab no lawv ib tug zuj zus ho txaus siab tuag, puas yog tuag vim xav tiv thaiv lawv tej lus dag? Tsis yog li ntawd! Tsuas muaj ib zaj tseeb xwb, ntawd yog Tswv Yexus tau sawv rov los lawm tiag, thiab lub qhov ntxa khoob lug ua timkhawv hais tias zaj no muaj tseeb!
Tus Tswv tsis nyob hauv qhov ntxa lawm, thiab cov uas nrhiav tus Tswv kuj zoo tawm hauv lub qhov ntxa ntawd mus. Tej uas yog kev tuag li raug tso tseg rau tomqab lawm. Qhov no qhia rau peb ib zaj kawm uas yog yuav tsum tso kev txhaum tseg, txiav tu nrho thiab txhob tig nrhiav lawm. Yam tsimnyog ua yog nrhiav kev ua lub neej dawbhuv thiab ua neej muaj nqis pub rau tus Tswv: “Tiamsis nimno Vajtswv twb tso nej dim ntawm txojkev txhaum los ua Vajtswv cov tubqhe lawm. Qhov uas nej tau yog Vajtswv ntxuav kom nej muaj lub siab dawbhuv thaum kawg nej thiaj tau txojsia ntev dhawv mus ibtxhis” (Loos 6:22 BTTHĐ).
Lub qhov ntxa kuj piv li tej kev ntxhov siab hauv lub neej, piv li tej qhov txhab qawj tob ua rau lub siab tuag lawm. Tus Tswv twb sawv tawm hauv qhov ntxa los lawm, yog li ntawd peb kuj zoo tawm hauv tej qhov chaw faus peb kev xav, lub siab thiab tus ntsujplig. Txawm kev mob siab yuav loj npaum twg, los kuj txhob hnov qab hais tias tus Tswv uas sawv rov los muaj lub hwjchim kov yeej txhua tsav yam.
Thov Vajtswv,
Thov qhuas Tswv Yexus, vim Koj sawv rov los ci ntsa iab, tso lub qhov ntxa txias toos rau tomqab. Thov tus Tswv sawv lub hwjchim puv npo nyuam yaus, pab nyuam yaus txiav tu nrho nrog kev txhaum, thiab muaj lub siab tawv tiv dhau tej kev nyuaj siab hauv lubneej kom lub neej tawg paj txi txiv rau Koj. Amees.
Tus Tswv sawv rov los lawm, Nws tsis nyob hauv qhov ntxa, peb puas txaus siab tso tej “qhov ntxa” tseg kom ua neej muaj yeej rau tus Tswv?
KOOB TSHEEJ NCO TXOG TSWV YEXUS KOVYEEJ KEV TUAG, SAWV ROV QAB LOS, PEB COV UAS YOG TUS TSWV COV MENYUAM TXHUA TUS YUAV TSUM VAMKHOM TUS TSWV LUB ZOG UA NEEJ MUAJ NQIS RAU NWS.
Nyeem Vajluskub hauv peb lub xyoo: Hanpakus 1
Kênh Youtube BHKTHN:
