Klei Aê Diê Blŭ: Y‑Markôs 16:1-8
Êlan kliăng: “Gơ̆ lač kơ diñu, “Đăm huĭ ôh. Kâo thâo diih duah Yêsu ƀuôn Nasaret, Pô arăng pơ̆ng leh ti kyâo bi kal. Ñu kbiă lŏ hdĭp leh. Ñu amâo dôk tinei ôh. Nĕ anei anôk arăng mđih Ñu” (Y‑Markôs 16:6)
Klei êmuh ksiêm mĭn: Phung nao čuă msat tlă anăp hŏng ya klei truh? Si klei msat hŏng kdŏng bi sĭt kơ klei Khua Yang kbiă lŏ hdĭp? Ya klei hriăm drei mă tŭ mơ̆ng klei Khua Yang amâo lŏ dôk hlăm msat ôh?
Aguah ưm hruê tal sa hlăm hruê kăm, phung mniê kbiă nao djă ba êa ƀâo mngưi čiăng nao mia asei mlei Khua Yang. Diñu truh ti msat êjai ang dar yang hruê mrâo ƀlĕ (êlan 1-2). Klei diñu rŭng răng si dưi mŭt hlăm msat kyua boh tâo prŏng snăk kđăl ƀăng msat leh anăn mâo phung kahan gak ktang tĭt (Y‑Mathiơ 27:60, 66). Klei diñu rŭng bliư̆ jing klei bi kngăr snăk tơdah diñu ƀuh boh tâo prŏng kđăl ƀăng msat klŭng leh, leh anăn mâo dĭng buăl jăk bi êdah lač kơ diñu: “kâo thâo diih duah Yêsu ƀuôn Nasaret, Pô arăng pơ̆ng leh ti kyâo bi kal. Ñu kbiă lŏ hdĭp leh. Ñu amâo dôk tinei ôh. Nĕ anei anôk arăng mđih Ñu” (êlan 6).
Anôk arăng mđih Khua Yang ară anei jing sa boh msat hŏng. Anei jing sa klei sĭt nik amâo mâo pô dưi hngah ôh, tơl phung roh hŏng Khua Yang ăt kăn dưi lăm rei snăn diñu duah mnêč êlan mkăn, lač dah phung ƀĭng kna ba mdăp asei mlei Khua Yang Yêsu ti anôk mkăn (Y‑Mathiơ 28:13). Diñu amâo lŏ mĭn ôh si dưi sa êpul mnuih huĭ hyưt ƀuh arăng pơ̆ng msei kđĭn nai diñu ti kyâo bi kal, dôk ktư̆ yơ̆ng asei mlei đuê̆ dăp hlăm sa boh adŭ kđăl krĭp jih jang ƀăng bhă jhŏng nao mă hĕ asei mlei Khua Yang leh anăn hưn Khua Yang lŏ hdĭp leh? Ka lač ôh êdei kơnăn grăp čô hlăm phung diñu hmiêt mkăp klei djiê, si ngă knŏng čiăng mgang mă kơ klei diñu pô blŭ mčeh luar? Amâo tuôm mâo ôh klei msĕ snăn! Knŏng mâo sa klei mblang yơh leh anăn jing klei sĭt nik Khua Yang Yêsu kbiă lŏ hdĭp leh mơ̆ng phung djiê, leh anăn msat hŏng jing klei hưn sĭt kơ klei anei!
Khua Yang amâo adôk hlăm msat ôh, leh anăn phung tui duah Ñu brei đuê̆ kbưi mơ̆ng anăn mơh. Ya mta jing dŏ klei djiê lui ti tluôn leh jih. Klei anei bi hriăm drei brei lui klei soh, khut khat hŏng ñu, đăm lŏ tui duah ñu ôh. Hrô kơ klei anăn brei tui duah klei doh jăk leh anăn dôk hdĭp mâo boh tŭ dưn kơ Khua Yang: “Ƀiădah ară anei kyuadah diih êngiê leh mơ̆ng klei soh diih leh anăn jing leh hlŭn kơ Aê Diê, boh tŭ dưn diih mâo ară anei hĭn jing klei doh jăk, leh anăn klei knhal tuč kơ klei anăn jing klei hdĭp hlŏng lar.” (Rôm 6:22).
Ƀăng msat ăt čiăng bi hmô kơ klei dlưh rai hlăm klei hdĭp mơh, ƀiădah gru êka êlam đei tơl ngă kơ ai tiê djiê kriêp êyăng. Khua Yang lŏ hdĭp čhuang kbiă leh mơ̆ng ƀăng msat, kyuanăn brei drei msĕ mơh čhuang kbiă đuê̆ mơ̆ng anôk tuôm dơr leh ai tiê klei mĭn leh anăn mngăt drei. Wăt tơdah đơ boh prŏng klei ruă êka, đăm drei wơr bĭt ôh klei ktang myang Khua Yang kbiă lŏ hdĭp jing prŏng hĭn kơ jih jang.
Khua Yang kbiă lŏ hdĭp leh, amâo adôk hlăm ƀăng msat ôh, si ngă drei hmiêt mkăp lui ti tluôn jih jang “ƀăng msat” čiăng dôk hdĭp mâo klei dưi hĭn kơ Khua Yang mơ̆?
Wah lač: Mpŭ mni Khua Yang Yêsu kyuadah Ih kbiă lŏ hdĭp leh guh kơang, lui phă tluôn ƀăng msat êăt hriêt anăn. Akâo klei ktang myang Khua Yang bŏ dlai hlăm kâo, đru kâo khut khat lui klei soh, leh anăn hŏng klei ktang kjăp găn hgao jih klei ruă êka kâo pô čiăng dưi dôk hdĭp mâo boh tŭ dưn kơ Khua Yang.
Dlăng Klei Aê Diê Blŭ hlăm tlâo thŭn: Y‑Haƀakuk 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
