Yelemis 34:12-22
Nqe cim:
“Tiamsis nej rov hloov siab thiab saib tsis tau kuv. Nej rov mus coj cov qhev uas nej twb muab tso mus lawm rov los thiab yuam kom lawv ua nej qhev dua…Yog li ntawd, kuv yuav tso nej nyob ywjpheej: yog kev ywjpheej mus tuag rau hauv tshavrog, tuag rau kev tshaib kev nqhis thiab tuag rau kab mob kev nkeeg. Kuv yuav ua kom txhua haivneeg thoob ntiajteb ntshai vim tej uas kuv ua rau nej”(16-17b).
Lus nug rau sawvdaws xav:
– Vajntxwv Xedekiyas raug txim zoo licas?
– Vajntxwv thiab cov nomtswv, tej pejxeem lub neej zoo licas thaum lawv muab tus Tswv tej lus tso tseg?
– Koj kawm tau yam dabtsi hauv Vajtswv cov lus hais ntawm nqe 17?
Tau xaiv tsa los ua vajntxwv coj Vajtswv haivneeg taug Nws txojkev tiamsis vajntxwv Xedekiyas tsis ua tiav lub luag haujlwm ntawd tabmeeg tus Tswv. Vajtswv thiaj rau txim rau nws, yog li vajntxwv kuj raug ntes coj mus ua qhev, luag muab nws cov tub tua tabmeeg nws, kaus nws lub qhov muag, thiab kaw hauv tsev lojcuj mus txog hnub tuag (Yelemis 52:10-11). Ua ntej ntawd, vajntxwv, cov nomtswv, cov povthawj thiab cov pejxeem Yudas twb coglus tso cov neeg ua qhev uas yog cov neeg Henplais raws li tus Tswv samhwm. Lawv kuj ntes nyuj los tua thiab sawvdaws koom noj ua kevcai coglus zoo li thaum ub tus Tswv coglus rau yawg koob Anplahas (Chivkeeb 15:9-10). Tiamsis thaum pom hais tias tsis tshuav yam muaj nqis rau tus kheej ces lawv txawm tso tej lus cogtseg, “rov mus coj cov qhev uas nej twb muab tso mus lawm rov los thiab yuam kom lawv ua nej qhev dua” (nqe 16). Qhov uas lawv ua li no tsis yog qhia tawm lawv tsis ua rau neeg xwb tiamsis yog qhia tawm lub siab ua saib tsis taus tus Tswv lub npe, tsis hwm Vajtswv thiab tsis ua raws li Nws samhwm. Yog li ntawd, tus Tswv thiaj qhia hais tias tej uas lawv ua yuav tau txais yog “…tuag rau hauv tshavrog, tuag rau kev tshaib kev nqhis thiab tuag rau kab mob kev nkeeg. Kuv yuav ua kom txhua haivneeg thoob ntiajteb ntshai vim tej uas kuv ua rau nej” (nqe 17b).
Tus Tswv txojkev cawm Nws haivneeg tawm nram tebchaws Iziv los thiab samhwm rau lawv kom tso cov neeg ua qhev thaum lawv ua haujlwm puv rau lub xyoo (nqe 12-14; Khiavdim 21:2) tiamsis tus Tswv haivneeg tsis mloog thiab tsis ua raws li ntawd. Ua neej nyob hauv tus Tswv zoo nkaus li ua rau lawv tsis muaj kev ywjpheej, yog li lawv xav hais tias ua raws li siab nyiam thiaj ua rau lawv tau “kev ywjpheej”. Yog li tus Tswv thiaj hais tias: “kuv yuav tso nej nyob ywjpheej” txhais tau hais tias tus Tswv yuav tso lawv tseg nyob “ywjpheej” kom ntsib tej kev ntxhov siab uas khiav tawm hauv tus Tswv lub hwjchim mus, “ywjpheej” mus rau hauv qhov kev tuag uas yog cia txojkev “tuag rau hauv tshavrog, tuag rau kev tshaib kev nqhis thiab tuag rau kab mob kev nkeeg” ua haujlwm “ywjpheej” rau lawv!
Nimno, peb niaj hnub hnov tus Tswv qhia rau peb dhau los ntawm Nws Txojlus, cia li ua tib zoo khaws coj. Zaj kawm hnub no ua rau peb ras xeev, thaum tsis ntseeg, tsis ua raws li tus Tswv tej lus samhwm ces yog peb ua saib tsis taus tus Tswv lub npe thiab yeej yuav tau txais tej nqi zog tsis zoo.
Koj coglus rau tus Tswv yam dabtsi? Koj twb ua tiav cov lus cog tseg ntawd rau tus Tswv lawm tau?
Thov Vajtswv,
Kuv tus Vajtswv muaj kev hlub! Thov Koj pab kom nyuam yaus tau txais kev kaj siab thaum nkaum rau hauv Koj phab tis, kom nyuam yaus tsis txhob tawm hauv Koj mus ua tej yam uas tawmtsam Koj Txojlus qhia. Amees.
Nyeem Vajluskub hauv peb lub xyoo: Phau Ntawv Nkauj 83:1-84:12
Kênh Youtube BHKTHN:
