II Xwmtxheej Vajntxwv 25:17-24
Nqe cim:
“Kev khavtheeb coj mus raug kev puastsuaj, thiab kev muab hlob yuav poob ntsejmuag” (Pajlug 16:18)
Lus nug rau sawvdaws xav:
– Vajntxwv Amaxiyas kev khavtheeb tshwm tawm zoo li cas?
– Tus nqis raug them ntawm kev khavtheeb yog dab tsi?
– Puas muaj tej zaug peb khavtheeb li Vajntxwv Amaxiyas?
Tom qab uas Vajntxwv Amaxiyas tsis mloog tus cev lus tej lus ceebtoom txog qhov uas nws mus pe mlom, cov Yudas tus Vajntxwv xav txhij tub rog mus tua cov Yixalayees nyob rau sab qaum teb. Vajntxwv khavtheeb kawg li, vim qhov uas nws tua yeej cov Edoos lawm (nqe 19). Vajntxwv tsis nco qab thiab tsis pom hais tias Vajtswv yog tus pab tua yeej rog (2 Xwmtxheej 25:5, 11-12). Tom qab uas sablaj nrog nws cov tuavxam tas, Vajntxwv tsis nug saib tus Tswv qhia li cas, nws cia li cuag tus ruam mloog raws nws cov tuavxam tej lus, txib neeg mus tso xov rau cov Yixalayees tus Vajntxwv Yehau-as hais tias “cia li tuaj kom peb tau sib ntsib”. Qhov ntawd txhais hais tias, kom peb tuaj sib ntaus sib tua tim ntsej tim muag! Nyob rau lub tsamthawj ntawd, Vajntxwv Yehau-as ntuas Vajntxwv Amaxiyas hais tias, tsis txhob sib ntaus sib tua tsam cov Yixalayees thiab cov Yudas puavleej raug puastsuaj. Vajntxwv Amaxiyas tsis mloog li, tus Tswv thiaj tsis quavntsej nws thiab muab Amaxiyas cob rau yeebncuab, vim nws mus pe cov Edoos tej mlom lawm.
Cov Yixalayees tus Vajntxwv Yehau-as thiaj txhij tub rog tuaj nrog cov Yudas tus Vajntxwv Amaxiyas sib ntaus sib tuas, lawv tuaj ua ke thiab sib tuas ntawm qhov chaw Npethees Semes hauv tebchaws Yudas (nqe 21). Thaum kawg cov Yudas raug swb, Vajntxwv Amaxiyas raug ntes thiab cab los rau hauv nroog Yeluxalees ua tus txaj muag ntsuav. Vajntxwv Yehau-as tsoo tus ntsa yeej thaiv lub nroog pob puas tas mus txog 200 tshim, nws muab tej nyiaj kub, tej cuabyeej hauv Tuamtsev nrog rau tej khoom muaj nqis hauv Vajntxwv lub loog thiab tej neeg uas nws ntes tau coj mus rau pem Xamalis lawm.
Vajntxwv Amaxiyas txoj kev khavtheeb ua rau nws thiab lub tebchaws Yudas raug puastsuaj. Tsim nyog nws tau tus Tswv foom koobhmoov los ntawm tej uas nws ua tau (2Xwmtxheej 11:5-12; 14:6-7), tiamsis tus ntsa yeej thaiv lub nroog Yeluxalees ho raug rhuav puastsuaj tas; tsimnyog vajntxwv tau zoo noj tau zoo nyob thiab muaj txhua yam tiamsis tej ntawd raug huab mus tas, tsimnyog nws muaj tubki coob tiamsis nws cov neeg raug ntes mus tas; tsimnyog tau kev thajyeeb tiamsis muaj kev kub ntxhov; tsimnyog Vajntxwv tau tus Tswv pab kom kovyeej tiamsis nws raug swb thiab yog tus neeg raug txim, vim qhov nws khavtheeb!
Thaum uas muab tus kheej saib hlob dua txhua yam, saib yus tseemceeb thiab paub tshaj lwm tus, thaum ntawd dhau mus ua tus neeg khavtheeb, saib tsis taus lwm tus thiab tsis mloog cov neeg muaj kev ntseeg tej lus qhuab ntuas. Yog tsis mloog Vajtswv lus, peb yuav ua neej li peb lub siab nyiam. Thaum ua neeg khavtheeb lawm, tsis xav mloog Vajtswv lus thiab peb yim hnub yim ua tej haujlwm ruam, tsis muaj qabhau hauv lub neej, thiab thaum kawg yuav mus txog rau kev “puastsuaj” sab nqaij tawv thiab sab ntsujplig huv tibsi ib yam li Amaxiyas.
Thov Vajtswv:
Vajtswv, thov pab nyuam yaus paub ua neej txo hwjchim txhua lub sijhawm, tshwjxeeb yog kev ua Koj haujlwm hauv Pawg Ntseeg, kom nyuam yaus lub neej thiaj tsis raug puastsuaj vim kev khavtheeb. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas xav hais tias tus kheej txawjntse tshaj txhua tus nyob hauv Pawg Ntseeg?
Nyeem Vajluskub hauv peb lub xyoos: Henplais 3
Kênh Youtube BHKTHN:
