Klei Aê Diê Blŭ: II Klei Yăl Dliê 25:17-24
Êlan kliăng:“Klei mgao nao êlâo kơ klei rai luč, leh anăn klei krưh nao êlâo kơ klei lĕ” (Klei Bi Hriêng 16:18)
Klei êmuh ksiêm mĭn: Si ngă Mtao Y-Amasia bi êdah klei ñu mgao? Ya jing ênoh srăng tla kơ klei mgao? Drei tuôm mơ̆ jing mgao msĕ si Mtao Y-Amasia?
Leh hngah amâo čiăng hmư̆ ôh klei khua pô hưn êlâo Aê Diê ƀuah klei soh kkuh mpŭ kơ rup yang, Mtao Yuđa, Y-Amasia lŏ čiăng ba kahan nao bi blah hŏng ƀuôn ala mtao phung Israel ti dưr. Mtao jing leh sa čô mnuih krưh leh anăn mgao, bi mđĭ ñu pô leh ñu dưi hŏng phung Êđôm (êlan 19), amâo lŏ hdơr leh anăn amâo čiăng yap ôh Aê Diê pô yơh brei leh klei dưi kơ ñu (II Klei Yăl Dliê 25:5, 11-12). Leh anăn năng ai wăt ñu čiăng rŭ ênua kơ phung kahan bi blah mưn mơ̆ng phung Israel bi mdjiê leh mnuih, leh anăn tlĕ mă dŏ dô tơdah leh ñu suôt digơ̆ wĭt kơ sang amâo brei nao bi blah ôh (II Klei Yăl Dliê 25:10). Leh bi trông čhai hŏng phung dĭng ktang ñu, hrô kơ klei êmuh Aê Diê, hŏng klei mluk Mtao Y-Amasia gưt hĕ kơ klei phung anăn kčĕ, tiŏ nao mnuih bi riêl Y-Jôas, mtao phung Israel snei, “hriê bĕ brei drei bi dlăng ƀô̆ mta” lŏ mblang jing hriê bĕ brei bi blah tlă anăp drei dua!Dôk ti anăp klei anăn, Y-Jôas mtao Israel lač mtao Yuđa đăm bi blah ôh huĭdah Israel leh anăn Yuđa srăng dlưh. Mtao Y-Amasia amâo čiăng hmư̆ ôh, Aê Diê lui ñu bi khăng ai tiê čiăng jao ñu hlăm kngan phung roh kyuadah ñu tui duah leh yang phung Êđôm.
Y-Jôas mtao Israel ba kahan nao bi blah hŏng Y-Amasia mtao Yuđa, diñu dăp kahan bi tlă anăp ti kdrăn blah ƀuôn Ƀêt-Sêmes (êlan 21). Ti knhal tuč kahan phung Israel dưi hŏng phung Yuđa, Mtao Y-Jôas mă Mtao Y-Amasia hdĭp atăt ba ñu kơ ƀuôn Yêrusalem bŏ hŏng klei hêñ. Mtao Y-Jôas bi hluh hlăm brô dua êtuh met mnư̆ tĭng nah dưr ƀuôn Yêrusalem, mă jih prăk mah, čhiên mngan yua hlăm Sang Aê Diê, wăt ngăn drăp sang mtao leh anăn phung mnuih, leh anăn ñu lŏ wĭt kơ ƀuôn Samari.
Klei mgao Mtao Y-Amasia atăt truh kơ klei ngă soh leh anăn klei rai tuč kơ ñu pô leh anăn ƀuôn ala mtao čar Yuđa. Hrô kơ klei mă tŭ klei jăk jĭn Aê Diê brei hŏng lu boh sang mdơ̆ng leh (II Klei Yăl Dliê 11:5-12; 14:6-7) ară anei mnư̆ ƀuôn Yêrusalem arăng bi rai leh, hrô kơ klei čăt đĭ mtao tŭ klei arăng tlĕ dăp, hrô kơ Aê Diê brei klei dưi ară anei mtao lĕ leh hlăm klei bi blah leh anăn jing sa čô mnă!
Tơdah bi mđĭ drei pô, dlăng kơ drei pô jing yuôm hĭn leh anăn thâo hĭn kơ pô mkăn snăn drei nao kơ klei mgao, dlăng hơăi mang kơ mnuih mkăn, amâo hmư̆ ôh klei phung huĭ mpŭ kơ Aê Diê kčĕ. Mơ̆ng anăn srăng atăt drei kơ klei srăng hngah mơh kơ Klei Aê Diê Blŭ čiăng ngă tui si klei drei pô čiăng. Tơdah jing leh sa čô mnuih mgao, amâo čiăng gưt asăp kơ Khua Yang ôh, snăn ƀrư̆ hruê drei srăng mâo lu bruă ngă hŏng klei mluk, klei khŏ hĭn hlăm klei hdĭp, sĭt nik drei srăng nao kơ anôk “rai tuč” hlăm mngăt wăt asei mlei msĕ si Mtao Y-Amasia mơh.
Si ngă drei ƀuh kơ drei pô jing mnuih knhâo thâo lu leh anăn yuôm bhăn hĭn kơ pô mkăn hlăm Phung Sang Aê Diê mơ̆?
Wah lač: Ơ Khua Yang, đru kâo thâo luă gŭ nanao grăp mnĭt mmông, boh nik nak hlăm klei kâo mă bruă kơ Ih mbĭt hŏng Phung Sang Aê Diê čiăng kơ klei hdĭp kâo amâo srăng lĕ hlăm klei soh leh anăn rai tuč kyua klei kâo mgao ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Hêbrơ 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
