Yakaunpaus 1:12
Nqe cim:
“Tus uas ua siab ntev nyiaj tej kev nyuaj siab, tus ntawd yuav tau nyob kaj siab lug. Rau qhov thaum nws tiv dhau tej kev sim siab ntawd lawm, nws yuav tau txojsia uas Vajtswv coglus tseg lawm hais tias Vajtswv yuav muab rau tus uas hlub Vajtswv” (Yakaunpaus 1:12)
Lus nug rau sawvdaws xav:
– Txhua tus uas hlub Vajtswv, ncaj ncees hla dhau tej kev sim siab yuav tau txais lolus cogtseg twg?
– Lolus “lub mom kub uas yog txojsia” muaj lub ntsiab dab tsi?
– Peb totaub li cas txog tus uas tau koob hmoov?
Yakaunpaus sau ntawv xa mus rau kaum ob xeem Yixalayees uas khiav mus nyob rau txhua qhov chaw uas tabtom ntsib ntau yam kev txomnyem sim siab, Yakaunpaus txhawb lawv hais tias txhua tus uas hlub Vajtswv, thaum uas hla dhau tej kev sim siab yuav tau txais “lub mom kub uas yog txojsia”. Nov yog lub zog uas pab lawv ua taus siab ntev nyiaj tej kev sim siab, txomnyem thiab ceev ruaj kev ntseeg, txawm txhua lub sijhawm yuav muaj li cas los xij vim Vajtswv coglus twb npaj txhij nqis zog yuav muab rau tus uas ua ncaj ncees.
Thaum uas hais txog “Mom kub”, txhua tus ntseeg xubthawj yuav totaub kiag hais tias ntawd yog tus duab ntawm lub kauj kub uas txhua tus tub sib tw kovyeej tau ntoo rau saum taubhau. “Lub mom kub uas yog txojsia” Yakaunpaus hais ntsig txog “txojsia”, taw txog nqi zog yog txojsia ib txhis uas npaj cia rau cov uas hlub Vajtswv thiab qhia tshwm kev ntseeg dhau ntawm tej kev sim siab. Yuavtsum qhia meej meej hais tias txojsia ib txhis tsis yog los ntawm tibneeg kev siv zog los, vim ntawd yog Vajtswv qhov khoom plig, tsuas yog txhua tus uas ntseeg thiaj tau txais xwb (Efexus 2:8-10). Tiamsis, zoo li qhov uas Yakaunpaus hais mus hais los hauv nws tsab ntawv, kev ntseeg tseeb yuavtsum qhia tshwm haujlwm, tshwjxeeb yog thaum uas ntsib tej kev sim siab ces tus ntseeg Vajtswv tseeb yuav ncaj ncees sawv ruaj mus txog thaum kawg.
Lolus no tej thaum yog lolus xaus rau ntu qhib thawj hauv tsab ntawv hais txog “raug ntau yam kev nyuaj siab”. Ntu ua ntej, Yakaunpaus piav qhia kev sim siab pab peb paub ua taus siab ntev, loj hlob rau hauv kev ntseeg, paub vamkhom Vajtswv, tsis yog tso siab rau yus tus kheej, thiab paub ua neej saib pom lub neej uas yuav nyob mus ib txhis. Yakaunpaus xaus lus los ntawm lolus cogtseg thaum uas hla dhau kev sim siab, peb yuav tau txais “Lub mom kub uas yog txojsia”. Ntawd lub vimchiv “nyiaj tej kev nyuaj siab” yog “koob hmoov” ntawm tus ntseeg Vajtswv, zoo ib yam li timthawj Paulus tau hais, “Tej teebmeem me me uas peb raug ib nyuag ntu no, yuav ua rau peb tau txoj koob hmoov zoo uas yuav nyob mus ibtxhis, tej teebmeem uas peb raug yeej piv tsis tau txoj koob hmoov uas peb tau li” (2 Kauleethaus 4:17). “Koob hmoov” ntawm tus neeg ntseeg Vajtswv tsis yog lub neej poob qis, tsis muaj qabhau, tiamsis yog kev zoo siab thaum uas pom lub neej kev ntseeg yim hnub yim loj hlob, ntseeg ruaj rau Vajtswv heev dua thiab nyob tos rawv yuav mus ntsib Nws tebchaws. Thov Vajtswv pab peb hla dhau txhua yam kev sim siab hauv kev ua neej thiab ncaj ncees rau Vajtswv mus txog hnub kawg.
Thov Vajtswv:
Vajtswv, nyuam yaus ua Koj tsaug vim lolus cogtseg txog txojsia ib txhis npaj cia rau txhua tus uas hlub Vajtswv, ncaj ncees qhia tshwm kev ntseeg mus txog thaum kawg. Nyuam yaus tseem nyob rau hauv lub neej muaj txhua yam kev sim siab puv npo, thov pab nyuam yaus sawv ruaj rau hauv kev ntseeg kom tau txais lub mom kub uas yog txojsia. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Vajtswv lolus cogtseg txog txojsia ib txhis pab peb li cas thaum uas ntsib tej sim siab niaj hnub nimn
Nyeem Vajluskub hauv peb lub xyoos: Cov Thawjtswj 3
Kênh Youtube BHKTHN:
