Klei Aê Diê Blŭ: Y-Yakơ 1:12
Êlan kliăng: “Jăk mơak yơh kơ mnuih gĭr tŭ klei lông dlăng, kyuadah tơdah ñu dưi leh, ñu srăng mă tŭ đuôn mtao klei hdĭp Aê Diê ƀuăn leh kơ phung khăp kơ ñu.” (Y-Yakơ 1:12)
Klei êmuh ksiêm mĭn: Phung khăp kơ Khua Yang, sĭt suôr gĭr tŭ klei lông dlăng srăng mâo ya klei ƀuăn? Si mblang boh blŭ “đuôn mtao klei hdĭp”? Si drei thâo săng kơ phung mâo klei jăk mơak?
Čih hră kơ phung đăo mơ̆ng pluh dua êpul djuê ana dôk hdĭp bru bra, tlă anăp hŏng lu klei dleh dlan lông dlăng, Y-Yakơ mđĭ ai diñu phung khăp kơ Aê Diê, tơdah găn klei lông dlăng srăng mă tŭ “đuôn mtao klei hdĭp”. Anei jing klei mđĭ ai đru diñu gĭr găn klei lông dlăng leh anăn djă pioh klei đăo wăt tơdah klei hdĭp si srăng jing kyua Aê Diê ƀuăn Ñu mprăp leh klei mưn kơ phung sĭt suôr.
Tơdah lač kơ “đuôn mtao klei hdĭp”, phung dlăng hră ênuk tal êlâo srăng thâo săng mtam anăn jing rup mơ̆ng kwang mnga klei dưi kơ phung bi lông mjuăt asei mlei dưi hlăm klei bi lông ktưn hưn dưi truă ti kŏ. “Đuôn mtao klei hdĭp” Y-Yakơ lač jing truh kơ “klei hdĭp”, lač kơ klei mưn jing klei hdĭp lă lar kơ hlei pô khăp kơ Khua Yang leh anăn bi êdah klei đăo kjăp găn klei lông dlăng. Brei bi mklă klei hdĭp lă lar amâo djŏ hlăm klei gĭr anak mnuih ôh kyua anăn jing mnơ̆ng Aê Diê brei kơ drei knŏng dưi mă tŭ kyua klei đăo đuč (Êphêsô 2:8-10). Khădah snăn, msĕ si Y-Yakơ mñă nanao hlăm hră ñu čih, klei đăo sĭt brei bi êdah hlăm bruă ngă, boh nik tơdah tuôm hŏng klei lông dlăng snăn phung đăo kơ Khua Yang klă sĭt srăng sĭt suôr djă pioh klei đăo truh knhal tuč.
Klei anei dưi dlăng msĕ si klei klah čŭn mơ̆ng kdrêč mphŭn kčưm hră Y-Yakơ lač kơ “lu klei lông dlăng”. Hlăm klei čih êlâo anăn, ñu mblang leh klei lông dlăng đru drei thâo gĭr čiăng hriê kơ prŏng hlăm klei đăo, thâo knang kơ Khua Yang đăm ôh yua ai hjăn, leh anăn thâo hdĭp hŏng klei mĭn kơ klei hdĭp hlŏng lar. Ñu klah čŭn hŏng klei ƀuăn tơdah găn klei lông dlăng, drei srăng mă tŭ “đuôn mtao klei hdĭp”. Anăn jing mta phŭn ya ngă “gĭr tŭ klei lông dlăng” jing “jăk mơak” kơ phung đăo kơ Khua Yang, msĕ si Khua ƀĭng kna Y-Pôl lač leh, “Kyuadah klei knap mñai hdjul bhiâo anei mjing kơ hmei klei guh kơang prŏng hĭn hlŏng lar êgao kơ arăng dưi mkă” (II Kôrantô 4:17). “Jăk mơak” mơ̆ng phung đăo kơ Khua Yang amâo djŏ jing sa klei hdĭp mâo lu mmông wăn ôh ƀiădah jing klei mơak tơdah ƀuh klei hdĭp klei đăo ƀrư̆ hriê kơ prŏng. Đăo knang hĭn kơ Khua Yang, leh anăn čang hmăng hruê dưi bi tuôm hŏng Ñu hlăm Ƀuôn ala mtao guh kơang. Akâo kơ Khua Yang đru drei găn djăp klei lông dlăng hlăm klei hdĭp leh anăn sĭt suôr hŏng Khua Yang truh knhal tuč.
Klei ƀuăn kơ klei hdĭp hlŏng lar hŏng Khua Yang đru diih si ngă tơdah tuôm hŏng klei dleh dlan ară anei?
Wah lač: Ơ Khua Yang, kâo bi mni kơ Ih kyua klei ƀuăn kơ klei hdĭp hlŏng lar kơ hlei pô khăp, sĭt suôr, bi êdah klei đăo truh knhal tuč. Hdĭp ti krah klei hdĭp bŏ hŏng lông dlăng, akâo kơ Ama thiăm ai ktang kơ kâo čiăng kâo dôk kjăp nanao hlăm klei đăo leh anăn tui duah đuôn mtao klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
