Pajlug 3:9-10
Nqe cim:
“Yog koj ua li ntawd, koj yuav muaj qoobloo puv txhab, thiab koj yuav muaj cawv txib hmab ntau heev tsis muaj hub ntim tas.” (Pajlug 3:10).
Lus nug rau sawvdaws xav:
- Qhov uas siv nyiaj txiag, khoom txhua yam fij rau tus Tswv peb yuav tau nqi zog dabtsi?
- Qhov no txhawb tau peb lub zog li cas?
Malakis 3:10 qhia kom cia li fij khoom, tus Tswv yuav qhib rooj ntug nchuav koob hmoov ntau npluamias los. Thiab Pajlug 3:10 hais tias nqi zog ntawm qhov kev fij khoom yog tus Tswv pub ntau heev tsis muaj chaw ntim tas. Yog li ntawd, puas yog thaum peb fij khoom, tus Tswv yuav pub kom peb npluanuj?
Hais rau ib seem twg, lo lus teb mas TSIS YOG, vim ua li ntawd tsis yog qhuas tus Tswv tiamsis yog peb tabtom siv Nws. Nqe 9 hais meej hais tias fij khoom yog “hwm tus Tswv”. Tus Tswv yeej pub tau kom peb muaj ntau yam, tsis yog pub kom npluanuj xwb tiamsis qhia kom peb siv tej nyiaj txiag txhua yam los qhuas Nws. Cia peb saib zaj lus Tswv Yexus hais hauv Lukas 19:12-27, ib tug nom mus deb thiab hu cov tubtxib los muab nyiaj rau lawv coj mus ua lag luam kom tsam nyiaj rau nws. Tus uas ua tsam 10 choj nws tau kav 10 lub nroog thiab ntxiv 1 choj nyiaj rau tus uas ua tsam nyiaj rau tus tswv. Tus tswv muab ntxiv rau tus tubtxib ntawd ua dabtsi? Cia kom nws rov mus ua ntxiv rau tus tswv. Tus neeg uas siv tej uas yus muaj kom zoo ces nws yuav tau ntau yam thiab siv zoo dua.
Qhov tseeb tiag, yeej muaj ntau tus neeg hwm tus Tswv thiab mloog Nws lus, ncaj ncees rau kev fij khoom tiamsis tseem ua neej txomnyem ntsuav. Yog li, nqe Pajlug no hais puas yog? Muaj ob yam peb cheemtsum paub: Tim ib, cov lus cog tseg tsis yog muaj tiav kiag nyob hauv lub ntiajteb uas muaj kev txhaum kav no. Nyob ntawm Vajtswv lub siab nyiam, ntau zaus peb yuav tau xyaum ua neej txomnyem thiaj tau mus txais nqi zog rau lub neej tom ntej (Pajlug 3:11-12). Cia li nco ntsoov lub neej tamsim no tsis tau yog lub neej zoo, tiamsis qhov zoo nyob mus ibtxhis. Txawm yog yuav ua neej nyob ntev hauv lub ntiajteb, npluanuj lossis muaj dag zog li cas los yeej tsis tau yog lub neej zoo kawg nkaus uas tus Tswv coglus pub rau peb. Tim ob, peb tsis muaj leejtwg coj tau raws li tus Tswv tej lus qhia, yog li tej uas Nws pub rau peb yog koob hmoov pub dawb nkaus xwb! Peb coglus tas tsis ua, peb yog neeg txhaum…, tiamsis tus Tswv hlub peb thiab npaj txhua yam koob hmoov zoo kawg nkaus rau peb, yog li Nws cia peb raug txomnyem thiab qhia kom peb ua tau neeg zoo. Cia peb ua lub neej zoo li tus qauv hauv phau ntawv Hanpakus 3:17-18:“Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoobloo tsis tuaj, txawm yog tej yaj tuag tas thiab tej nkuaj nyuj khoob lug cia xwb los kuv tseem muaj kev zoo siab thiab txaus siab, vim muaj tus Tswv uas yog Vajtswv ua kuv tus Cawmseej.”
Thov Vajtswv,
Tus Tswv, thov Koj zam txim rau nyuam yaus thaum nyuam yaus coglus rau Koj tiamsis tsis ua li ntawd. Thov Koj pub kom nyuam yaus txaus siab rau tej uas Koj pub thiab siv ua rau Koj tau ntsejmuag. Amees.
Peb puas txaus siab rau tej uas peb muaj lawm tau?
Nyeem Vajluskub hauv peb lub xyoos: Yelemis 22:1-23
Kênh Youtube BHKTHN:
