Klei Aê Diê Blŭ: Klei Bi Hriêng 3:9-10
Êlan kliăng: “Snăn hjiê ih srăng bŏ dlai, leh anăn čeh ih srăng bŏ ƀim hŏng kpiê mrâo.” (Klei Bi Hriêng 3:10)
Klei êmuh ksiêm mĭn: Ya boh tŭ dưn mâo mơ̆ng klei myơr prăk kăk ngăn drăp pioh mpŭ mni kơ Yêhôwa? Si klei anei bi mđĭ ai drei?
Y‑Malaki 3:10 mtô brei myơr, Khua Yang srăng pŏk ƀăng bhă điêt ti dlông adiê tuh klei jăk jĭn êbeh dlai tơl amâo mâo anôk mkăm pioh. Leh anăn Klei Bi Hriêng 3:10 lač snei, boh tŭ dưn mơ̆ng klei myơr jing klei mdrŏng sah êbeh dlai Khua Yang brei. Snăn djŏ mơ̆ tơdah drei myơr, Khua Yang srăng brei drei jing mdrŏng hĭn?
Klei wĭt lač kơ sa nah tĭng jing HƠĂI kyua tơdah snăn, Khua Yang amâo srăng mâo klei mpŭ ôh ƀiădah jing hĕ drei dôk mjhua Ñu. Êlan 9 lač klă mngač klei myơr jing pioh “mpŭ kơ Yêhôwa” . Ƀiădah klei wĭt lač kơ sa nah tĭng mkăn jing MÂO. Tơdah drei myơr, Khua Yang srăng dưi brei kơ drei mâo lu hĭn, amâo djŏ čiăng kơ drei jing mdrŏng hĭn ôh ƀiădah čiăng kơ drei ăt yua ngăn drăp prăk kăk mpŭ mni kơ Ñu hĭn. Lŏ wĭt kơ klei yăl dliê bi hriêng hlăm Y‑Luk 19:12-27, mâo sa čô mnuih arăng mpŭ đuĕ nao kơ čar kbưi čiăng mă tŭ klei dưi jing mtao leh anăn ñu jao kơ pluh čô dĭng buăl grăp čô sa asăr prăk. Pô lŏ bi đĭ jing 10 asăr prăk mâo klei dưi kiă kriê pluh boh ƀuôn leh anăn lŏ thiăm sa asăr prăk mơ̆ng pô amâo bi đĭ ôh kơ khua ñu. Ya ngă khua lŏ brei thiăm kơ dĭng buăl anei? Čiăng kơ pô anăn lŏ bi đĭ kơ khua ñu. Hlei pô thâo yua jăk ya dŏ ñu mâo srăng lŏ mâo lu hĭn čiăng dưi yua jăk hĭn mơh.
Hlăm klei boh sĭt mâo lu mnuih huĭ mpŭ kơ Aê Diê leh anăn gưt asăp kơ Ñu, sĭt suôr myơr ƀiădah dôk hdĭp hlăm klei ƀun ƀin dleh knap. Snăn si ngă Klei Bi Hriêng jing djŏ mơ̆? Mâo dua mta klei brei drei mđing mĭn: Tal sa, klei ƀuăn brei amâo djŏ ôh bi sĭt mtam nanao hlăm lăn ala soh jhat msĕ snei. Hlăm klei čiăng jăk mơ̆ng Aê Diê, lu blư̆ brei drei mjuăt hriăm tŭ klei dleh knap hlăm lăn ala anei leh anăn dưi mă tŭ klei mưn hlăm ênuk êdei (Klei Bi Hriêng 3:11-12). Brei drei hdơr, klei hdĭp drei ară anei amâo djŏ ôh jing klei hdĭp jăk hĭn kơ drei, ƀiădah hlăm ênuk hlŏng lar. Wăt tơdah dŭm sui dôk hdĭp ti lăn ala, mdrŏng sah amâodah suaih asei mlei, anôk anei amâo djŏ klei hdĭp jăk hĭn Khua Yang ƀuăn brei kơ drei ôh. Tal dua, amâo mâo sa čô hlăm phung drei jing phung anak dưi djă pioh ênŭm klei bi mguôp hŏng Khua Yang ôh, kyuanăn ya klei Khua Yang brei kơ drei jing klei pap prŏng prĭn leh! Drei khăng amâo bi sĭt ôh klei drei ƀuăn, ngă klei soh…, ƀiădah kyua khăp kơ drei leh anăn čiăng mprăp brei kơ drei klei jăk jĭn prŏng snăn Ñu dưm drei hlăm klei găn dleh dlan leh anăn klei lông dlăng čiăng mkra mjuăt drei. Brei drei hdĭp nanao hŏng ai tiê klei mĭn msĕ si Y‑Haƀakuk 3:17-18: “Wăt tơdah ana boh hra amâo bi mnga ôh, kăn mâo boh rei ti phŭn boh kriăk ƀâo, wăt tơdah srăng kƀah boh ôliwơ leh anăn hma amâo brei mnơ̆ng ƀơ̆ng huă ôh, wăt tơdah biăp bê srăng luč mơ̆ng war leh anăn amâo mâo êmô hlăm war ôh dưn, ăt kâo srăng hơ̆k hlăm Yêhôwa, kâo srăng mơak hlăm Aê Diê Pô Bi Mtlaih kâo.”
Si ngă drei mâo klei mơak nanao hlăm klei hdĭp mơ̆?
Wah lač: Ơ Khua Yang, pap brei kơ kâo đa tơdah kâo amâo bi sĭt klei kâo ƀuăn hŏng Khua Yang. Brei kâo mơak nanao hŏng ya mnơ̆ng Khua Yang brei leh anăn êlâo hĭn myơr kơ Khua Yang čiăng bi guh kơang kơ Anăn Ih.
Dlăng Klei Aê Diê Blŭ hlăm tlâo thŭn: Y‑Yêrêmi 22:1-23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
