Mathais 11:25-27
Nqe cim:
“…Txiv, koj yog tus Tswv uas kav lub ntuj thiab lub ntiajteb no! Kuv ua Koj tsaug, rau qhov koj twb muab tej no zais cia tsis qhia rau cov neeg muaj tswvyim thiab txawj ntse paub, tiamsis Koj qhia tej ntawd rau cov neeg uas tsis txawj tsis ntse paub xwb” (Mathais 11:25b).
Lus nug rau sawvdaws xav:
- Vajtswv zais yam dabtsi rau leejtwg thiab qhia dabtsi rau leejtwg?
- Vim licas Nws ua li ntawd?
- Peb txojkev sib raug zoo nrog tus Tswv zoo licas lawm?
- Vim licas tus Tswv xav kom peb vamkhom Nws?
Txuas ntxiv lub ntsiab ntawm Mathais 11:2-24, Tswv Yexus qhuas Vajtswv yog tus Tswv ntawm lub ntuj thiab lub ntiajteb, vim Nws “twb muab tej no zais cia tsis qhia rau cov neeg muaj tswvyim thiab txawj ntse paub” xav hais txog qhov tseeb sab ntsujplig thiab tej yam zoo nyob hauv Tebchaws Ceebtsheej. Vim licas cov neeg muaj tswvyim thiab txawjntse tsis paub? Vim lawv muaj lub siab tawv thiab khavtheeb, lawv tsis lees hais tias lawv yog neeg txhaum cheemtsum tau tus Tswv zamtxim kom tau mus nyob hauv Tebchaws Ceebtsheej, lawv kuj tsis lees yuav Tswv Yexus ua tus Tswv kav lawv lub neej vim tej kev txhaum, kev ntshaw thiab kev muab hlob ua lawv tus tswv lawm. Cov neeg no yog cov uas qhuas hais tias lawv yog neeg muaj tswvyim thiab txawjntse tiamsis lawv tsis xam pom txog kev txomnyem sab ntsujplig, lawv thiaj tsis quaj ntsuag rau tus Tswv kom tau zam txim. Tiamsis vim licas Tebchaws Ceebtsheej ho tau muab qhia rau “cov neeg uas tsis txawj tsis ntse”, lossis lwm phau txhais hais tias “tej menyuam yaus”? Tej menyuam yaus yuav tsum vamkhom lwm tus kom tau noj haus, ua si, thiab kawm xyaum. “Tej menyuam yaus” ntawm no yog hais txog nplooj siab dawb, txo hwjchim, tso siab plhuav rau tus Tswv.
Kev sib txawv ntawm cov neeg uas muaj tswvyim, txawjntse thiab tej menyuam yog kev sib txawv ntawm tus neeg uas xav hais tias nws muaj peevxwm cawm tau tus kheej thiab tus neeg uas paub hais tias nws pab tsis tau nws tiamsis yuav tsum cia siab ntsoov rau Tswv Yexus. Tus neeg tau mus nyob Tebchaws Ceebtsheej yuav tsum paub hais tias nws tau txais Vajtswv txoj koobhmoov uas loj kawg nkaus los ntawm Cawmseej Yexus lawm, ntawd yog yam uas haum Leej Txiv lub siab nyiam. Tswv Yexus thiab Leej Txiv yog tib tug (Yauhas 10:30) yog li ntawd tsuas muaj Leej Txiv thiaj paub Nws thiab Nws paub Leej Txiv. Tsuas yog los ntawm Tswv Yexus xwb peb thiaj paub tau Vajtswv.
Txhua tus ntseeg yuav tsum ntsuam xyuas tus kheej saib peb txais yuav tus Tswv Txojmoo Zoo los ntawm tus cwjpwm zoo licas, puas yog los ntawm nplooj siab dawb paug, txo hwjchim thiab tso siab plhuav zoo li tej menyuam yaus; lossis yuav xav hais tias peb twb ua ntau yam rau tus Tswv lawm, ces peb yeej yuav tau txais cawmdim xwb xwb? Yog tseem pheej xav hais tias tus kheej yog neeg txawjntse, pom deb paub dav ces peb tsis tau muaj feem hauv Tebchaws Ceebtsheej. Yuav tsum nco ntsoov hais tias, Tswv Yexus xaiv peb, qhia rau peb paub txog Tebchaws Ceebtsheej vim Nws hlub peb, Nws xav kom peb muaj kev sib raug zoo nrog Nws, vamkhom Nws, peb thiaj yuav txais tau yam zoo hauv Vajtswv. Tus Tswv tsis zais tej yam zoo tsis qhia rau peb paub tiamsis qhov tseemceeb yog peb puas txais yuav tej ntawd zoo li tej menyuam uas muaj nplooj siab dawb paug, txo hwchim thiab tso siab plhuav rau tus Tswv xwb.
Thov Vajtswv,
Tus Tswv, thov pab nyuam yaus zeem paub nyuam yaus txomnyem sab ntsujplig kom paub vamkhom Koj txhua lub sijhawm. Thov pab nyuam yaus paub txo hwjchim thiab tso siab plhuav rau Koj kom nyuam yaus paub txog Koj txhua hnub. Amees.
Peb puas txais yuav tej uas tus Tswv qhia los ntawm nplooj siab dawb paug zoo li tus menyuam yaus lawm tau?
Nyeem Vajluskub hauv peb lub xyoos: Yelemis 9:23-10:18
Kênh Youtube BHKTHN:
