Klei Aê Diê Blŭ: Y‑Mathiơ 11:25-27
Êlan kliăng: “…Ơ Ama, Khua Yang adiê leh anăn lăn ala, kyuadah Ih mdăp klei anei kơ phung thâo mĭn leh anăn thâo săng, ƀiădah bi êdah leh kơ phung hđeh điêt” (Y‑Mathiơ 11:25b)
Klei êmuh ksiêm mĭn: Ya klei Aê Diê mdăp leh hŏng hlei pô leh anăn bi êdah kơ hlei pô? Ya ngă Ñu ngă snăn? Si klei bi mguôp drei hŏng Aê Diê ară anei? Ya ngă Khua Yang čiăng drei knang kơ Ñu?
Lŏ čuê klei blŭ hlăm Y‑Mathiơ 11:2-24, Khua Yang Yêsu bi mni kơ Aê Diê jing Khua Yang adiê leh anăn lăn ala kyua Ñu mdăp leh “klei anei” hŏng phung thâo mĭn, thâo săng. “Klei anei” lač kơ klei sĭt nik hlăm mngăt leh anăn dŭm klei jăk hĭn hlăm Lăn Adiê. Ya ngă phung thâo mĭn leh anăn thâo săng amâo lŏ thâo săng? Ya ngă klei ai tiê khăng leh anăn klei diñu ngă mgao, diñu amâo lač ôh pô jing sa čô mnuih soh čiăng kơ Aê Diê pap brei čiăng dưi mŭt hlăm Ƀuôn Ala Mtao Adiê, diñu ăt kăn tŭ mă Khua Yang Yêsu jing Khua klei hdĭp pô kyua klei soh, klei pô čiăng leh anăn klei mgao jing khua klei hdĭp pô. Phung anei čŏng lač pô jing thâo mĭn leh anăn thâo săng ƀiădah amâo thâo kral ôh klei ƀun hlăm mngăt anăn amâo čŏk hia ôh hŏng Khua Yang čiăng dưi pap brei. Snăn ya ngă Ƀuôn Ala Mtao Adiê lŏ dưi bi êdah kơ “phung hđeh điêt”? Phung hđeh jưh knang kluôm ênŭm kơ pô mkăn čiăng dưi huă mnăm, hdĭp mda leh anăn dưi bi hriăm. “Phung hđeh điêt” tinei lač kơ klei jăk, luă gŭ, jao jih ai tiê thâo kral Aê Diê.
Klei mdê plah wah phung thâo mĭn, thâo săng leh anăn phung hđeh điêt jing klei mdê plah wah phung bi mĭn pô dưi bi mtlaih pô leh anăn phung thâo pô amâo dưi čŏng bi mtlaih pô ôh ƀiădah knang kluôm ênŭm kơ Khua Yang Yêsu. Mnuih dưi mŭt hlăm Ƀuôn Ala Mtao Adiê brei thâo săng pô dưi mâo klei pap prŏng prĭn mơ̆ng Aê Diê hlăm Khua Yang Yêsu, anăn jing klei bi mơak kơ Ama. Khua Yang Yêsu hŏng Ama jing sa (Y‑Yôhan 10:30) anăn knŏng mâo Ama thâo Ñu leh anăn Ñu thâo Ama. Hjăn mơ̆ng Khua Yang Yêsu yơh drei dưi thâo Aê Diê.
Grăp čô phung đăo brei lŏ ksiêm wĭt čiăng ksiêm dlăng drei tŭ mă leh Klei Mrâo Mrang Jăk Aê Diê hŏng si knuih, jăk, luă gŭ leh anăn jao jih msĕ si phung hđeh điêt mơ̆ amâodah drei bi mĭn pô năng đei anăn Khua Yang bi mtlaih pô, amâodah drei ngă leh lu bruă kơ Sang Aê Diê kyua anăn dưi bi mtlaih. Tơdah ăt bi mĭn pô jing mnuih thâo mĭn, thâo săng êlam snăn drei ăt ka mâo ôh hlăm Ƀuôn Ala Mtao Adiê. Brei hdơr nanao Khua Yang Yêsu ruah drei, bi êdah drei kơ Ƀuôn Ala Mtao Adiê kyua Ñu khăp kơ drei, Ñu čiăng drei mâo klei bi mguôp siă suôr hŏng Ñu leh anăn knang kơ Ñu kluôm ênŭm čiăng drei dưi thâo ƀuh klei jăk mơak hlăm Aê Diê. Aê Diê amâo mdăp ôh klei jăk siam kơ drei ƀiădah yuôm bhăn hĭn jing drei dôk drông dŭm klei anăn msĕ si sa čô hđeh, luă gŭ leh anăn jao jih grăp hruê mơ̆ amâodah hơăi.
Drei tŭ mă leh ya klei Aê Diê bi êdah kơ pô hŏng klei luă gŭ msĕ si phung hđeh điêt mơ̆?
Wah lač: Ơ Khua Yang, akâo kơ Ih đru kâo thâo kral sĭt klei ƀun ƀin hlăm mngăt ai tiê čiăng kâo thâo knang kơ Ih grăp hruê. Akâo kơ Ih đru kâo jao jih klei hdĭp pô kơ Khua Yang čiăng thâo kral Ih grăp hruê.
Dlăng Klei Aê Diê Blŭ hlăm tlâo thŭn: Y‑Yêrêmi 9:23–10:18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
