Rôm 16:3-16
“Đĭ đăng kơ iĕm jing ‘nhŏng oh lui kơ Yêsu Krist, na apinh iĕm sơng iŏk rôp băl ti wă kơ băt tơdrong ‘mêm băl. Đĭ đăng bơngai lui kơ Yêsu Krist rim kơ anih tă leng kơ jet gia iĕm ngăl.” (Rôm 16:16)
Nơ̆r jet tơchĕng pơwao:
– ‘Bok Pôl pơma tơ’bôh lu đe bu lăm nơ̆r kơkuh mă hơtuch lăm kơthơ âu?
– Đơ̆ng noh, lu bơ̆n đei ‘bôh đei jơhngơ̆m thoi yơ đơ̆ng sư?
– Lu bơ̆n pơhrăm iŏk tơdrong kiơ đơ̆ng kơmĭl bơ̆jang kơ Kră Yang păng wih wăn đơ̆ng ‘Bok Pôl?
Kơthơ mă hơtuch chih ăn kơ bơngai lui tơ dêh char Rôm, ‘Bok Pôl chih hăm nơ̆r kơkuh kơ lơ bơngai đei tơ’bưh mă kăl dêh hăm sư. Dôm lu bơngai mă sư đei chih roi noh jơ̆ buăl jang hơdai hăm sư lăm tơdrong bơ̆ jang kơ Kră Yang ; lu bơngai chu iŏk pơmat tat lăm Khul Lui, đĭ jơhngơ̆m bơ̆ jang kơ Kră Yang păng bơ̆ jang gleh glăn ăn kơ Sư; lu bơngai chu phak hơdai sư; lu bơngai sư chông ba năm tơ Kră Yang, mă bơngai Ju đa mă bơngai tơmoi; lu ‘nhŏng oh mă juăt tơpă; lu bơngai bơ̆ jang lăm Hnam Akŭm; lu bơngai jang hơdai lăm hnam dơnŏ gah bơhngol; păng đĭ đăng bơngai lui akŭm kơkuh kơ Kră Yang lăm hnam bơngai lui.v.v…Sư hiôk pơma pơ ư kơ lu sư, kư̆m pơma tơ’bôh đei jơhngơ̆m băt bơnê kơ lu sư gah dôm tơdrong lu sư đei tơgŭm sư (tr.16 ). ‘Nâu jơ̆ nơ̆r kơkuh rôp băl ti hmă đĕch kiơ̆ kơ tơdrong juăt chăl blŭng a sơ̆.
Mă khan tam mă byơh năm tơ dêh char Rôm mă lei jơhngơ̆m đon ‘Bok Pôl hăm bơngai lui tơ Rôm ‘bĕnh blai hiôk chơt! Kră Yang ăn kơ sư đei tơ ‘bơ̆p lu bơngai âu tơ lăm hnam phak kư̆m thoi lăm tơdrong jang chă bơtho tơ lơ anih. Su đei bơ wei tơdrong tơ’bưh juăt hăm lu sư păng đơ̆ng lu sư na sư gơh băt tôm tơdrong lăm Khul Lui tơ Rôm. Sĭt tơpă lu bongai mă sư roi anăn, kơplah đŏk kơthơ âu, lu sư đei tơdrong pơlung pơdrŭt wang iung bơ̆ jang kơ Kră Yang rai đei yua hloh. Tơpă lu bơ̆n ưh kơ gơh pơtŏ pơ ting đei hơpoh ‘bơm pran dêh đơ̆ng đei jơhngơ̆m tơchĕng tơtăm, dŏng tơgŭm păng đei nơ̆r pơdrŭt.
Đơ̆ng nơ̆r kơkuh, lu bơ̆n ‘bôh ‘Bok Pôl jơhngơ̆m su ‘bĕnh hăm ‘mêm mơnat, mă khan oei oei lăm hnam phak, sư oei ling lang ‘blŏk păng tơ ‘blŏk anân lu bơngai mă adrin jang kơ Kră Yang, mă bơngai drŏ nglo, mă bơngai drŏ kăn, đơ̆ng bơngai wei lăng truh tơ bơ bơngai lui,ưh kơ khan bu. Mă khan tơdrong jang tih dah iĕ, sư kư̆m tơchĕng tơtăm đĭ, sư pơ ư lăng gĭt đĭ đăng ưh kơ sĭ sư lăng g]ĭt kơ tơdrong jang tih đĕch ôh, dah sư pôk hơtŏk lu bơngai bơ̆jang ưh kơ lăng bơngai lui, mă- loi sư lu bơngai drŏ kăn kơplah noh sơ̆ đe lăng ưh kơ gĭt mă lei ‘Bok Pôl đei ‘blŏk kơ lu sư mơ̆n. ‘Nguaih kơ noh, sư đei tơ’bôh jơhngơ̆m băt bơnê kơ đĭ đăng lu bơngai đei tơgŭm sư kư̆m dang đĭ jơhngơ̆m tơgŭm tơdrong jang Kră Yang. Jơhngơ̆m đon ‘Bok Pôl tơ’bôh hơđăl lâm nơ̆r kơkuh, bơnê, đei tơ’bôh jơhngơ̆m ‘mêm sư “bơngai mă ‘mêm kơeng”, “bôl juăt”, “bơngai juăt dêh hăm inh” v.v…’Nâu jơ̆ jơhngơ̆m bơngai bơ̆jang kơ Kră Yang păng wih wăn lăm tơpôl bơngai lui, ‘nâu jơ̆ kơmĭl trŏ kơ lu bơ̆n rok kiơ̆ .
Ơ Kră Yang, apinh tơgŭm inh băt pơjuăt lăm tơdrong tơchĕng tơtăm, lăng gĭt, bơnê păng jet gia lu bơngai mă Kră Yang đei ba ăn lăm chăl arih inh, wă kơ tơdrong noh gơh đei hơtŭt ‘bơm kơ lơ bơngai. Yua anăn Kră Yang Yêsu Krist, Amen .
Lu đe bu noh mă lu bơ̆n đei ‘blŏk, jet gia păng krao khan tơgŭm năr âu?
Tơchĕng tơtăm, jet gia dih băl
‘Nhŏng oh lăm Kră Yang, thoi gơng ‘mêm mơnat
Lăm Kră Yang đei jơhngơ̆m pơm tơ’bôh
Oei ling-pơchrang hơdah , tơ’bôh ăn trong dih băl
Đŏk Sơ̆p Hla ar ‘Bok Kei-Dei lăm pêng sơnăm: Hơriso 58-59
Kênh Youtube BHKTHN:
