1 Petus 3:1-7
Nqe cim:
“Ib yam nkaus li ntawd, nej cov uas yog pojniam, nej yuav tsum mloog nej cov txiv lus… Nej cov uas ua txiv, nej yuav tsum niaj hnub nco ntsoov hais tias pojniam tsis muaj zog li nej. Yog li ntawd, nej yuav tsum saib taus nej tej pojniam…” (1 Petus 3:1a, 7a),
Lus nug rau sawvdaws xav:
– Timthawj Petus qhia niam txiv ib tug yuavtsum muaj feem xyuam rau ib tus li cas?
– Vim li cas Petus txhawb kom peb ua li ntawd?
– Yuav ua li cas niam txiv thiaj hla dhau tej kev sim siab hauv kev ua txij nkawm?
Timthawj Petus hais txog feem xyuam ntawm niam txiv hauv ntu Vajluskub no yog xav pab kom Vajtswv cov menyuam paub txhim tsa txoj kev txij nkawm nyob ua ke muaj kev zoo siab thiab kev sib hlub. Tus niam feem xyuam yog yuavtsum hwm tus txiv. Timthawj Paulus qhia hais tias, “Nej cov uas yog pojniam, nej yuav tsum mloog nej tej txiv lus ib yam li nej mloog tus Tswv lus” (Efexus 5:22). Tus pojniam uas hwm tus txiv, nws yuav ua zoo rau nws tus txiv raws li Vajtswv Txojlus qhia. Txawm yog tus txiv tsis ntseeg los thaum pom tus pojniam coj lub neej zoo thiab hwm nws yuav hloov tau tus txiv lub neej (nqe 1b-2).
Txuas ntxiv timthawj Petus ntuas cov pojniam tsis txhob tsab zam kom zoo nkauj sab nraum tiamsis yuavtsum tsab zam kev zoo nkauj sab hauv thiaj tseemceeb. Tus cwjpwm zoo thiab lub siab zoo sab hauv yuav qhia tshwm ib tus pojniam kev zoo nkauj, kev tsab zam sab hauv pab tau tibneeg heev dua li kev tsab zam sab nraum. Timthawj Petus tsis txwv pojniam kev tu cev kom zoo nkauj, tiamsis qhia kom ua ib tus pojniam muab siab rau ntseeg, ua siab dawb siab zoo kom Vajtswv lub npe tau qhuas hauv yus lub neej (nqe 3-4). Petus kuj hais txog cov pojniam txheej thaum ub tus qauv xws li, Xalas nws mloog nws tus txiv lus (nqe 5-6). Thaum uas mloog tus txiv lus lawm, tus pojniam yuav hwm tus txiv txoj kev tswj kav hauv lub tsev neeg. Lub siab uas paub mloog lus tseemceeb heev rau hauv txoj kev ua txij nkawm, vim li ntawd, Paulus thiaj muab txoj kev sib yuav ua niam txiv piv zoo li txoj kev sib txuas ntawm Tswv Yexus thiab Pawg Ntseeg (Efexus 5:21-32).
Thaum kawg, Petus hais txog tus txiv feem xyuam hais tias;“Nej cov uas ua txiv, nej yuav tsum niaj hnub nco ntsoov hais tias pojniam tsis muaj zog li nej. Yog li ntawd, nej yuav tsum saib taus nej tej pojniam”. Petus hais tias pojniam “tsis muaj zog” cheemtsum muaj kev tiv thaiv. Yog li ntawd, tus txiv yog tus tswv hauv lub tsev neeg nws yuavtsum hlub, yuavtsum ua zoo, saib taus thiab tiv thaiv tus pojniam. Vim tus pojniam yog tus uas yuav nrog tus txiv ua neej mus tas sim neej thiab yuav tau txais txoj sia uas Vajtswv pub rau ob tug ib yam nkaus. Muaj txoj kev sib raug zoo, ob niam txiv thiaj koom tau kev thov Vajtswv ua ke.
Lub neej ua txij nkawm yeej yuav ntsib ntau yam kev khwv, kev sim siab. Yog tus niam thiab tus txiv tsis ua neej raws li Vajtswv Txojlus qhia thiab tsis los txhim tsa lub neej kom ruaj khov, thaum muaj teebmeem tshwm tuaj, tsis paub daws teebmeem yuav ua rau ob leeg nrog rau tej me nyuam ntsib kev mob siab thiab qaug zog rau sab ntsuj plig khwv kho tau zoo. Yog li ntawd, yuav hla dhau tej kev sim siab hauv lub neej txij nkawm, tus niam yuav yuavtsum mloog tus txiv lus thiab tus txiv yuavtsum ua zoo thiab hlub tus niam, ua tau li ntawd ob niam txiv thiaj koom tau ib lub siab kov yeej txhua yam kev sim siab thiab koom nrhiav kev hlub rau lub tsev neeg.
Thov Vajtswv,
Vajtswv, thov pab kom nyuam yaus ob niam txiv nyias ua yog feem xyuam li Koj Txojlus qhia kom hla dhau tej kev sim siab hauv lub neej, thiab txhim tsa txoj kev txij nkawm kom muaj kev sib hlub nyob hauv tus Tswv. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas ua yog peb feem xyuam ntawm tus niam thiab ua txiv li Vajtswv Txojlus qhia?
Nyeem Vajluskub hauv peb lub xyoos: Pajlus 5
Kênh Youtube BHKTHN:
