Klei Aê Diê Blŭ: I Y-Pêtrôs 3:1-7
Êlan kliăng:“Ơ phung mô̆, brei diih đup gưt kơ ung diih,… Ơ phung ung, brei diih dôk dơ̆ng ƀơ̆ng huă hŏng mô̆ diih hŏng klei thâo mĭn,…” (I Y-Pêtrôs 3:1a, 7a),
Klei êmuh ksiêm mĭn: Si Khua ƀĭng kna Y-Pêtrôs mtô kơ klei dôk dơ̆ng ƀơ̆ng huă hdơ̆ng ung mô̆? Ya ngă ñu mtă mtăn msĕ snăn? Si ngă čiăng kơ ung mô̆ dưi găn jih jang klei lông dlăng hlăm klei jing ung mô̆?
Khua ƀĭng kna Y-Pêtrôs hưn mdah kơ klei dôk dơ̆ng ƀơ̆ng huă hdơ̆ng ung mô̆ hlăm trăn Klei Aê Diê Blŭ anei, čiăng đru kơ phung anak buôn sang Aê Diê mkŏ mdơ̆ng klei jing ung mô̆ jăk mơak hrăm mbĭt. Bruă jao kơ mô̆ brei đup gưt kơ ung. Khua ƀĭng kna Y-Pôl mtô mơh, “Ơ phung mniê mâo ung, brei diih gưt kơ ung diih, msĕ si kơ Khua Yang.” (Êphêsô 5:22). Sa čô mô̆ đup gưt srăng hdĭp djŏ tui si Klei Aê Diê Blŭ mtô hlăm klei dôk dơ̆ng ƀơ̆ng huă pô. Hŏng klei anăn, wăt tơdah ung ka đăo năng ai ăt srăng mâo klei bi mlih kyua klei hdĭp mô̆ doh jăk leh anăn huĭ mpŭ kơ Aê Diê (êlan 1b-2).
Tui tluôn anăn, Khua ƀĭng kna Y-Pêtrôs mtă mtăn kơ phung mô̆ đăm uêñ mĭn đei kơ klei mprăp ti êngao ôh, biădah brei mjuăt pô hŏng klei mprăp bi siam hlăm lam ai tiê. Kyuadah mơ̆ng knuih leh anăn knhuah hdĭp hlăm lam ai tiê yơh, srăng bi êdah klei siam sa čô mniê, dưi hrip leh anăn lu mnuih mkăn khăp čiăng hĭn, hŏng klei mprăp ti êngao. Amâo djŏ ôh Khua ƀĭng kna Y-Pêtrôs mtô amâo brei phung mniê bi msiam pô, ƀiădah ñu mñă kơ phung jing mô̆ brei uêñ mĭn êlâo hĭn bi mjuăt pô hŏng klei hdĭp huĭ mpŭ kơ Aê Diê, knuih êdu êun êđăp ênang čiăng dưi bi guh kơang kơ Aê Diê hŏng klei hdĭp pô (êlan 3-4). Ñu ăt hưn mdah mơh kơ phung mniê doh jăk ênuk đưm leh anăn hưn klă H’Sara đup gưt leh kơ ung ñu (êlan 5-6). Tơdah gưt kơ ung, mô̆ srăng mpŭ kơ klei ung gĭt gai hlăm gŏ sang. Klei mĭn đup gưt jing yuôm snăk hlăm klei hdĭp ung mô̆, kyuanăn yơh Khua ƀĭng kna Y-Pôl bi hmô klei bi mguôp ung mô̆ msĕ klei bi mguôp ti krah Khua Yang Yêsu hŏng Phung Sang Aê Diê (Êphêsô 5:21-32).
Ti knhal tuč, Khua ƀĭng kna Y-Pêtrôs hưn bruă jao kơ ung brei “brei diih dôk dơ̆ng ƀơ̆ng huă hŏng mô̆ diih hŏng klei thâo mĭn”. Ñu lač phung mniê jing “phung awăt hĭn hlăm asei mlei” čiăng lač brei răng mgang digơ̆. Kyuanăn, ung jing khua hlăm gŏ sang brei khăp hơiêng, sŭk suôr, mpŭ leh anăn răng mgang mô̆ pô. Mô̆ yơh jing pô êbat hrăm mbĭt hŏng drei tơl tuč klei hdĭp leh anăn hrăm mbĭt dưn klei pap Khua Yang brei. Mâo klei êđăp ênang kơh, jih dua ung mô̆ dưi mđrăm mbĭt wah lač.
Klah čŭn, klei hdĭp ung mô̆ sĭt yơh mâo lu klei dleh dlan, klei lông dlăng. Tơdah ung mô̆ amâo hdĭp djŏ ôh tui si klei bhiăn Klei Aê Diê Blŭ čiăng mdơ̆ng kjăp atur gŏ sang, tơdah tuôm hŏng klei dleh dlan truh, ênưih snăk srăng lĕ hlăm hdră mgaih mkra soh čhuai, ba boh tŭ jhat ênguôt hnĭng hlăm kđeh asei mlei wăt hlăm mngăt ai tiê kơ mô̆, kơ ung leh anăn hlŏng truh kơ ênuk anak čô mơh. Kyuanăn čiăng dưi găn gao klei lông dlăng hlăm klei jing ung mô̆, brei mô̆ đup gưt kơ ung, leh anăn brei ung sŭk suôr khăp hơiêng kơ mô̆, snăn kơh jih dua ung mô̆ sa ai hrăm mbĭt dưi hĭn hŏng jih jang klei dleh dlan leh anăn hrăm mbĭt bi bŏ ênŭm klei jăk mơak kơ gŏ sang.
Si ngă drei hdĭp djŏ tui si Klei Aê Diê Blŭ mtô kơ klei bhiăn hdơ̆ng ung mô̆ mơ̆?
Wah lač: Ơ Khua Yang, akâo Ih đru kâo ngă hlue si Klei Aê Diê Blŭ mtô kơ klei hbiăn hdơ̆ng ung mô̆, čiăng kơ kâo dưi găn gao jih klei lông dlăng hlăm klei jing ung mô̆ leh anăn mkŏ mdơ̆ng gŏ sang jăk mơak hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
