Luv 3:1-18
Nqe cim:
“Luv teb hais tias, kuv yuav ua txhua yam raws li koj hais.” (Luv 3:5).
Lus nug rau sawvdaws xav:
– Na-aumis ua dabtsi kom pab tau Luv uas yog nws tus nyab?
– Qhov uas Luv mloog niam pog lus ua rau nws tau nqi zog dabtsi?
– Txojkev sib raug zoo ntawm nyab thiab niam pog ntawm peb zoo li cas?
Luv tshooj 1-2 qhia paub, tom qab uas nrog niam pog rov qab mus nyob rau Npeleehees, Luv tu niam pog zoo heev. Ob tug pog nyab tsis muaj dabtsi thaum rov qab los qub tebchaws yog li tus nyab thov mus khaws nplej hauv Npau-am thaj teb, uas yog Na-aumis txheebze los rau nkawd noj. Txawm yog Luv yog nyab xwb los Na-aumis hlub nws zoo ib yam li yog nws menyuam thiab xav kom nyab muaj lub neej txijnkawm kaj siab (nqe 1). Yog li ntawd, Na-aumis thiaj npaj homphiaj nrhiav ib tug txiv tsimtxiaj rau tus nyab, thiab kuj yog tus txiv uas tsimnyog los mus tuav Na-aumis tej qubtxeeg qubteg.
Nqe 2-13 hais txog tej uas Na-aumis qhia rau nws tus nyab ua kom raws li lawv kev coj noj coj ua, Luv thiaj mus cuag tau Npau-am thiab qhia Na-aumis qhov kev cheemtsum. Yog ib tug pojniam uas yog lwm haivneeg, Luv tsis nug li, tiamsis nws ua raws nraim li niam pog cov lus qhia. Cov tshooj txuas ntxiv qhia rau peb paub Npau-am pom zoo yuav Luv ua pojniam thiab tuav Na-aumis cajces. Tus Tswv pub rau nkawd yug tau tej tub tej ntxhais los txhawb Na-aumis lub neej thaum laus (Luv 4:13-15).
Zaj lus no qhia paub txojkev sib raug zoo, kev sib hlub sib raug zoo ntawm Na-aumis thiab nyab Luv ua rau nkawd lub tsevneeg tau txais tej nqi zog zoo. Na-aumis tau txhua tus neeg qhuas tias yog tus neeg tau koob hmoov, vim nws tau tus nyab hlub nws tshaj xya leej tub (Luv 4:15), thiab Luv kuj tau tus Tswv xaiv los ua ib hauv plaub tus pojniam muaj npe hauv Tswv Yexus cov yawg koob.
Hauv txojkev ua neej, kev sib raug zoo ntawm niam pog thiab nyab pheej muaj ntau yam teebmeem nyob hauv tsevneeg, hauv tsevneeg ntseeg Yexus los kuj muaj. Qhov teebmeem yim tshwm muaj ntau thaum nyias ua raws li nyias xav. Cia kom muaj txojkev sib raug zoo thiab zoo siab nyob hauv tsevneeg, niam pog thiab nyab yuav tsum hwm tus Tswv, sib hlub, ib leeg saib taus ib leeg, zam txim thiab hmov tshua. Tshwjxeeb yog xav txog lwm tus heev dua li uas xav txog yus tus kheej zoo li Vajtswv Txojlus qhia, “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug tsis txhob khav hais tias ib tug zoo dua ib tug. Nej tsis txhob xav txog nej xwb, tiamsis nej yuav tsum xav txog lwm tus thiab.” (Filipis 2:3-4). Nov yog qhov chaw txawb kom tiv dhau tej kev sim siab hauv lub neej niam pog thiab nyab nyob hauv tsevneeg, thiab ua rau muaj kev sib raug zoo, lwm tus qhuas tus Tswv thaum lawv ntsia pom tej koob hmoov uas tus Tswv pub.
Thov Vajtswv,
Tus Tswv, thov Koj pab kom nyuam yaus hwm Koj, hlub lwm tus, xav txog lwm tus kom muaj txojkev sib raug zoo hauv tsevneeg, sib haum. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Txojkev sib raug zoo ntawm niam pog thiab nyab hauv peb tsevneeg zoo li cas? Peb yuav ua dabtsi kom pab tau peb tiv dhau qhov kev sim siab no, yog tias muaj?
Nyeem Vajluskub hauv peb lub xyoo: Levis Kevcai 26
Kênh Youtube BHKTHN:
