Mathais 13:10-17
Nqe cim:
“Tiamsis nej yog cov uas muaj hmoo, nej qhovmuag thiaj pom thiab nej pobntseg thiaj hnov!” (Mathais 13:16).
Lus nug rau sawvdaws xav:
– Tomqab uas Tswv Yexus hais zaj lus pivtxwv txog tus tseb nplej, cov thwjtim nug Nws txog yam dabtsi?
– Tus Tswv teb licas?
– Peb tau qhuab ntuas licas dhau zaj kawm hnub no?
Tomqab uas Tswv Yexus hais zaj lus pivtxwv txog tus tseb nplej, cov thwjtim xav hais tias yuav tsis muaj neeg totaub lub ntsiab ntawm zaj lus pivtxwv no, yog li ntawd lawv thiaj nug Nws hais tias: “Ua li cas koj pheej ua lus pivtxwv qhia lawv xwb?” (nqe 10). Tswv Yexus teb cov thwjtim hais tias, “Zaj uas neeg tsis tau paub hais txog Ntuj Ceebtsheej, kuv twb qhia rau nej lawm, tiamsis tsis tau qhia rau cov neeg ntawd paub” (nqe 11). Tus Tswv xav hais tias cov thwjtim yuav tau tus Tswv txhais lub ntsiab kom totaub, tshuav cov neeg coob coob ces tsis tau txais qhov ntawd “rau qhov lawv ntsia, tiamsis lawv tsis pom, lawv mloog, tiamsis lawv tsis hnov thiab tsis totaub” (nqe 13). Nws kuj siv Yaxayas 6:9-10 los qhia txog cov neeg Yixalayees lub siab tawv. Tsis yog tus Tswv tsis xav piav rau cov neeg coob coob paub lub ntsiab tiamsis yog vim lawv lub siab tsis ntshaw paub qhov tseeb xwb, lawv poob yam tseemceeb uas yog tau hnov tus Tswv tej lus tiamsis muaj lub siab tawv tsis txais yuav tej lus tseeb ntawd. Thaum kawg lawv raug poob tej yam uas lawv muaj li tus Tswv hais hauv nqe 12, “Rau qhov tus uas twb muaj lawm, yeej yuav muab ntxiv kom nws muaj nplua mias, tiamsis tus uas tsis muaj, txawm yog nws tsuas muaj mentsis xwb los Vajtswv yuav muab rho mus huv tibsi.”
Tomqab uas piav txog cov neeg coob coob kev mloog Vajtswv Txojlus, tus Tswv tig los hais rau cov thwjtim hais tias lawv yog cov uas muaj hmoo vim lawv qhovmuag tau pom Tswv Yexus thiab lawv lub pobntseg tau hnov Nws piav qhia qhov tseeb. Ntawm no yog ib txoj koob hmoov uas loj kawg nkaus li, rau qhov ntawd yog yam uas cov cev Vajtswv lus thiab cov neeg ncaj ncees tiam Vajluskub Qub ntshaw, lawv xav tau li cov thwjtim tiamsis lawv tsis tau (nqe 16-17).
Tus Tswv cov menyuam tabtom ua neej nyob tiam koob hmoov, Vajluskub twb sau tiav lawm thiab Vajtswv Txojlus tabtom muab tseb tawm rau sawvdaws, peb puas zeem paub hais tias peb yog cov uas muaj hmoo lawm tau? Peb puas nqhis nqhawv kev paub Vajtswv Txojlus thiab siv los xyaum hauv lub neej txhua hnub lawm tau? Yuav tsum nco ntsoov hais tias, peb twb tau tus Tswv qhia paub txog zaj uas hais txog Ntuj Ceebtsheej lawm, ntawd yog txoj koob hmoov loj kawg nkaus uas tus Tswv pub rau peb, muaj coob tug yog neeg txawj ntse, nplua nuj, muaj meejmom tshaj peb tiamsis lawv tseem tsis tau paub sab ntsujplig. Peb tsis txhob cia tej uas yus muaj poob mus li cov Yixalayees, nyob tsam peb zoo li cov neeg coob coob nyob ibncig Tswv Yexus, yeej hnov tus Tswv tej lus qhia, tiamsis tsis paub tseeb txog Nws thiab tsis txais yuav Nws tej lus. Yog ua li ntawd, peb lub neej yuav tsis tau tus Tswv hloov thiab qhia tsis tau tus Tswv qhov tseeb rau cov neeg ibncig.
Thov Vajtswv,
Tus Tswv, thov pab nyuam yaus zeem paub txoj koob hmoov loj kawg nkaus uas nyuam yaus tau txais ntawm Koj kom nyuam yaus tsis muaj lub siab tawv rau Koj Txojlus, txais yuav kev qhuab ntuas, taw qhia ntawm Koj Txojlus, kom nyuam yaus lub neej qhia tshwm Koj qhov tseeb rau cov neeg ibncig. Amees.
Nej puas paub hais tias nej yog cov uas muaj hmoo vim twb ntseeg Tswv Yexus thiab muaj Vajtswv Txojlus lawm tau?
Nyeem Vajluskub hauv peb lub xyoos: Mathais 21:23-46
Kênh Youtube BHKTHN:
