Klei Aê Diê Blŭ: Y-Mathiơ 13:10-17
Êlan kliăng: “Ƀiădah jăk mơak yơh ală diih, kyuadah dưi ƀuh, leh anăn jăk mơak yơh knga diih, kyuadah thâo hmư̆” (Y-Mathiơ 13:16)
Klei êmuh ksiêm mĭn: Leh ruĕ Khua Yang Yêsu yăl dliê kơ pô rah mjeh, ya klei phung ƀĭng kna êmuh Ñu? Si ngă Ñu lŏ wĭt lač? Ya klei bi mđĭ ai drei mâo mơ̆ng klei hriăm anei?
Tơdah leh Khua Yang Yêsu yăl dliê bi hriêng kơ mnuih rah mjeh, phung ƀĭng kna mĭndah amâo srăng mâo pô thâo săng ôh klei mblang kơ klei bi hriêng anei snăn digơ̆ êmuh Ñu “Si ngă Ih blŭ kơ diñu hŏng klei bi hriêng?” (êlan 10). Khua Yang Yêsu mblang kơ phung ƀĭng kna snei: “Diih mă tŭ leh klei thâo săng klei hgăm kơ ƀuôn ala mtao adiê, ƀiădah diñu amâo mâo ôh” (êlan 11). Khua Yang Yêsu čiăng lač Ñu srăng mblang kơ phung ƀĭng kna Ñu thâo săng kơ klei bi hriêng, bi phung lu, digơ̆ amâo srăng mâo klei mblang msĕ snăn ôh.
“kyuadah diñu dlăng ƀiădah amâo ƀuh ôh, diñu mđing knga ƀiădah amâo hmư̆ ôh, kăn diñu thâo săng rei” (êlan 13). Msĕ mơh Ñu mă yua Y-Êsai 6:9-10 čiăng bi klă kơ klei bi sĭt kơ ai tiê khăng phung Israel. Amâo djŏ Khua Yang Yêsu amâo čiăng bi êdah klei mblang kơ phung lu ôh ƀiădah kyua ai tiê diñu amâo čiăng thâo săng sĭt ôh kơ klei sĭt nik, diñu bi luč hĕ mông myun yuôm bhăn diñu dưi mă tŭ Klei Aê Diê Blŭ hŏng ai tiê khăng hngah kơ klei sĭt nik Aê Diê. Boh knhal tuč jing arăng sua mă mơh ya mnơ̆ng diñu mâo leh msĕ si Klei Aê Diê Blŭ lač hlăm êlan 12, “Kyuadah arăng srăng lŏ thiăm brei kơ hlei pô mâo leh, leh anăn ñu srăng mâo lu êbeh; ƀiădah mơ̆ng hlei pô amâo mâo ôh, arăng srăng sua mă hĕ wăt ya mnơ̆ng ñu mâo leh.” Ruĕ mblang kơ klei phung lu hmư̆ Klei Aê Diê Blŭ, Khua Yang lŏ wĭt kơ phung ƀĭng kna, lač kơ digơ̆ phung mâo klei jăk mơak kyuadah ală digơ̆ ƀuh leh Khua Yang Yêsu leh anăn knga digơ̆ hmư̆ leh klei Ñu hưn kơ klei sĭt nik. Anei jing klei jăk Aê Diê brei prŏng êdimima kyuadah mâo lu phung khua pô hưn êlâo leh anăn phung dĭng buăl sĭt suôr Aê Diê ênuk Klei Bi Mguôp Hđăp čiăng snăk mâo klei msĕ si phung ƀĭng kna mâo anăn ƀiădah amâo mâo ôh (êlan 16-17).
Phung anak ƀuôn sang Aê Diê hruê anei hdĭp hlăm ênuk klei pap, klei bi êdah klă ênŭm leh, leh anăn Klei Aê Diê Blŭ hlăk hlê dôk bi lar, si ngă drei ƀuh kơ drei pô mâo klei jăk mơak hĕ amâodah hơăi? Mâo klei êpa mhao čiăng thâo săng kơ Klei Aê Diê Blŭ pioh mă yua hlăm klei hdĭp grăp hruê mơ̆? Hdơr bĕ nanao kơ klei anei, drei “mă tŭ leh klei thâo săng klei hgăm kơ ƀuôn ala mtao adiê” jing klei brei prŏng êdimima Aê Diê pioh kơ drei, êjai mâo lu mnuih hriăm lu, mdrŏng sah, tŭ jing hĭn kơ drei ƀiădah ka mâo klei bi êrâo ôh hlăm klei hdĭp myang. Đăm drei bi luč ôh klei drei kdlưn hĭn msĕ si phung Israel, huĭdah drei jing hĕ msĕ si phung lu dôk jŭm Khua Yang, ăt ƀuh mơh Khua Yang, ăt hmư̆ mơh klei Ñu mtô, ƀiădah amâo săng djŏ ôh kơ Khua Yang leh anăn hngah kơ klei Ñu mtô. Boh knhal tuč jing klei hdĭp drei amâo mâo klei Khua Yang bi mlih ôh, kăn bi êdah klei sĭt nik Ñu kơ phung riêng gah rei.
Diih thâo mơ̆ kơ diih mâo leh klei jăk jĭn kyua đăo kơ Khua Yang leh anăn dưn yua Klei Ñu Blŭ?
Wah lač: Ơ Aê Diê, đru kâo thâo kâo mă tŭ leh mơ̆ng Ih klei jăk prŏng êdimima čiăng kơ kâo amâo bi khăng ôh ai tiê kơ Klei Ih Blŭ, tŭ ư klei ƀuah mkra mơ̆ng Klei Ih Blŭ, čiăng klei hdĭp kâo bi êdah nanao klei sĭt nik Ih kơ phung riêng gah.
Dlăng Klei Aê Diê Blŭ hlăm tlâo thŭn: Y-Mathiơ 21:23-46
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
