Yakơ 2:1-4
Trong tơm: “Ơ lu ‘nhŏng oh inh, iĕm lui boih kơ Kră Yang Yêsu Krist, Kră Yang mơsêh mơyang lu bơ̆n, iĕm ‘nĕ kơ lăng bơngai pha ra yua kơ sư mơdrŏng dah dơnuh hŏ.” (Yakơ 2:1)
Nơ̆r jet tơchĕng pơwao:
– Nơ̆r tơ’bôh nĕ kơ pơdê minh nu bơngai bu noh wă khan thoi yơ?
– ‘Bok Yakơ roi tơ’bôh tơdrong kiơ lăm khŭl bơngai lui ‘blŭng a đei pơdê dih băl?
– Khul bơngai lui dang ei đei tơblŏk ăn tơdrong thoi yơ lăm tơdrong ‘nâu?
‘Bok Yakơ đei nơ̆r hơtă ăn kơ lu bơngai lui kơ Kră Yang Yêsu Krist mă sư đei bŏu khan “nhŏng oh”, bơtho lu sư “nĕ kơ pơdê minh ‘nu bơngai bu”. Nơ̆r “pơdê” lăm nơ̆r Grĕk wă khan “kiơ̆ thoi muh măt gah ‘nguaih”, wă khan bơ̆n lăng minh tơdrong kiơ, kiơ̆ thoi muh măt gah ‘ngoaih bơ̆n hăm bơngai nai, nhen thoi bơ̆n lăng minh ‘nu bơngai kiơ̆ thoi gah ‘ngoaih sư thoi yơ, tơdrong jang sư, tơdrong sư pơm tih…lăm chăl arih blŭng a sơ̆ lăm khŭl bơngai lui blŭng a đei arih tơ’bưh băl thoi noh. Mă lei lăm tơdrong nâu ‘Bok Yakơ khan ưh kơ trŏ hăm khŭl bơngai lui, tơdrong ‘nâu tơplơ̆ kơ lăm tơdrong lui kăl kơ đei tơdrong ‘mêm mơnat păng lăng bơngai nhen hơtŏ dang ăI dih băl kiơ̆ thoi nơ̆r Kră Yang Yêsu Krist đei bơtho.
Lăm trong 2-4, ‘Bok Yakơ đei roi tơbăt hơđăl kơ đei tơdrong pơdê băl lăm khŭl bơngai lui phŏ kơnh dai ‘bơm kơ khŭl bơngai lui bơ̆n dang ei. Noh jơ̆ sơng bơngai mơ̆t hơoei lăm hnam akŭm; lu bơngai ppơdrŏng jê̆ sơng ‘bơ̆t anih ‘lơ̆ng; mă lei lu bơngai dơnuh, hrŭk băn ao ưh kơ ‘lơ̆ng kơnh ưh kơ sơng iŏk lu sư hơoei bơ̆t yơ phŏ kơnh ăn kơ lu sư hơoĕi ‘bơ̆t teh hoh. Bơngai đei pơm thoi noh “đei pơdê băl iŏk tơdrong kơ nê̆ na sek tơlang dih băl” (trong 4). Mă khan ưh kơ đei pơma mă lei pơm thoi noh phŏ lu sư đei tơchĕng bơngai pơdrŏng gô ba ăn tơdrong lơi yua kơ sư kơdih păng lơi yua kơ lăm hnam akŭm na kăl kơ đei ăn kơ lu sư tơdrong ‘lơ̆ng păng sơng iŏk lu sư đĭ jơhngơ̆m.
Lăm hla ar đei chih kơ dih, bơngai pơgơ̆r lăm teh đak Â̆n Đô̆ Mahatma Gandhi (1869-1948) đei roi kơplah sư oei pơhrăm. Kơplah noh sơ̆ sư đei tơchĕng maih wă iă dêh kơ lu bơngai lui păng dôm tơdrong Kră Yang Yêsu đei bơtho. Na minh giĕng năr tơpơh ei sư tơchĕng păng yak chă minh pôm hnam akŭm sư wă mơ̆t lăm hnam akŭm ei ră mă lei bơngai gak ‘măng găn ưh kơ ăn sư mơ̆t, na đei khan kơ sư hnam akŭm âu ‘măn kơ lu bơngai drĕch akar kok đĕch. Đei pơdê thoi noh na jing sư wih rŏng kơ tơdrong lui kiơ̆ Tơdrong ‘Nao ‘Lơ̆ng. Đơ̆ng tơdrong pơdê ba ăn kơ tơdrong lui gơ̆p đei pơma kơnê̆ yua kơ tơdrong bơtho khan tơdrong ‘mêm tơdrong hơtŏ noh jơ̆ lăm sơ̆p hla bơar đĕch ưh kơ đei tơ’bôh gah ‘nguaih lăm tơdrong arih sa khul bơngai lui.
Pơdê noh jơ̆ yua kơ đei tơdrong yoch lăm jơhngơ̆m, tơdrong âu kŭm đei lăm khŭl bơngai lui blŭng a păng truh kơ rim chăl kŭm đei tơdrong âu ngăl. Nhen thoi bơngai lui pơyơ̆r jên lơ biơ̆ lei nơ̆r sư pơma nhen thoi trăp biơ̆. Bơngai bu đei tơdrong jang tih lăm teh đak lei na gơ̆p đei pơyom biơ̆. Bơ̆n băt tơdah Kră Yang ‘Bok Kei-Dei lăng lăm jơhngơ̆m, lei thoi yơ bơ̆n sek tơlang dih băl kiơ thoi gah ‘nguaih? Bơ̆n băt Kră Yang Yêsu đei ‘mêm kơ bơ̆n tih dêh, yua kơ kiơ bơ̆n lăng pơdê kơ ‘nhŏng oh bơ̆n? apinh Kră Yang tơgŭm bơ̆n arih minh chăl arih tơ’bôh kơ tơdrong ‘mêm Sư.
Lu bơ̆n hăm đei pơdê kơ bơngai nai ưh?
Ơ Kră Yang, inh năm bơ̆t anăp ih, tơpă lăm jơhngơ̆m inh đei lơ wơ̆t inh đei pơdê kơ bơngai nai. Apinh ih mơnat kơ tơdrong rơdu rơmơ̆n inh, apinh Yang Bơhngol ‘Lơ̆ng tơplih jơhngơ̆m inh wă kơ inh lăng bơngai nai nhen thoi ih lăng lu sư. Yua anăn Kră Yang Yêsu Krsit, Amen
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 20
Kênh Youtube BHKTHN:
