Tơdrong Pơđơ̆k 28:14
“Bơngai bu băt hli yom kơ Kră Yang gô đei pŭn hiôk; Bơngai bu ưh kơ chu arăng kơ̆l gô răm.” (Tơdrong Pơđơ̆k 28:14)
Nơ̆r jet tơchĕng pơwao:
– Thoi yơ jơ̆ bơngai arăng kơ̆l?
– Bơngai arăng kơ̆l gô iŏk tơdrong kiơ?
– Tơ’blŏk kơ bơ̆n tơdrong kiơ đơ̆ng nơ̆r lăm Tơdrong Pơđơ̆k ‘nâu?
Dah nơ̆r pơma blŭng a lăm trong 14 pơma kơ bơngai ling lang hli yom bơ̆n bơngai kơnê̆ păng tơdrong ‘Bok Kei-Dei ‘lơ̆ng rơgoh oei hơdai, lei na nơ̆r pơma pơtrơp noh pơma tơplơ̆, noh bơngai “arăng kơ̆l”. Pơđơ̆k 29:1 pơma ‘bơm kơ minh tơdrong lei lăi noh, bơngai “arăng kơ̆l”. ‘Nâu bơih nơ̆r tơbăt gah minh ‘nu bơngai pơrơ̆ng pơm tơplơ̆ ayăt, sơngah kuă kơ mơ̆ng nơ̆r bơtho. Nơ̆r ‘nâu đei ngăl tơblang “kuă kơ iŏk nơ̆r” dah “arăng kơ̆l”. ‘Nâu bơih tơdrong “arăng kơ̆l” hăm Kră Yang hăm nơ̆r Sư, arăng kơ̆l tơpă gah tơdrong yoch lăm jơhngơ̆m, thoi noh ưh kơ băt tơdrong yoch păng sơngah kuă kơ tơbral. Bơngai mă ưh kơ chu tơbral lăm trong 13 jing bơngai “arăng kơ̆l” lăm trong 14. Kư̆m gơh pơma, pơang pơm kơ minh ‘nu bơngai jing măt tol gah bơhngol, kuă kơ iŏk nơ̆r, păng ưh pă kĕ wă tơbral.
Lĕch đơ̆ng bơngai arăng kơ̆l noh bơih “Gô răm”. “Răm” lăm âu wă khan “Pơchah ưh kơ tam băt” bơngai arăng kơ̆l ưh kơ mơ̆ng nơ̆r Kră Yang păng ưh kơ chu lăng tơdrong yoch kơdih gô nhen thoi sem brem aleh hơđong ưh kơ tam băt. Tơdrong Pơđơ̆k 29:1 pơma hơđăl hloh: “Bơngai bu đei chrih ling lang, Mă-lei oei arăng kơ̆l, Gô đei tơdrong truh blư bla na ưh pă kơ đei gơh dŏng pơklaih.” Bơngai arăng kơ̆l ưh kơ gơh klaih đơ̆ng hơ’năk hơđong mă lu sư aleh ‘bơm hơđong ưh kơ băt. ‘Nâu bơih rup lu khul linh Pharaôn lôch tŏk bŏk đak dơsĭ ‘brê.
Hăm lu bơngai pơrŏ pơang, ling lang lăng kơdih akâu khan trŏ, wă blah plơ̆ nơ̆r Kră Yang lei na yua iŏk đơ̆ng tơdrong ‘noh trŏ tơpă, ưh kơ gơh weh wer, păng “ưh kơ đei gơh dŏng”. Tơdrong ‘nâu đơ̆ng tơdrong ‘Bok Kei-Dei sek tơlang, păng kư̆m pŭ iŏk tơdrong noh tơpă đơ̆ng dôm tơdrong kơ hlôh wao lu sư. Tơdrong ‘nâu truh nhen thoi “tơdrong truh ưh kơ tam kơ băt” rŏ lăng gơh ba truh tơdrong lôch (I Kôrintô 5:3). Păng kư̆m truh mă kơplah bơ̆n oei arih. Hăm bơngai lui kơ Kră Yang mălei oei arăng kơ̆l ưh kơ chu kiơ̆ Nơ̆r Kră Yang păng ưh kơ tơbral lei na Kră Yang gô ăn kơ bơngai noh iŏk tơdrong bơtho pơjĭ (I Kôrintô 5:5).
Nơ̆r lăm Tơdrong Pơđơ̆k ‘nâu tơ’blŏk rim bơ̆n athei pơ’lơ̆ng gah dôm tơdra tơbăt đơ̆ng ‘Bok Kei-Dei. Phŏ phŏ ‘noh bơih nơ̆r pơma đơ̆ng Kră Yang truh thoi tơdrong jĭ trăp, tơdrong truh hli krê, dah tơdrong lôch truh kơ minh ‘nu buăl juăt. Dah minh ‘nu bơngai oei nŏng areh kơ dôm nơ̆r chrih khă đơ̆ng ‘Bok Kei-Dei, lei na tơdrong pơrăm gô truh ưh kơ tam kơ băt păng ưh kơ đei bu gơh dŏng tơgŭm. Tơdrong ‘mêm păng tơdrong mơnat đơ̆ng ‘Bok Kei-Dei ưh kơ layơ tôch mălei jơ năr ‘măn kơ kon bơngai đei hơgăt lê̆ bơih. ‘Nĕ kơ arăng kơ̆l athei tơbral wă iŏk tơdrong mơnat đơ̆ng ‘Bok Kei-Dei.
Kơkuh kơ Ih Kră Yang, apinh Ih mơnat kơ inh, apinh ‘nĕ ăn kơ inh jing minh ‘nu bơngai arăng kơ̆l, mălei apinh Kră Yang bơtho tơ’bôh, păng bơtho pơjĭ inh wă kơ inh tơbral kơplah pơm glăi păng arih gơh hơgei, Kră Yang lăp đon. Krao khan yua anăn Kră Yang Yêsu Krist, Amen!
Bơ̆n hăm oei arăng kơ̆l ‘bơ̆t tơdrong Kră Yang tơ’blŏk kơ bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Yôhan 4
Kênh Youtube BHKTHN:
