Klei Aê Diê Blŭ: Klei Mtô Mñă Klei Bhiăn 15:19-23
Êlan kliăng: “Brei diih pioh brei kơ Yêhôwa Aê Diê ih jih jang êđai knô mđai tal êlâo hlăm êmô leh anăn biăp diih. Đăm yua bruă ôh êđai êmô diih mđai tal êlâo, kăn kăp mlâo êđai biăp diih mđai tal êlâo rei.” (Klei Mtô Mñă Klei Bhiăn 15:19).
Klei êmuh ksiêm mĭn: Si klei bhiăn Aê Diê kčah kơ êđai knô mđai tal êlâo hlăm êmô leh anăn biăp? Ya bruă phung ƀuôn sang Aê Diê amâo dưi ngă ôh hlăm dŭm drei hlô mnơ̆ng tal êlâo? Ya klei bhiăn anei mñă kơ phung ƀuôn sang Aê Diê? Si klei hriăm anei mñă kơ drei kơ ai tiê myơr kơ Aê Diê?
Aê Diê bi mtlaih leh anak kkiêng tal êlâo phung ƀuôn sang Israel mơ̆ng klei djiê leh bi mtlaih phung ƀuôn sang Aê Diê kbiă mơ̆ng čar Êjip, anăn Ñu kčah kơ phung ƀuôn sang Aê Diê brei pioh doh jăk djăp drei êđai knô tal êlâo hlăm êpul êmô leh anăn biăp kơ Aê Diê. Diñu dưi brei yua drei mkăn hlăm êpul čiăng ngă bruă lŏ hma amâodah mă mlâo. Ƀiădah hjăn êđai knô tal êlâo hlăm êpul snăn amâo dưi ngă snăn ôh. Hrô hŏng anăn, dŭm drei tal êlâo anăn brei ba ti anôk doh jăk Aê Diê ktrâo, leh anăn myơr kơ Aê Diê, knhal tuč gŏ sang srăng ƀơ̆ng drei tal êlâo anăn ti anăp Aê Diê msĕ si sa klei huă ƀơ̆ng bi hdơr. Tơdah drei tal êlâo mâo ya klei amâo doh, snăn amâo dưi myơr ôh kơ Aê Diê ƀiădah dưi ngă mnơ̆ng ƀơ̆ng kơ grăp čô mnuih hlăm ƀuôn prŏng diñu msĕ si mta čĭm mkăn, ƀiădah brei lui hĕ êrah drei mnơ̆ng anăn hlue si klei bhiăn.
Klei bhiăn anei msĕ si sa klei mñă thiăm kơ phung ƀuôn sang Aê Diê kơ sa klei sĭt nik jing brei myơr klei jăk hĭn kơ Yêhôwa Aê Diê, mbĭt anăn ăt đru kơ phung ƀuôn sang Aê Diê thâo săng klei yuôm bhăn mơ̆ng klei hdĭp gŏ sang leh anăn klei kkuh mpŭ. Kyua dŭm drei hlô mnơ̆ng leh dưi myơr kơ Aê Diê srăng mâo jih gŏ sang huă mnăm ti anăp Aê Diê hŏng ai tiê hdơr knga kơ klei jăk Aê Diê brei kơ gŏ sang.
Klei hriăm anei ăt mñă kơ drei brei hdơr klei jăk hĭn drei myơr kơ Aê Diê jing ya mnơ̆ng jăk hĭn, anăn jing ya klei dưi pioh hjăn bi doh čiăng jing dŏ Aê Diê. Ai tiê myơr anei kñăm bi êdah ai tiê drei hdơr knga hŏng Aê Diê, mbĭt anăn mñă kơ drei brei hdĭp hlăm klei thâo săng djăp mta klei pô mâo mơ̆ng kđeh asăr truh mngăt ai tiê hriê mơ̆ng Aê Diê. Khădah snăn ăt adôk mâo lu mnuih khăng mđing ba yua djăp mta mnơ̆ng kơ hjăn pô êlâo, leh anăn kơh myơr kơ Aê Diê ya klei adôk. Lu mnuih bi mĭn ngăn drăp kyua pô ngăn anăn jing dŏ pô leh anăn mâo klei dưi bi liê ba yua si pô čiăng. Amâodah ăt mâo lu mnuih kyua amâo mâo klei đăo, rŭng răng tơdah mđing myơr kơ Aê Diê klei jăk hĭn, huĭdah srăng amâo djăp yua hlăm klei hdĭp grăp hruê. Đăm wơr ôh Aê Diê jing Pô brei kơ drei djăp mta klei leh anăn Ñu brei nanao kơ hlei pô thâo mdưm Ñu jing tal sa hlăm klei hdĭp.
Drei pioh hjăn klei jăk hĭn čiăng myơr kơ Aê Diê mơ̆ amâodah ka?
Wah lač: Ơ Khua Yang, jing Pô brei kơ kâo djăp mta mnơ̆ng yuôm bhăn mơ̆g adiê, akâo kơ Ih mtô bi hriăm kâo thâo pioh hjăn klei jăk hĭn myơr kơ Khua Yang hŏng ai tiê hdơr knga kâo brei kơ Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp121:1-8; 122:1-9; 123:1-4; 124:1-8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
