Klei Aê Diê Blŭ: Klei Bi Hriêng 20:20-21
Êlan kliăng: “Mpŭ bĕ kơ ama amĭ ih, tui si Yêhôwa Aê Diê ih mtă leh kơ ih, čiăng kơ ih dưi dôk hdĭp sui hĭn, leh anăn klei jăk dưi truh kơ ih hlăm čar Yêhôwa Aê Diê ih brei kơ ih” (Klei Mtô Mñă Klei Bhiăn 5:16).
Klei êmuh ksiêm mĭn: Ya jing boh jhat kơ mnuih blŭ jhat kơ amĭ ama? Ya ngă ngăn dưn arăng mâo pral amâo srăng mâo klei jăk jĭn ôh? Si ih bi êdah klei huĭ mpŭ leh anăn khăp kơ Khua Yang hŏng klei ih mpŭ kơ amĭ ama?
Mpŭ kơ amĭ ama jing sa hlăm Pluh Mta Klei Bhiăn Aê Diê mtă brei phung ƀuôn sang Ñu gưt. Klei mpŭ bi êdah hlăm klei phung anak čô Aê Diê blŭ leh anăn dôk dơ̆ng ƀơ̆ng huă. Boh jhat kơ pô “tăm pah kơ amĭ ama ñu, pui kđen ñu srăng ram ti krah klei mmăt.” Boh blŭ “tăm pah” mblang mơ̆ng klei blŭ phŭn jing “bi êmut” amâodah “amâo mâo mpŭ.” Pui kđen pô amâo thâo mpŭ anăn srăng ram (dlăng thiăm Klei Bi Hriêng 13:9) jing klei blŭ bi hriêng kơ klei djiê truh ñhăr leh anăn klei knap mñai kơ anak amâo mâo mpŭ kơ amĭ ama. Hlei pô tăm pah kơ amĭ ama ñu, Yêhôwa srăng tăm pah mơh kơ pô anăn (Klei Mtô Mñă Klei Bhiăn 27:16). Klei blŭ khăng hlăm klei bi hriêng anei bi mklăk hŏng klei Aê Diê ƀuăn kơ mnuih mpŭ kơ amĭ ama hlăm Klei Bhiăn tal êma, “Mpŭ bĕ kơ ama amĭ ih, tui si Yêhôwa Aê Diê ih mtă leh kơ ih, čiăng kơ ih dưi dôk hdĭp sui hĭn…” (Klei Mtô Mñă Klei Bhiăn 5:16).
Klei mpŭ amâo djŏ bi êdah mă knŏng hlăm klei blŭ ôh, ƀiădah brei bi êdah wăt hŏng bruă ngă hlăm klei hdĭp mơh. Pruê̆ blŭ “ngăn dŏ arăng dưi mâo pral” čiăng lač kơ ngăn dŏ mâo amâo djŏ mơ̆ng amĭ ama čiăng brei hŏng klei mơak ôh, ƀiădah anak čô plah mă hŏng klei mnêč. Mdê hŏng ngăn dưn mơ̆ng amĭ ama lui brei (Klei Bi Hiêng 17:2; 19:14); ngăn dŏ mâo hŏng klei mnêč êgao klei bhiăn leh anăn hŏng klei tluh plah mmiă Aê Diê amâo srăng hơêč hmưi klei jăk jĭn ôh (Klei Bi Hriêng 10:16). Wăt tơdah mâo dŏ ngăn dưn, ka thâo ôh kơ pô anăn srăng dưi dưn hĕ amâodah hơăi kyuadah klei hdĭp jŏk, klei mdrŏng sah amâodah ƀun ƀin, klei suaih pral dôk hlăm kngan Aê Diê sơăi. Aê Diê amâo brei klei jăk jĭn ôh snăn ti knhal tuč mnuih amâo thâo mpŭ kơ amĭ ama, tluh kơ dŏ ngăn kăn srăng dưi dưn sa mta mnơ̆ng rei.
Phung ka đăo kơ Aê Diê ăt thâo mơh “hdră mĭn kbiă hriê mơ̆ng mnuih, klei jing kbiă hriê mơ̆ng Aê Diê”, anak mnuih mkra hdră ƀiădah hdră anăn jing hĕ amâodah hơăi tui si Aê Diê pô, ƀai hĭn phung anak čô Aê Diê. Sa klei klă jing tơdah drei amâo mâo khăp, amâo mpŭ kơ amĭ ama ôh, si ngă drei dưi bi hriăm phung anak mpŭ kơ drei. Ngă klei bi hmô jhat kơ anak čô si dưi mă tŭ klei jăk jĭn. Kdlưn hĭn mơh, tơdah anak mnuih amâo êbat djŏ tui si êlan Aê Diê ôh snăn hĭn êjai amâo dưi mă tŭ klei jăk jĭn mơ̆ng Aê Diê. Khua ƀĭng kna Y-Pôl lŏ mñă kơ bruă klam phung anak hŏng amĭ ama: “Ơ phung anak, gưt bĕ kơ amĭ ama hlăm Khua Yang, kyuadah klei anăn jing djŏ. “Mpŭ bĕ kơ amĭ ama ih” (anei klei mtă mrô sa mâo wăt klei ƀuăn mbĭt), “čiăng kơ diih dưi mâo klei jăk jĭn leh anăn dưi dôk hdĭp sui ti lăn ala” (Êphêsô 6:1-3). Brei phung đăo thâo mpŭ kơ amĭ ama, čiăng kơ Anăn Khua Yang mâo klei guh kơang hlăm klei drei dôk dơ̆ng ƀơ̆ng huă.
Mâo mơ̆ klei blŭ, bruă drei ngă dôk bi ênguôt kơ Khua Yang leh anăn kơ amĭ ama?
Wah lač: Ơ Khua Yang, brei kâo thâo huĭ mpŭ kơ Ih leh anăn bi êdah knhuah dôk dơ̆ng ƀơ̆ng huă mnuih đăo kơ Krist hŏng klei mpŭ kơ amĭ ama hlăm klei blŭ, bruă ngă leh anăn klei mĭn. Đru kâo thâo uêñ mĭn kơ klei bi hriăm phung anak kâo thâo mpŭ kơ amĭ ama msĕ mơh.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 28:11-31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
