Pajlug 20:20-21
Nqe cim:
“Yuav tsum hwm nej niam nej txiv, raws li tus TSWV uas yog nej tus Vajtswv hais rau nej lawm, nej thiaj yuav noj qab nyob zoo thiab muaj sia ua neej nyob ntev hauv lub tebchaws uas kuv muab rau nej.” (II Kevcai 5:16).
Lus nug rau sawvdaws xav:
– Nqi zog rau tus uas hais lus saib tsis taus niamtxiv yog dabtsi?
– Vim li cas tej uas khwv “yoojyim” tsis tau koob hmoov?
– Peb qhia tawm lub siab hwm thiab hlub tus Tswv los ntawm kev hwm niam hwm txiv li cas?
Hwm niam hwm txiv yog ib nqe kevcai hauv Kaum Nqe Kevcai uas tus Tswv samhwm rau Nws haivneeg yuav tsum tau ua. Lub siab hwm yuav tsum qhia tshwm los ntawm tej lus hais thiab kev ua neej ntawm cov ntseeg. Nqi zog rau tus uas “cem nws niam nws txiv, txojsia yuav tu ib yam li lub teeb uas tuag thaum tsaus ntuj nti.” Lo lus “cem” raws li hauvpaus lus txhais hais tias “thuam saib tsis taus” lossis “saib tsis muaj nqis”. Tus neeg uas tsis hwm niamtxiv lub teeb yuav tuag (saib ntxiv Pajlug 13:9) yog qhov kev hais lus pivtxwv txog txojkev tuag sai lossis tsis muaj kev kaj siab ntawm tus menyuam uas tsis hwm niam hwm txiv. Tus uas foom tsis zoo rau nws niam nws txiv, Vajtswv kuj yuav foom tsis zoo rau tus ntawd (II Kevcai 27:16). Cov lus hais hnyav hauv nqe Pajlug no txawv li tus Tswv tej lus cog tseg rau tus uas hwm niam hwm txiv hauv Kaum Nqe Kevcai nqe tsib, “yuav tsum hwm nej niam nej txiv, raws li tus Tswv uas yog nej tus Vajtswv hais rau nej lawm, nej thiaj yuav noj qab nyob zoo thiab muaj sia ua neej nyob ntev hauv lub tebchaws uas kuv muab rau nej.” (II Kevcai 5:16).
Kev hwm niam hwm txiv tsis yog qhia tawm lo lus hais, tiamsis kuj yuav tsum qhia tawm los ntawm tes haujlwm ua hauv kev ua neej. Nqe lus “tej nyiaj uas koj khwv tau los yoojyim yuav ploj mus” yog xav txog tej khoom uas tsis yog niam txiv zoo siab muab tiamsis cov menyuam siv tswvyim phem huab los. Txawv li tej qub txeeg qub teg uas niamtxiv muab (Pajlug 17:2; 19:14); tej khoom uas siv tswvyim lub siab phem huab los tsis tau tus Tswv foom koob hmoov (Pajlug 10:16). Txawm yog muaj khoom ntau, los nws tsis tau siv, rau qhov txojsia ntev, npluanuj txomnyem lossis dag zog nyob hauv tus Tswv txhais tes. Yog tus Tswv tsis foom koob hmoov ces thaum kawg tus uas tsis hwm niamtxiv, tej khoom huab tau los tsis tau dabtsi.
Cov neeg uas tsis ntseeg tus Tswv tseem paub: “Kev npaj ntiajteb, ua tiav saum ntuj”, tibneeg npaj tswvyim ua tiamsis yuav tiav thiab tsis tiav yog Ntuj pub, ib yam uas muaj rawv yog peb tsis hwm niam hwm txiv ces yus tej menyuam yeej tsis hwm yus. Ua qauv tsis zoo rau tej xeebntxwv yuav ua li cas txais tau tus Tswv koob hmoov. Timthawj Paulus ntuas cov menyuam feem xyuam ua rau niamtxiv: “Cov menyuam, nej yuav tsum mloog nej niam nej txiv lus, thiaj raws li tus Tswv txoj kevcai. Vajtswv txoj kevcai qhia hais tias, nej yuav tsum hwm nej niam nej txiv. Nqe no yog thawj nqes uas Vajtswv coglus hais tias, yog nej ua li ntawd, nej yuav noj qab nyob zoo thiab muaj txojsia nyob ntev hauv lub ntiajteb no.” (Efexus 6:1-3). Cov ntseeg Tswv Yexus yuav tsum hwm niam hwm txiv kom tus Tswv tau ntsejmuag.
Thov Vajtswv,
Nyuam yaus tus Tswv, thov Koj qhia kom nyuam yaus paub hwm Koj thiab qhia tawm kev ua neej los ntawm kev hwm niam hwm txiv. Nyuam yaus yuav qhia tej menyuam paub hlub niamtxiv. Amees.
Muaj tej lus hais, kev ua haujlwm twg peb ua tus Tswv thiab niamtxiv nyuaj siab?
Nyeem Vajluskub hauv peb lub xyoo: Tes Haujlwm 28:11-31
Kênh Youtube BHKTHN:
