Klei Aê Diê Blŭ: Klei Kbiă 20:12
Êlan kliăng: “Mpŭ kơ amĭ ama ih, čiăng bi sui hruê ih dôk hdĭp hlăm čar Yêhôwa Aê Diê ih brei kơ ih.” (Klei Kbiă 20:12)
Klei êmuh ksiêm mĭn: Si brei phung anak gưt ngă klei mtă mpŭ kơ amĭ ama? Čiăng dôk hdĭp mpŭ kơ amĭ ama, ya klei lông dlăng phung anak khăng găn gao? Si drei bi êdah ai tiê mpŭ kơ amĭ ama?
Hlăm Pluh Mta Klei Mtă, “Mpŭ Kơ Amĭ Ama” jing klei mtă tal êlâo hĭn hlăm jih jang klei mtă kơ klei bi mguôp ti krah mnuih hŏng mnuih, leh anăn hjăn sa klei mtă anei mơh mâo wăt klei ƀuăn hơêč hmưi hlue mbĭt. Klei anei brei ƀuh Aê Diê mpŭ kơ gŏ sang leh anăn Ñu dưm klei mpŭ kơ amĭ ama ti dlông hĭn.
Phung anak dôk hdĭp thâo mpŭ, brei dlăng yuôm klei mpŭ kơ amĭ ama, amâo djŏ knŏng hlăm klei blŭ, knhuah hdĭp ênuah ênô, thâo mpŭ, ƀiădah wăt hŏng bruă ngă mơh. Êjai hlăk hđeh, amĭ ama adôk kiă kriê čiêm rông, brei phung anak gưt klei mtô lač mơ̆ng pô kkiêng leh drei (Klei Bi Hriêng 1:8). Phung hđeh khăng kŏ, krưh hŏng amĭ ama arăng ƀuah sơăi (Rôm 1:30; II Y-Timôthê 3:2). Khua pô hưn êlâo Y-Êsêkiêl brei thâo, sa hlăm dŭm mta phŭn knhal kơ klei phung ƀuôn sang Israel arăng mă jing mnă ti čar Babilôn kyuadah “bi êmut kơ amĭ ama” (Y-Êsêkiêl 22:7, 15).
Tơdah phung anak đĭ hriê kơ prŏng leh, mkŏ mdơ̆ng gŏ huă hdĭp hjăn leh dưn, ăt brei mđing hmư̆ klei amĭ ama kčĕ mơh. Knŏng tơdah klei mĭn amĭ ama bi kdơ̆ng hŏng Klei Aê Diê Blŭ mtô, kơh “srăng gưt kơ Aê Diê hĭn hŏng gưt kơ mnuih” (Bruă Phung Khua Ƀĭng Kna 5:29), kyuadah Khua Yang mâo klei dưi hĭn ti dlông jih jang klei, bi drei jing phung anak Ñu, snăn brei drei gưt asăp. Hlăk amĭ ama mduôn khua êdu awăt, ruă duam, phung anak thâo mpŭ amâo knŏng êrô êmuh čhưn ôh, ƀiădah bi êdah klei mpŭ kơ amĭ ama hŏng bruă kriê dlăng wăt kơ ai tiê klei mĭn leh anăn asei mlei digơ̆ msĕ mơh, đru prăk kăk kơ amĭ ama tui si hnơ̆ng drei dưi ngă. Khua ƀĭng kna Y-Pôl ƀuah ktang tĭt kơ phung đăo amâo dlăng ba găp djuê diñu pô ôh, jing phung hngah leh kơ klei đăo, jing jhat hĭn kơ mnuih amâo đăo ôh (I Y-Timôthê 5:8).
Klei sĭt hlăm klei hdĭp, čiăng dôk hdĭp mpŭ kơ amĭ ama tui si klei mtă Khua Yang mtô, phung anak tlă anăp hŏng amâo ƀiă ôh klei lông dlăng brei găn gao hĕ. Lu blư̆ kyua klei hdĭp duah ƀơ̆ng dleh dlan, amâodah klei mĭn amâo ư ai mbĭt, amâodah ayŏng amai adei bi jao bi lư hdơ̆ng pô, amâodah mơal gun kpăk đei kyua klei duah ƀơ̆ng huă suăi, snăn phung anak amâo lŏ uêñ kơ klei mpŭ kơ amĭ ama ôh. Klei Aê Diê Blŭ mtô, phung anak đăm ôh mơal kyua klei dleh dlan, klei lông dlăng hlăm klei hdĭp, hngah hĕ kơ klei mpŭ kơ amĭ ama. Hlue si hnơ̆ng thâo mâo, dhar kreh, amâodah knhuah hdĭp hlăm gŏ sang pô, dôk hdĭp mpŭ kơ amĭ ama. Bruă mpŭ kơ amĭ ama mơ̆ng grăp čô drei amâo knŏng bi mơak kơ amĭ ama, bi guh kơang kơ Aê Diê, ƀiădah wăt ngă klei bi hmô kơ anak čô mơh. Leh anăn kdlưn hĭn mơh, drei srăng mă tŭ klei hơêč hmưi Aê Diê ƀuăn pioh kơ phung anak dôk hdĭp mpŭ kơ amĭ ama.
Si ngă drei hmiêt mkăp găn gao klei lông dlăng čiăng dôk hdĭp mpŭ kơ amĭ ama mơ̆?
Wah lač: Ơ Ama ti dlông adiê, akâo Ih đru kâo găn gao klei lông dlăng hlăm klei hdĭp čiăng dôk hdĭp mpŭ kơ amĭ ama tui si klei mtă Khua Yang mtô. Brei ai tiê thâo mpŭ kâo dưi bi mơak kơ Khua Yang, bi mơak kơ amĭ ama leh anăn ngă klei bi hmô kơ anak čô hdĭp hlue. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
