Yakaunpaus 1:26-27
Nqe cim:
“Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias.” (Yakaunpaus 1:27)
Lus nug rau sawvdaws xav:
– Qhov twg yog cov mojyam ntawm tus neeg ntseeg tseeb?
– Vim li cas cov mojyam ntawd tseemceeb?
– Peb tabtom qhia tawm peb txojkev ntseeg Yexus ntawm yus zoo li cas?
Tus npe ntawv hais tshab plaws hauv tsab ntawv Yakaunpaus yog kev ntseeg tseeb, thiab hauv nqe Vajluskub hnub no, Yakaunpaus qhia tawm tus mojyam ntawm ib tug ntseeg. Nws yog tswj lub qhovncauj, pab lwm tus, thiab ua neej dawbhuv, tsis ua phem ua qias li neeg ntiajteb (nqe 26-27). Tus ntseeg tseeb tsis yog ntseeg hauv lub siab xwb tiamsis kev ntseeg qhia tawm sab nraud rau tej neeg ibncig pom ua tabpov thiab.
Thawj qhov, Yakaunpaus hais txog tus ntseeg tseeb yog tus uas tswj kev hais lus. Tswv Yexus hais tias: “Rau qhov lub siab xav li cas, lub ncauj yeej hais li ntawd.” (Mathais 12:34). Tej lus hais, qhia paub lub siab xav. Yog lub siab ntseeg tus Tswv ces tej lus hais tawm ntawm lub qhovncauj yog cov lus ua rau Vajtswv tau qhuas, qhia tawm tus Tswv txojkev hlub thiab koob hmoov hlub mus rau lwm tus.
Txuas ntxiv, Yakaunpaus hais txog kev pab lwm tus, tshwjxeeb yog cov neeg uas tabtom raug kev txomnyem xws li cov menyuam ntsuag, pojntsuam. Kev ntseeg tseeb tsis yog ua hauv tuamtsev uas muaj plaub phab ntsa thaiv xwb, tiamsis yuav tsum ncav tawm mus pab txhua qhov chaw, pab cov neeg uas txomnyem los ntawm kev nqis tes ua hauj lwm hauv nplooj siab hlub thiab ua siab zoo pab.
Thib peb, yog ua neeg dawbhuv, qaij deb tej kev phem kev qias. Tus ntseeg Vajtswv nyob hauv ntiajteb tiamsis nws tsis ua li neeg ntiajteb ua thiab peb yuav tsis ua tej yam uas tsis dawbhuv zoo li neeg ntiajteb ua. Kev ntseeg tseeb yuav tsum hloov tau peb tus kheej ua neej raws li txojkev ntseeg txhua hnub nrog sawvdaws, kom peb ua tau cov “ntsev las neeg ntiajteb thiab ua tau qhovkaj ci rau neeg ntiajteb pom kev.”
Raws li ibtxwm pheej ntaus nqi, ib tug neeg txojkev ntseeg qhia tawm los ntawm nws ntseeg thiab ua raws li txojkev ntseeg ntawd qhia. Yog ib tug ntseeg Vajtswv, peb kuj yuav tsum qhia tau tawm hais tias peb yog tus ntseeg Txojmoo Zoo, niaj hnub mus pehawm, kub siab lug rau kev koom pab pawg hauv Pawg Ntseeg. Txawm yog li ntawd los, qhov ntawd kuj tsis tau txaus thiab tsis tau yog timkhawv qhia tau ib tug ntseeg tseeb. Txojkev ntseeg yuav tsum qhia tawm sab nraud tshwjxeeb xws li kev hais lus, ua haujlwm, thiab kev ua neej. Thaum peb hais tias peb yog ib tug ntseeg Vajtswv, ces tej lus hais, kev ua haujlwm, thiab kev ua neej ntawm peb kuj yuav tsum ua raws li Vajtswv Txojlus qhia, yog tsis muaj li ntawd, peb yuav tau tshuaj saib yus tus kheej saib ntseeg tseeb lawm los tsis tau ntseeg!
Thov Vajtswv,
Tus Tswv, nyuam yaus ua Koj tsaug vim Koj xaiv thiab cawm nyuam yaus. Thov Koj pab kom nyuam yaus paub ua lub neej qhia tawm cov mojyam ntawm txojkev ntseeg tseeb xws li kev hais lus, ua haujlwm thiab kev ua neej. Kom cov neeg uas ntsia pom tej uas nyuam yaus ua, lawv puavleej qhuas tus Tswv nyob saum ntuj. Nyuam yaus tuav Tswv Yexus lub npe thov, Amees.
Dhau los ntawm peb tej lus hais, kev ua haujlwm thiab kev ua neej, cov neeg nyob ibncig peb puas zeem paub hais tias peb yog Vajtswv cov menyuam lossis tsis yog?
Nyeem Vajluskub hauv peb lub xyoo: I Xamuyees 19
Kênh Youtube BHKTHN:
