Klei Aê Diê Blŭ: Y‑Yakơ 1:26-27
Êlan kliăng: “Snei klei đăo doh leh anăn amâo čhŏ ôh ti anăp Aê Diê Ama: đru phung anak êrĭt leh anăn phung mniê djiê ung hlăm klei knap mñai digơ̆, leh anăn răng kriê amâo bi čhŏ ñu pô hŏng klei mưng lăn ala” (Y‑Yakơ 1:27)
Klei êmuh ksiêm mĭn: Ti leh knuih sa čô mnuih đăo sĭt? Ya ngă knuih anăn jing yuôm lĕ? Si drei bi êdah klei drei đăo sĭt?
Akŏ kơ jih hră Y‑Yakơ jing klei đăo sĭt, leh anăn dua êlan Klei Aê Diê Blŭ hruê anei, Y‑Yakơ bi êdah tlâo knuih mơ̆ng sa čô mnuih đăo sĭt. Anăn jing, thâo răng kơ klei ñu blŭ, mă bruă kơ pô mkăn, hdĭp doh jăk, weh đuĕ mơ̆ng klei mưng lăn ala (êlan 26-27). Sa čô đăo sĭt amâo djŏ knŏng đăo hlăm ai tiê ôh ƀiădah bi êdah wăt ti êngao mơh leh anăn jih jang phung riêng gah dưi hưn bi sĭt kơ klei đăo ñu.
Êlâo hĭn, Y‑Yakơ lač sa čô đăo sĭt jing mnuih thâo răng kơ klei ñu blŭ. Khua Yang Yêsu pô lač leh snei, “Kyuadah mơ̆ng klei êbeh dlai hlăm ai tiê ƀăng êgei blŭ” (Y‑Mathiơ 12:34). Klei blŭ bi êdah kơ klei ai tiê jing. Tơdah ai tiê đăo sĭt kơ Khua Yang snăn jih jang klei blŭ kbiă mơ̆ng ƀăng êgei ăt srăng pioh mpŭ mni kơ Khua Yang mơh, bi êdah klei khăp leh anăn klei pap Khua Yang kơ jih jang mnuih mkăn.
Tal dua, Y‑Yakơ blŭ djŏ kơ jih jang bruă mă ngă kơ phung mkăn, boh nik nak kơ jih jang phung dôk hlăm klei dleh dleh msĕ si phung anak êrĭt, phung mniê djiê ung. Klei đăo sĭt amâo srăng bi kdriêl mă knŏng hlăm lam sang Aê Diê ôh ƀiădah srăng kbiă truh ti tač êngao, đru jih jang phung knap mñai hŏng bruă ngă klă kbiă mơ̆ng ai tiê thâo pap leh anăn klei jăk.
Tal tlâo jing klei dôk dơ̆ng ƀơ̆ng huă hŏng klei doh jăk, weh đuĕ mơ̆ng jih jang klei čhŏ mrŏ. Phung đăo hdĭp ti krah lăn ala ƀiădah amâo jing dŏ lăn ala ôh, kyuanăn drei amâo srăng hdĭp tui si hnơ̆ng čuăn amâo mâo doh lăn ala anei ôh. Klei đăo sĭt srăng bi mlih klei drei dôk dơ̆ng ƀơ̆ng huă grăp hruê ti krah phung ƀuôn sang čiăng drei jing “hra kơ lăn leh anăn klei mngač kơ lăn ala”.
Tui si klei arăng ksiêm mkă aguah tlam, klei đăo sa čô mnuih bi êdah hŏng mta klei đăo diñu đăo leh anăn klei bhiăn klei đăo diñu tui ngă. Jing phung đăo kơ Yêsu Krist, drei ăt msĕ mơh brei jhŏng hưn kơ drei jing phung đăo kơ Klei Mrâo Mrang Jăk, ăt nao kơ sang Aê Diê, hur har bi kƀĭn leh anăn mă bruă Phung Sang Aê Diê. Ƀiădah lĕ, dŭm anăn ka djăp leh anăn ka djŏ klei hưn bi sĭt kơ sa čô mâo klei đăo sĭt ôh. Brei klei đăo anăn bi êdah hŏng bruă sa čô mnuih bhiăn ngă ti êngao anăn jing klei blŭ, bruă ngă leh anăn klei dôk dơ̆ng ƀơ̆ng huă. Tơdah drei lač drei đăo kơ Khua Yang, snăn brei klei drei blŭ, bruă drei ngă, leh anăn klei drei dôk dơ̆ng ƀơ̆ng huă ngă djŏ tui si klei Khua Yang mtă mơh, tơdah amâo djŏ snăn ôh, brei drei lŏ ksiêm kơ drei pô jing mnuih đăo sĭt leh hĕ amâodah ka ôh!
Hŏng klei drei blŭ, bruă ngă leh anăn klei drei dôk dơ̆ng ƀơ̆ng huă, si ngă phung riêng gah thâo kral drei jing phung anak Khua Yang mơ̆?
Wah lač: Ơ Khua Yang, lač jăk kơ Ih ruah leh anăn bi tui leh kâo. Đru kâo bi êdah knuih sa čô mnuih đăo sĭt hlăm klei blŭ, bruă ngă leh anăn klei dôk dơ̆ng ƀơ̆ng huă. Čiăng kơ jih jang mnuih ƀuh klei hdĭp kâo leh anăn mpŭ mni kơ Anăn Ih hlăm adiê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
